Скачать или смотреть ŞƏHİD ORXAN DADAŞOV VALİDEYNLƏRİNƏ VERDİYİ SÖZÜ TUTUB

Şəhid Orxan Dadaşov döyüşlərdə olarkın atası ilə söhbətlərində hər dəfə onu arxayın edirmiş. Deyirmiş ki, doğma torpaqlarımızı işğaldan azad edəcəyəm. Hər dəfə verdiyi vədləri yerinə yetirən Orxan bu dəfə də sözünü tutub, öz qanı bahasına torpaqlarımızın, Şuşanın azadlığı uğrunda şəhid olub.
Orxan Dadaşov 1996-cı ildə Ağdamın cəbhə xəttinə yaxın yaşayış məntəqələrindən olan Mirəşelli kəndində doğulub. Uşaq yaşlarından müharibənin ağrı-acısını yaşayıb, düşmənini yaxşı tanıyıb. Vətən müharibəsi başlayan kimi dərhal hərbi komissarlığa müraciət edib. Cəbhə kəndində 4 uşaqlı ailədə dünyaya gələn Orxanın 2 qardaşı bir bacısı var. Ailənin yeganə qız övladı isə Orxanın əkiz tayıdır. Orxana görə başını dik tutan bacısı deyir ki, son vaxtlar qardaşını tez-tez yuxuda görür.
Orxan Dadaşov müharibənin ilk günlərindən Cəbrayıl-Füzuli istiqamətində döyüşlərdə iştirak edib. Son döyüşü isə Şuşa şəhərində olub. Azərbaycanın ərazi bütövlüyünün təmin edilməsi uğrunda aparılan hərbi əməliyyatlarda döyüş tapşırıqlarını qəhrəmanlıqla icra edən, vəzifə borcunu şərəflə yerinə yetirən əsgər Orxan Dadaşov ölümündən sonra “Vətən uğrunda” medalı ilə təltif olunub.