Il-Festa bil-Fondi Ewropej - Soċjetà Filarmonika Maria Mater Gratiæ, Ħaż-Żabbar

Is-Soċjetà Filarmonika Maria Mater Gratiæ ta’ Ħaż-Żabbar, bl-għajnuna ta’ SEM kisbet fondi Ewropej mill-programm LEADER, amministrat mill-Fondazzjoni GAL Xlokk. Is-Soċjetà Filarmonika rrestawrat it-teatru miftuħ tal-każin – Blue Arena - u bniet kmamar għall-amministrazzjoni u għat-tagħlim tal-mużika.

Il-proġett tat-teatru miftuħ kien jikkonsisti fi tliet interventi: ir-restawr tal-faċċata tat-teatru biex jerġa’ jieħu l-bixra oriġinali tiegħu, li kienet iddgħajfet maż-żmien minħabba diversi ħsarat kaġunati mill-bidliet fit-temp; ix-xiri u l-istallazzjoni ta’ sistema ta’ shutters li jipproteġu t-teatru mill-elementi naturali u li tiżgura li l-parti ta’ ġewwa tal-palk titħares kemm jista’ jkun; l-istallazzjoni tad-dawl meħtieġ għal attivitajiet li jiġu organizzati fit-teatru matul is-sena. It-teatru Blue Arena nbena oriġinarjament fl-1948 u ntuża għal diversi attivitajiet matul is-snin.

Permezz tat-tieni proġett, is-Soċjetà Filarmonika bniet numru ta’ kmamar biex ikollha aktar spazju għall-amministrazzjoni u biex ikollha fejn tgħallem il-mużika. Il-pjan hu li s-sede tas-Soċjetà tkun ċentru ta’ kultura għal-lokalità.