وشلون تهجرني _ مدغم ابو شيبه

للحزن ساحات بصدري مثل ساحات القتال
فيها الاصيل من المهار تعود بخيالها

ولا يطفي حر مابي من حرايق وأشتعال
الا الدموع اللي من عيوني يهل هلالها

لازال فيها عبرتين للفراق ولاتزال
ذكرى هنوفٍ كل يوم أحطها وأشتالها

راحت عسى الله مايلحقني مشاريه الرجال
تقول كني ماخلقت من التراب الالها

عز الله أني مانسيت أفعالها بنت الحلال
لعل ربي مايجازيها بسو أفعالها

أكبر جريمه ترتكبها فالهوى من وسع بال
أول ضحاياها بصدري شيدوا تمثالها

وشلون تهجرني وأنا مالي على الهجر أحتمال
وشلون تهملني وأنا مانيب أطيق أهمالها

وشلون تقطعني بسيف البعد قطاع الوصال
وأنا لو أقطع عرق قلبي ماقطعت اوصالها

وشلون ماتشتاق,,ماترحم,,ماتذكر,,ماتسال
وشلون ماتطلق يدين كبلت بأغلالها

وشلون مايطري عليها لاتفيت فالظلال
متشبث لاوقفت جنبه قعد بظلالها
لو المفارق صعب والنسيان ضرب من الخيال
ارخى يـ راسي لايروق ولا يحلالها

احفظ لها قيمة غلاها وأنتظرها من شمال
وإذا نستني هذي الدنيا وهذا حالها

أما أني أنساها .. نسى الله من نسى ذاك القبال
ياصب روحي صب دلتها على فنجالها

قولولها لاستخسرت فيني ريالين أتصال
تهدي على ( جمعية الصم البكم ) جوالها