Скачать или смотреть ၂၀၂၄-၂၀၂၅ ပညာသင်နှစ် တက္ကသိုလ်ဝင်စာမေးပွဲ အောင်ချက်မြင့်မာလာရေးအတွက် ပိုမိုအလေးပေး ဆောင်ရွက်သွားမည်

၂၀၂၄-၂၀၂၅ ပညာသင်နှစ် တက္ကသိုလ်ဝင်စာမေးပွဲ အောင်ချက်မြင့်မာလာရေးအတွက် ပိုမိုအလေးပေး ဆောင်ရွက်သွားမည်

EPN
မြစ်ကြီးနား၊ ဇွန် ၁၄(၂၀၂၄)

ကချင်ပြည်နယ်တွင် ၂၀၂၄-၂၀၂၅ ပညာသင်နှစ် တက္ကသိုလ်ဝင်စာမေးပွဲ အောင်ချက်ရာခိုင်နှုန်း မြင့်မာလာစေရေးအတွက် ပိုမိုအလေးပေး ဆောင်ရွက်သွားမည်ဖြစ်ကြောင်း ကချင်ပြည်နယ် ပညာရေးမှူးရုံးမှ သိရသည်။

၂၀၂၃-၂၀၂၄ ပညာသင်နှစ်တွင် တက္ကသိုလ်ဝင်စာမေးပွဲ ဖြေဆိုသူဦးရေ (၅၇၄၇)ဦးအနက် (၃၄၈၅)ဦး ဖြေဆိုအောင်မြင်ခဲ့ပြီး၊ (၆၀ ဒဿမ ၆၄) ရာခိုင်နှုန်းရှိခဲ့ကြောင်း ကချင်ပြည်နယ် ပညာရေးမှူးရုံးမှ တာဝန်ရှိသူတစ်ဦးက ပြောသည်။

" ဒီနှစ်မှာတော့ အောင်ချက်ရာခိုင်နှုန်းအနေနဲ့ (၆၀)ရာခိုင်နှုန်းကျော်မှာ ရှိခဲ့တယ်။ တစ်ပြည်နယ်လုံးအနေနဲ့ အဆင့်(၅)မှာ ရှိနေခဲ့တယ်။ လာမယ့်နှစ်မှာလည်း Grade-12 အောင်ချက်မြင့်မားရေးအတွက် ပိုမိုအလေးပေး ဆောင်ရွက်သွားမယ်။ အောင်ချက်မြင့်မားလာစေရေးအတွက် ကျောင်းချိန်မှာလည်းပဲ ဆရာ၊ ဆရာမတွေနဲ့ ကျောင်းသား၊ ကျောင်းသူတွေကို သေသေချာချာလေး သင်ကြားမှုအပိုင်းတွေ ဆောင်ရွက်ပြီးတော့ ကျောင်းချိန်ပြင်ပမှာလည်း ကလေးတွေကို ကျောင်းစာတွေ သေချာဆည်းပူးနိုင်အောင် နှိုးဆော်သွားမှာ ဖြစ်တယ် " ဟု ၎င်းကပြောသည်။

၂၀၂၃-၂၀၂၄ ပညာသင်နှစ်၏ တက္ကသိုလ်ဝင်စာမေးပွဲ ဖြေဆိုအောင်မြင်ခဲ့သူများအနက် အမှတ်အများဆုံး ရရှိခဲ့သည့် ကျောင်းသား၊ ကျောင်းသူ (၁၀)ဦးတွင် ကချင်ပြည်နယ်မှ (၂)ဦး ပါဝင်ခဲ့ကြောင်း ကချင်ပြည်နယ် ပညာရေးမှူးရုံး စာရင်းများအရ သိရသည်။

ကချင်ပြည်နယ်အတွင်း ၂၀၂၃-၂၀၂၄ ပညာသင်နှစ်တွင် စာစစ်ဌာန (၂၇)ခု ဖွင့်လှစ်နိုင်ခဲ့ပြီး ၆ ဘာသာ ဂုဏ်ထူးရှင် (၉)ဦး၊ ၅ ဘာသာဂုတ်ထူးရှင် (၃၃)ဦး ၊ ၄ ဘာသာဂုတ်ထူးရှင် (၆၀)ဦး၊ ၃ ဘာသာဂုတ်ထူးရှင် (၇၉)ဦး ၊ ၂ ဘာသာဂုတ်ထူးရှင် (၂၀၀)ဦး၊ ၁ ဘာသာဂုတ်ထူးရှင် (၃၇၈)ဦး ရှိခဲ့ကြောင်း သိရသည်။

ဗညားနွဲ့