綜藝揭真實體重 Hani 50kg勁fit Kara齡智56 3kg嚇親

韓國女星個個報稱的體重都有咁輕得咁輕，50kg更可以講得話係上限，但係咪真係個個都係咁輕就真係好有保留喇。
噚晚喺KBS電視台播出嘅新年特別節目《本分金牌》中，喺女藝人唔知情嘅情況下突擊公開咗佢哋嘅體重。冇得臨急抱佛腳、冇得報細數，自己嘅體重突然被公開，女藝人們都嚇咗一跳。
原來節目組係錄影嘅時候，只係叫一班女藝人單獨企上一個小型舞台上跳3分鐘性感舞蹈，對於有份出演嘅女團成員們，例如EXID嘅Hani，前Kara成員許齡智、AOA智珉等等當然冇難度啦！不過節目組原來「出術」，喺個小型舞台連接住一個偽裝成風扇嘅體重計，結果多位偶像嘅實質體重完全無所遁形。
EXID嘅率智重50.42kg、GFRIEND Yuju嘅體重係51kg，After School嘅Lizzy同TWICE嘅多賢亦分別重46及50.08kg。而一班女藝人喺拍攝之前亦都填咗張form，上面填咗佢哋估計自己嘅體重，用嚟對照返佢哋既真實體重，普遍嚟講佢哋嘅體重同佢哋預測嘅都有1-4kg出入。
至於實際體重同預測體重出入最大嘅一位就係許齡智，佢估計自己51kg，不過實際上重56.34kg，足足重咗5.34kg。事後睇返playback，齡智忍唔住大叫：「當時是我最重的時候！」而EXID嘅Hani就成為體重出入最細嘅一位，佢預計自己重50kg，而真實體重係50.02kg，準得驚人！
講返轉頭，早前EXID以〈Hot Pink〉回歸時，Hani就曾經自爆自己努力減肥，一日只係食唔會餓死自己嘅份量，結果極速瘦咗9kg，瘦到連蘋果肌都凹埋，最後因為過度減肥結果反而要增肥。一班女artist為咗上鏡好睇，背後真係付出唔少。