شيلة بنات الفكر

شيلة بنات الفكر (المقناص)
كلمات الشاعر/ محمد القسامي
ألحان وأداء/ نياف تركي

الا ياهل المقناص لاجاز مطراشه
معاكم هواجيسي من السجن اطرشها

ولايشقي المقناص ياكود من عاشه
مشاعر تحز بخاطر اللي يعايشها

تشب الضمير اللي م الوقت قدناشه
بضرسه ونابه ثومة القلب ناهشها

انا اللي هواجيس العشا حركت جاشه
وقامت تطيشني هجوسي واطيشها

وانا من ورى القضبان غايب عن الشاشه
اللحف هجوسي بالفيافي وافرشها

بنات الفكر في عالم السجن منداشه
وصلف النشايب في زماني مدوشها

يعوض عن الديره وعن جوخة الباشه
مهب الهبوب اللي هواها ينشنشها

وروحي على المسراح بدري ومغباشه
نسيم الصباح وصادق الود ينعشها

ابابعد عن الجوال ومسلسل اقماشه
وعن وجه من نفسه على الناس ينفشها

اليا لاح برق الوسم وروعود رهاشه
وسنا البرق عين اللي يخيله يوحشها

صدوقن من المنشى خياله ورشراشه
دموعه على خد البسيطه يمششها

مقادم مزونه كنها النير واحشاشه
ترخت على مربى الجوازي مراهشها

تصب المطر فوق الجراهيد طشاشه
وحذف البرد روس البهايم يطششها

تدفق عوايرها على نجد نهاشه
سيله خمايل نجد يصبح مخربشها

وغنى حمام الورق والخلق وابواشه
على سيله الجاري لحونه مغبشها

وعقب المطر نبته كما نقش نقاشه
زهوره على وجه الصحاري ينقشها

وراع الولع جهز على الطرقه فراشه
ودور على اللي خوة الطيب حايشها ..
..