Скачать или смотреть စစ်ခေါင်းဆောင် တရုတ်ခရီးစဉ်နဲ့ပတ်သက်ပြီး NUG ဘာပြောလဲ

စစ်ခေါင်းဆောင် တရုတ်ခရီးစဉ်နဲ့ပတ်သက်ပြီး NUG ဘာပြောလဲ
……..
စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်၏ တရုတ်ခရီးစဉ်သည် တရုတ်-မြန်မာဆက်ဆံရေးကြားကို အဖုအထစ် ပိုဖြစ်လာမည်ကို စိုးရိမ်ရကြောင်း အမျိုးသားညီညွှတ်ရေးအစိုးရ(NUG)၊ နိုင်ငံခြားရေးဝန်ကြီး ဒေါ်ဇင်မာအောင်က ပြောဆိုသည်။

"ဒီလိုမျိုးဖိတ်ကြားမှု၊ ဒီခရီးစဉ်ဟာ တရုတ်နဲ့ မြန်မာပြည်သူလူထုကြား၊ တရုတ်-မြန်မာဆက်ဆံရေးကို အထောက်အကူ ဖြစ်ဖို့ထက် အဖုအထစ်ဖြစ်သွားနိုင်တဲ့ စစ်ကောင်စီကိုဘဲ မျက်နှာမူတဲ့ ဆက်ဆံရေးမျိုးဖြစ်နေတာကို စိုးရိမ်မှုရှိတယ် " ဟု သူက ဆိုသည်။

ယမန်နေ့က ပြုလုပ်သော အမျိုးသားညီညွှတ်ရေးအစိုးရ(NUG)၊ ကရင်အမျိုးသားအစည်းအရုံး(KNU)၊ ကရင်နီအမျိုးသားတိုးတက်ရေးပါတီ(KNPP) နှင့် ချင်းအမျိုးသားတပ်ဦး(CNF) တို့ပူးတွဲသတင်းစာရှင်းလင်းပွဲတွင် နိုင်ငံခြားရေးဝန်ကြီး ဒေါ်ဇင်မာအောင်က တရုတ်ခရီးစဉ်နှင့်ပတ်သက်ပြီး မီဒီယာများမေးမြန်းမှုကို ပြန်လည်ဖြေကြားခဲ့ခြင်းဖြစ်သည်။

ထို့အပြင် စစ်ခေါင်းဆောင် မင်းအောင်လှိုင်ကို တရုတ်အစိုးရဘက်က မဟာမဲခေါင်ဒေသခွဲထိပ်သီးအစည်းအဝေး တက်ရောက်ဖိတ်ကြားခဲ့သည်ဆိုသော သတင်းများထွက်ပေါ်လာကတည်းကလည်း NUG အနေဖြင့် ထိုဖိတ်ကြားမှုသည် စစ်ကောင်စီကို အသိအမှတ်ပြုလက်ခံလိုက်ခြင်းမျိုးမဖြစ်စေရန် တရုတ်နိုင်ငံခြားရေးဝန်ကြီးဌာနဘက်သို့ ကန့်ကွက်စာ ပို့ခဲ့သေးကြောင်း သူက ဆိုသည်။

" ကျွန်မတို့ နောက်မှာထပ်သိရတာက ဒါက နိုင်ငံတော်အဆင့် ခရီးစဉ်မဟုတ်ဘူး။ ပြည်နယ်တစ်ခုမှာပဲလုပ်တဲ့ ဒေသတွင်းဆိုင်ရာဖိုရမ်တစ်ခုကိုပဲ တက်ရောက်တာဖြစ်တယ်လို့ သတင်းစကားပြန်ရခဲ့တာလည်း ရှိပါတယ် " ဟု ဒေါ်ဇင်မာအောင် ပြောဆိုသည်။

သတင်း၊ တင်ဆက် - မြတ်ကြီး