Скачать или смотреть កិច្ចប្រជុំកម្រិតលេខាធិការដ្ឋានយោធភូមិភាគកម្ពុជា-ថៃ បានបិទបញ្ចប់ រង់ចាំកិច្ចប្រជុំពិសេសកម្រិត...

កិច្ចប្រជុំកម្រិតលេខាធិការដ្ឋានយោធភូមិភាគកម្ពុជា-ថៃ បានបិទបញ្ចប់ រង់ចាំកិច្ចប្រជុំពិសេសកម្រិតមេយោធភូមិភាគ

(ឧត្តរមានជ័យ)៖ នៅវេលាម៉ោងប្រមាណ ១៖៣០នាទីរសៀលថ្ងៃសុក្រ ទី៣១ ខែតុលា ឆ្នាំ២០២៥នេះ កិច្ចប្រជុំកម្រិតលេខាធិការដ្ឋានយោធភូមិភាគទី៤របស់កម្ពុជា និងយោធភូមិភាគទី២ របស់ថៃបានបិទបញ្ចប់។

សូមបញ្ជាក់ថា នៅវេលាម៉ោងប្រមាណ ១០៖២០នាទីព្រឹកថ្ងៃសុក្រ ទី៣១ ខែតុលា ឆ្នាំ២០២៥នេះ កងទ័ពនៃយោធភូមិភាគទី៤ របស់កម្ពុជា និងកងទ័ពនៃយោធភូមិភាគ២របស់ថៃ កម្រិតលេខាធិការដ្ឋាន បានជួបប្រជុំគ្នានៅច្រកព្រំដែនអូរស្មាច់ ខេត្តឧត្តរមានជ័យ ដែលជាច្រកព្រំដែនកម្ពុជា-ថៃ។ កិច្ចប្រជុំនេះ បានការអញ្ជើញចូលរួមពីសំណាក់អ្នកសង្កេតការណ៍អាស៊ានផងដែរ។ ភាគីកម្ពុជាដឹកនាំដោយ ឧត្តមសេនីយ៍ត្រី និត ណារ៉ុង នាយសេនាធិការរងយោធភូមិភាគទី៤ និងភាគីថៃដឹកនាំដោយ ឧត្តមសេនីយ៍ត្រី កាំផាក់ណាក វ៉ាផាន់ស៊ុ នាយសេនាធិការ កងទ័ពភូមិភាគទី២។

យោងតាមព័ត៌មាន បានឱ្យដឹងថា ក្រៅពីការប្រជុំរវាងលេខាធិការដ្ឋាននាព្រឹកនេះហើយ នៅពេលរសៀលនេះ អាចនឹងមានការប្រជុំកម្រិតមេភូមិភាគទាំងពីផងដែរ។ កិច្ចប្រជុំនេះ ជជែកផ្តោតជាសំខាន់លើការកែសម្រួលអាវុធធុនធ្ងន់នៃប្រទេសទាំងពីរចេញពីតំបន់ជម្លោះរវាងគ្នា។

កិច្ចប្រជុំនេះ ធ្វើឡើងស្របតាមសេចក្តីថ្លែងការណ៍រួមស្តីពីសន្តិភាពរវាងកម្ពុជា-ថៃ កាលពីថ្ងៃទី២៦ ខែតុលា នៅទីក្រុងកូឡាឡាំពួរ ប្រទេសម៉ាឡេស៊ី ចុះហត្ថលេខាដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា លោក អនុទីន ចាន់វីរៈគុល នាយករដ្ឋមន្ត្រីថៃ លោក ដូណាល់ ត្រាំ ប្រធានាធិបតីអាមេរិក និង លោក អាន់វ៉ា អ៉ីប្រាហ៊ីម នាយករដ្ឋមន្ត្រីម៉ាឡេស៊ី និងជាប្រធានអាស៊ាន៕