ចំណងជើង៖ គ្រូខុសឆ្គងសន្យាភាពចម្រុងចម្រើន​ (Prosperity Gospel, Prosperity Preacher)

តើ​ព្រះ​បង្គាប់​យើង​ឲ្យ​ជួយ​អ្នក​មាន ឬ​អ្នក​ក្រ?

គ្រូ​ចម្រុង​ចម្រើន ជា​អ្នក​មាន​រស់​នៅ​ក្នុង​វិមាន​ដ៏​ធំ​ ហើយ​មាន​យន្ត​ហោះ​ឯក​ជន​ផ្ទាល់​ខ្លួន​របស់​ពួក​គេ​ទៀត តែ​ពួក​គេ​ទាមទារ​ទស្សនិកជន​ដែល​មើល​ទូរទស្សន៍​ និង​អ៊ីនធឺណិត ​របស់​ពួកគេ ​ផ្ញើ​ប្រាក់​មក​ឲ្យ​ពួក​គេ​រហូត។ ប៉ុន្តែ​ តើ​ព្រះ​យេស៊ូវ​បង្គាប់​យើង​ឲ្យ​ថ្វាយ​ដង្វាយ​ដល់​អ្នក​មាន​ ឬ​អ្នក​ក្រ? សូម​ស្តាប់៖ «ប៉ុន្តែ កាល​ណា​អ្នក​ធ្វើ​ទាន នោះ​កុំ​ឲ្យ​ដៃ​ឆ្វេង​ដឹង​ការ​ដែល​ដៃ​ស្តាំ​ធ្វើ​ឡើយ ដើម្បី​ឲ្យ​អំពើ​ទាន​របស់​អ្នក បាន​ស្ងាត់​កំបាំង នោះ​ព្រះវរបិតា​នៃ​អ្នក ដែល​ទ្រង់​ទត​ឃើញ​ក្នុង​ទី​សំងាត់ ទ្រង់​នឹង​ប្រទាន​រង្វាន់​ដល់​អ្នក​នៅ​ទី​ប្រចក្ស​ច្បាស់» (ម៉ាថាយ ៦ៈ៣-៤)។
ព្រះយេស៊ូវ​ចង់​ឲ្យ​យើង​ឲ្យ​ទាន​ដល់​អ្នក​ក្រ​ មិន​មែន​ដល់​អ្នក​មាន​នោះ​ទេ៖ «ព្រះយេស៊ូវ​បាន​មាន​បន្ទូល​ទៅ​កាន់​បុរស​ដែល​បាន​អញ្ជើញ​ទ្រង់​ដែរ​ថា៖ កាល​ណា​អ្នក​ជប់​លៀង​ភ្ញៀវ​ពេល​ថ្ងៃ​ត្រង់ ឬ​ពេល​ល្ងាច​ នោះ​កុំ​ឲ្យ​អញ្ជើញ​ពួក​សំឡាញ់​ បង​ប្អូន​សាច់ញាតិ ឬ​អ្នក​មាន ដែល​នៅ​ជិត​ខាង​ឡើយ ក្រែង​គេ​ក៏​អញ្ជើញ​អ្នក​ទៅ​សង​ដូច្នោះ​វិញ​ដែរ។  បើ​កាល​ណា​អ្នក​រៀប​ជប់​លៀង​ភ្ញៀវ​នោះ ចូរ​អញ្ជើញ​ពួក​អ្នក​ក្រ អ្នក​ពិការ អ្នក​ខ្ញើច និង​អ្នក​ខ្វាក់​វិញ។  យ៉ាង​នោះ​អ្នក​នឹង​បាន​ពរ​ពិត ដ្បិត​មនុស្ស​ទាំង​នោះ​គ្មាន​អ្វី​នឹង​សង​អ្នក​វិញ​ទេ លុះ​កាល​ណា​ពួក​មនុស្ស​សុចរិត​រស់​ឡើង​វិញ នោះ​អ្នក​នឹង​បាន​រង្វាន់​ហើយ» (លូកា ១៤ៈ១២-១៤)។
អ្នកនិពន្ធ​សុភាសិត​ព្រមាន​យើង​ពី​ការ​ជួយ​អ្នក​មាន៖ «អ្នក​ដែល​សង្កត់សង្កិន​មនុស្ស​ទាល់​ក្រ ដើម្បី​នឹង​ចំរើន​ទ្រព្យ​សម្បត្តិ​ខ្លួន​ឡើង ហើយ​អ្នក​ណា​ដែល​ជូន​ជំនូន​ដល់​អ្នក​មាន នោះ​នឹង​ត្រឡប់​ជា​ខ្វះ​ខាត​វិញ» (សុភាសិត ២២ៈ១៦)។ ខ​នេះ​រំឭក​យើង​ពី​គ្រូ​ចម្រុងចម្រើន​ ដែល​ទាមទារ​ដង្វាយ​ពី​អ្នក​ស្ដាប់​ដែល​ក្រីក្រ​ ហើយ​ក៏​រំឭក​យើង​អំពី​ពួក​ក្រីក្រ ដែល​ផ្ញើ​ដង្វាយ​ដល់​គ្រូ​ចម្រុងចម្រើន ដោយ​សង្ឃឹម​ថា គេ​នឹង​ទទួល​លុយ​វិញ មួយ​ជា​មួយរយ​ដែរ។ ទាំង​ពី​គឺ​ប្រើ​សាសនា​ដើម្បី​ក្លាយ​ទៅ​ជា​អ្នក​មាន។
ច្បាស់​ណាស់ ដែល​ព្រះ​ចង់​ឲ្យ​យើង​ជួយ​ដល់​អ្នក​ក្រីក្រ មិនមែន​ដល់​គ្រូ​ជា​អ្នក​មាន​ នៅ​តាម​ទូរទស្សន៍​ទាំង​នេះ​នោះ​ទេ។ ឧទាហរណ៍ អ្នកស្រី ចយ ម៉ៃយើ ( Joyce Meyer) ស្នាក់​នៅ​ក្នុង​បន្ទប់​សណ្ឋាគារ​ដែល​មាន​តម្លៃ​ជាង ១0០០ ដុល្លារ​ក្នុង​មួយ​យប់។ ផ្ទះ​របស់​គាត់​មាន​តម្លៃ ២០​លាន​ដុល្លារ។ គាត់​ធ្វើដំណើរ​ពី​ទី​ក្រុង​មួយ​ទៅ​ទី​ក្រុង​មួយ​ទៀត ​ដោយ​ជិះ​យន្ត​ហោះ​ផ្ទាល់ខ្លួន​ ហើយ​គាត់​ទទួល​បាន​ប្រាក់​ខែ​ជាង ១០ ម៉ឺន​ដុល្លារ​ជា​រៀង​រាល់​ខែ! ប្រសិន​បើ​គ្រូ​អធិប្បាយ​ទាំង​នេះ​ ជា​អ្នក​មាន​យ៉ាង​ខ្លាំង​ ​ហេតុ​អ្វី​បាន​ជា​ពួក​គេ​នៅ​តែ​សុំ​លុយ​ពី​យើង​ទៀត? 

គ្រូ​​ចម្រុងចម្រើន​ល្បីៗ
នេះ​គឺជា​បញ្ជី​គ្រូ​ចម្រុងចម្រើន​ល្បីៗ​នៅ​ជុំវិញ​ពិភពលោក។ ពួក​គេ​រក​លុយ​បាន​ច្រើន​ណាស់ ដែល​ធ្វើ​ឲ្យ​ពួក​គេ​ រស់​នៅ​ដូចជា​ស្តេច និង​មហាក្សត្រី។ បញ្ជី​នេះ​មិន​គ្រប់​ទាំង​អស់​ទេ គឺ​នៅ​មាន​រាប់​រយ​នាក់​ទៀត (គ្រូ​នៅ​បញ្ជី​នេះ​ខ្លះ​ជិត​សេចក្ដី​ពិត​ជាង​គ្រូ​ឯ​ទៀត ប៉ុន្តែ​ពួកគេ​ទាំង​អស់​បង្រៀន​ថា ជា​ព្រះហឫទ័យ​របស់​ព្រះ​អង្គ ដែល​យើង​ត្រូវ​មាន​ជីវភាព​ស្ដុកស្ដម្ភ និង​សុខភាព​ល្អ ហើយ​​ថា យើង​អាច​ក្លាយជា​អ្នក​មាន ដោយ​និយាយ​ពាក្យ ដែល​បង្កើត​ឲ្យ​មាន​សុខភាព​ល្អ និង​ភាព​ចម្រុងចម្រើន)។

សហរដ្ឋអាមេរិក
បិននី ហិន (Benny Hinn) ចូល អូស្ទីន (Joel Osteen)
ចយ ម៉យើ (Joyce Meyer)  ធីឌី ចេក (TD Jakes)
ខេនណិត ខុបផ្លិន (Kenneth Copeland ) ផល្លា ហ្វៃត (Paula White)
ខេនណិត ហេហ្គិន (ខ្មោច) (Kenneth Hagin) ក្រិហ្វឡូ ដុល្លា (Creflo Dollar)

អាស៊ី
យ៉ូសែប ព្រិន (Joseph Prince) កង ហ៊ី (Kong Hee)

អាហ្វ្រិក
ធីប៊ី ចយស៊ូអា (ខ្មោច) (T.B. Joshua) សែបភើត ប៊ូសស៊ីរី (Shepherd Bushiri)
គ្រីស អូយ៉ាឃីឡូមេ (Chris Oyakhilome) រេ មឺខលលី (Ray McCauley)
អ៊ូបឺត អេងជែល (Uebert Angel) អ៊ីអេ អាដេបូយេ (E.A. Adeboye)
អាយ៉ូ អូរិតសេចាហ្វរ (Ayo Oritsejafor) ដាវិដ អូយ៉េដេបូ (David Oyedepo)
អាលហ្វ លូកោ (Alph Lukau)

អាមេរិក​ខាង​ត្បូង
វ៉ាល់ឌីមីរ៉ូ សាន់ទីអាហ្គូ (Valdemiro Santiago) អេឌៀ ម៉ាសេដូ (Edir Macedo)

----------------------------------------------------------

តើ​យើង​ដឹង​យ៉ាង​ដូចម្តេច​ថា ​នរណា​ម្នាក់​គឺ​ជា​គ្រូ​ក្លែងក្លាយ​នៃ​ភាព​ចម្រុងចម្រើន?

គាត់​ចំណាយពេល​ច្រើន​និយាយ​អំពី​ទ្រព្យសម្បត្តិ និង​សុខភាព។
គាត់​មិន​បាន​ព្រមាន​មនុស្ស​អំពី​គ្រោះ​ថ្នាក់​នៃ​ការ​ចង់​ក្លាយ​ជា​អ្នក​មាន​នោះ​ទេ។
គាត់​បង្រៀន​ថា​ អ្នក​អាច​បង្កើត​ទ្រព្យ​សម្បត្តិ​ និង​សុខភាព​ល្អ​ ​ដោយ​ពាក្យ​សម្ដី​ពិសេស​របស់​អ្នក (ដូច​ព្រះ)។
គាត់​បាន​ក្លាយ​ជា​សេដ្ឋី​ ពី​ដង្វាយ​របស់​គ្រីស្ទបរិស័ទ​សាមញ្ញ។
គាត់​មិន​សូវ​មាន​ អ្នក​ទទួល​ខុស​ត្រូវ​លើ​គាត់​នោះ​ទេ។ ធម្មតា​គ្មាន​ក្រុម​ចាស់ទុំ​ណា​ដែល​ហ៊ាន​កែ​តម្រូវ​គាត់​ឡើយ។
គាត់​និយាយ​ច្រើន​ អំពី​ខ្លួន​គាត់​ ហើយ​គាត់​ជា «វីរបុរស» នៃ​រឿង​ផ្ទាល់​ខ្លួន​របស់​គាត់។
បុគ្គលិក​លក្ខណៈ​របស់​គាត់ គឺជា​ចំណុច​សំខាន់​ជាង​គេ​ ដើម្បី​អូស​ទាញ​អ្នក​ស្ដាប់ មិនមែន​ការ​បង្រៀន​ព្រះបន្ទូល​របស់​ព្រះ​ ឬ​ការ​ផ្សាយ​ដំណឹង​ល្អ​ទេ។
គាត់​រស់​នៅ​ក្នុង​ជីវិត​ដ៏​ប្រណិត និង​ថ្លៃ​ថ្នូរ​ ដោយ​មាន​រថយន្ត​ថ្លៃៗ ផ្ទះ​ធំៗ ជា​ច្រើន​ ហើយ​យន្ត​ហោះ​ឯក​ជន​ផង​ដែរ។
គាត់​មិន​បង្រៀន​អំពី​ភាព​ចាំបាច់​នៃ​ការ​រងទុក្ខ​នៅ​ក្នុង​ជីវិត​ជា​គ្រីស្ទបរិស័ទ​ទេ។
គាត់​និយាយ​ថា ជំងឺ និង​ភាព​ក្រីក្រ កើត​ចេញ​ពី​ការ​ខ្វះ​ជំនឿ ឬ​មក​ពី​សាតាំង។
គាត់​អះអាង​ថា ព្រះ​មាន​បន្ទូល​នឹង​គាត់​ផ្ទាល់។

ពួកគេ​ខ្លះ​អះអាង​ថា គេ​មាន​អំណាច​ក្នុង​ការ​ប្រោស​ឲ្យ​ជា​ ប៉ុន្តែ​ពួក​គេ​មិន​ចូល​មន្ទីរ​ពេទ្យ​ដើម្បី​ទៅ​ប្រោស​អ្នកជំងឺ​នៅ​ទី​នោះ​ទេ។ ផ្ទុយ​ទៅ​វិញ ​ពួក​គេ​ប្រើការ​សន្យា​ប្រោស​ឲ្យ​ជា ដើម្បី​ទទួល​បាន​ដង្វាយ​បន្ថែម​ពី​អស់​អ្នក​ដែល​ស្តាប់​តាម​គេ។