Скачать или смотреть အပြောင်းအလဲများလွန်းတဲ့ ကရင်နီပြည်စစ်ရေး | People's Spring

အပြောင်းအလဲများလွန်းတဲ့ ကရင်နီပြည်စစ်ရေး

ရဲခေါင်/ People's Spring

ကရင်နီပြည်ရဲ့ စစ်ရေးအခြေအနေတွေဟာ ဇူလိုင်လဆန်းမှာ သတင်းအဆက်ပြတ်နေသူတွေအတွက်ဆိုရင် အံသြသင့် မင်တက်စရာ အခြေအနေတွေ ရက်ပိုင်းအတွင်းပေါ်ပေါက်ခဲ့ပါတယ် ။

စစ်ကောင်စီဟာ တစ်နှစ်ခွဲကျော်လက်လွတ်ဆုံးရှုံးခဲ့ရတဲ့ မိုးဗြဲမြို့ကို ၇ လကျော် အပြင်းအထန်ထိုးစစ်ဆင်ပြီးနောက်မှာ ပြန်လည်ထိန်းချုပ်နိုင်ခဲ့ပါတယ် ။ ကရင်နီ တပ်ပေါင်းစုအတွက် မိုးဗြဲမြို့ကို လက်လွှတ်လိုက်ရပေမယ့် တစ်နှစ်ကျော်ကြာထိုးစစ်ဆင်နေတဲ့ ဖားဆောင်းမြို့က စစ်တပ်ရဲ့ တပ်ရင်းဌာနချုပ် နှစ်ခုကို လက်စသတ်သိမ်းပိုက်ဖို့ အလွန်နီးစပ်လာခဲ့သလို ဖားဆောင်းတိုက်ပွဲမှာ စစ်တပ်ရဲ့ တိုက်လေယာဉ် တစ်စီးကိုပါပစ်ချနိုင်ခဲ့ပါတယ် ။

●မိုးဗြဲမြို့ကို စစ်ကောင်စီပြန်ထိန်းချုပ်

ကရင်နီတပ်ပေါင်းစုက တစ်နှစ်ခွဲကျော်ကြာ ထိန်း ချုပ်ထားတဲ့ မိုးဗြဲ မြို့ကို စစ်ကောင်စီက ဇူလိုင်လ ဆန်းပိုင်းက ပြန်လည်စိုးမိုးသွားပြီလို့ မြေပြင်ရဲ ဘော်တွေနဲ့ တပ်ဖွဲ့တာဝန်ရှိသူတွေက ပြောပါတယ်။

ဒါပေမယ့် မိုးဗြဲ မြို့ကို စစ်ကောင်စီက အလုံးစုံထိန်းချုပ်နိုင်တာမျိုးမဟုတ်သေးဘဲ မြို့လမ်းမကြီးနဲ့ လမ်းမကြီး အထက်ပိုင်းက မြို့ပေါ်ရပ်ကွက်တွေကို စွန့်လွှတ် ခဲ့ရတာလို့ တော်လှန်ရေးတပ်ဖွဲ့ဝင်တွေကပြောပါတယ်။

ဒါအပြင်မိုးဗြဲကနေ လွိုင်ကော်ဘက်ကို စစ်ကောင်စီက ဆက်လက်ထိုးဖောက်ဖို့ ကြိုးစားနေတာကြောင့် တိုက်ပွဲတွေဆက်ဖြစ်နေသေးတယ်လို့ သိရပါတယ်။

ရှမ်းပြည်နယ်တောင်ပိုင်းကနေ ကရင်နီပြည်နယ် ရဲ့ ဝင်ပေါက်ဖြစ်တဲ့ မိုးဗြဲမြို့ ရဲ့မြို့ပေါ်ရပ်ကွက်တွေကို စစ်တပ်ကထိုးဖောက်ဝင်ရောက်တပ်စွဲနိုင်ခဲ့တာကို ကရင်နီအမျိုးသားများကာကွယ်ရေးတပ် KNDF ၏ပြောရေးဆိုခွင့်ရှိသူ သာအယ်စိုးကအတည်ပြုပါတယ် ။

စစ်ကောင်စီသည် မိုးဗြဲ မြို့ကို အလုံးစုံ ပြန်ထိန်း ချုပ်နိုင်ဖို့ မြေပြင်စစ်သား တစ်ထောင်ကျော်သုံးခဲ့သလို ၊မစ်ဇိုင်းဒုံးတွေ ၊လက်နက်ကြီးတွေ ၊ လေကြောင်းကနေ အပြင်းအထန် ပစ်ခတ် ဗုံးကြဲခဲ့တာပါ ။ အများစုက စစ်မှုထမ်းဆင်းစစ်သားသစ်တွေဖြစ်လို ၊စစ်တပ်လက်အောက်ခံ PNO ပြည်သူ့စစ်တွေလည်းပါဝင်ပါတယ် ။

"သူတို့တပ်စခန်း(ခမရ ၄၂၂)ကနေ လမ်းမကြီးအပေါ်ဘက်ပေါ့။မိုးဗြဲကနေလွတ်လွတ်ကျွတ်ကျွတ်ဖောက်ထွက်နိုင်ဖို့တောင်သူတို့မလုပ်နိုင်သေးပါဘူး။လွိုင်ကော်ရောက်ဖို့လည်းနောက်ထပ်အတားဆီးတွေအများကြီးရှိပါသေးတယ်"လို့ မိုးဗြဲမြို့တွင်ရှိနေသည့် မြေပြင်ရဲဘော်တစ်ဦးက People's Springကို ပြောပါတယ်။

စစ်ကောင်စီ ရဲ့ မိုးဗြဲတန်ပြန်ထိုးစစ်မှာ စစ်သားရာနှင့်ချီသေဆုံးခဲ့သလို ကရင်နီပူးပေါင်းတပ်များ ဘက်မှလည်း တပ်ဖွဲ့ဝင် လေးဆယ် ဝန်းကျင်ကျဆုံးခဲတယ်လို့ တော်လှန်ရေးတပ်ဖွဲ့ဝင်တွေကပြောပါတယ် ။

လူဦးရေ နှစ်သောင်းကျော်နေထိုင်ခဲ့တဲ့ မိုးဗြဲ မြို့ဟာ စစ်အုပ်စုရဲ့ အုပ်ချုပ်ရေး ယန္တရားအခြေစိုက်ရာ နေပြည်တော်ကို နာရီပိုင်းနှင့် ရောက်နိုင်တဲ့ပင်လောင်း-ဖယ်ခုံ -(မိုးဗြဲ)-လွိုင်ကော် လမ်းပိုင်းပေါ်မှာတည်ရှိပါတယ် ။ ဒါကြောင့်စစ်ကောင်စီဟာ ပြည်နယ်မြို့တော် မိုးဗြဲမြို့ကိုတိုက်ရိုက်ခြိမ်းခြောက်မှု မခံရစေဖို့ရယ် ၊နေပြည်တော်ကို ခြိမ်းခြောက်ခံနေရမှု ကာကွယ်နိုင်ဖို့ မိုးဗြဲကို အပြင်းအထန်ထိုးစစ်ဆင်တိုက်ခိုက်ခဲ့တာဖြစ်ပါတယ် ။

ဒါကြောင့် စစ်ကောင်စီ နဲ့ စစ်တပ်ထောက်ခံသူတွေက မိုးဗြဲ ကို ပြန်ထိန်းချုပ်နိုင်တဲ့အတွက် အောင်ပွဲခံစရာ ၊အားတက်စရာဖြစ်ခဲ့ပါတယ်။ စစ်ကောင်စီ အတွက် ၁၀၂၇ ဒုတိယပိုင်း နောက်ပိုင်းဆုံးရှုံးခဲ့ရတဲ့ ဘယ်မြို့ကိုမှ ထိုးစစ်ဆင်ပြီး မသိမ်းပိုက်နိုင်ခဲ့တာကနေ တစ်နှစ်ကျော်အတွင်း ပထမဆုံးမြို့ကို ပြန်သိမ်း နိုင်ခဲ့တာဖြစ်ပါတယ် ။

ဒေသခံပြည်သူတွေကတော့ စစ်ဘေးတိမ်းရှောင်နေကြတာပဲဖြစ်ပါတယ် ။

တော်လှန်ရေးတပ်တွေအတွက်မြို့ပေါင်း ၉၅ မြို့သိမ်းပိုက်ထားနိုင်တာကနေ မြို့ ၁ မြို့ လက်လွှတ်ဆုံးရှုံးခဲ့ရတာဖြစ်ပါတယ် ။ ကရင်နီတော်လှန်ရေး တပ်တွေက မိုးဗြဲမြို့ကိုပြန်ထိန်းချုပ်နိုင်ဖို့ ထပ်ကြိုးစားကြမယ်လို့ ပြောကြပါတယ် ။

မိုးဗြဲမြို့ကို တန်ပြန်ထိုးစစ်ဆင်လာတဲ့ စစ်ကောင်စီတပ်ကို ရှမ်းတောင်-ကယား(ကရင်နီ)တပ်ပေါင်းစုဖြစ်တဲ့ KNDF ၊ PDF ၊ Local PDF ၊KPLA စတဲ့တော်လှန်ရေးတပ်တွေက ခုခံတိုက်ခိုက်ခဲ့ကြတာဖြစ်ပါတယ် ။

●ဖားဆောင်းမြို့တိုက်ပွဲ

တစ်ဖက်မှာလည်း ပြည်နယ်ရဲ့ တောင်ဘက် ခြမ်းက ဖားဆောင်းမြို့နယ်ကို သိမ်းနိုင်ဖို့ ကရင်နီတပ်ပေါင်းစုရဲ့လက် တစ်ကမ်းအကွာကို ရောက်လို့နေပါတယ်။

ဖားဆောင်းမြို့နယ်က စစ်ကောင်စီရဲ့ လက်ကျန်တပ်တွေဖြစ်တဲ့ အမှတ်(၁၃၄) ခြေလျင်တပ်ရင်း( ခလရ ၁၃၄ )နှင့် ခလရ-၁၃၅ တပ်ရင်း နှစ်ရင်းကိုဇွန်လ ၂၅ ရက်ကစလို့ ထိုးစစ်ဆင်ခဲ့တယ်လို့ ကရင်နီတပ်ပေါင်းစုံစစ်ဦးစီးအဖွဲ့ -JCS က ထုတ်ပြန်ပါတယ်။

ထိုးစစ် ခြောက်ရက်မြောက်နေ့(ဇွန်လ ၃၀ ရက်) က ခလရ ၁၃၄ ကို သိမ်းနိုင်ခဲ့ပြီး ဟောင်ဝစ်ဇာတွေ ၁၂၀ မမ တွေ နဲ့ လက်နက်ငယ် ရာနဲ့ချီ ပါ ရရှိခဲ့တဲ့ အပြင် စစ်သုံ့ပန်း တွေ ပါဖမ်းဆီးရမိတာရှိပါတယ်။

အဲဒါအပြင် ဖားဆောင်းမြို့မကျရေး လေကြောင်းက နေပစ်ကူနေတဲ့ စစ်ကောင်စီလေယောဉ်တစ်စီး ကိုပါ ကရင်နီတပ်ပေါင်းစုက ပစ်ချနိုင်ခဲ့တယ်လို့ JCS က ဆိုပါတယ်။

ဇူလိုင်လ ၂ ရက် နံနက် ၁ နာရီက ဖားဆောင်းမြို့ တိုက်ပွဲကို ဗုံးကြဲတိုက်ခိုက်ဖို့လာတဲ့ စစ်ကောင်စီရဲ့ တရုတ်နိုင်ငံထုတ် ဂျက်လေယာဉ် ၄ စီးထဲက တရုတ်နိုင်ငံထုတ် FTC 2000 G တိုက်လေယာဉ်တစ်စီးကို ပစ်ချနိုင်ခဲ့တာလို့ဆိုပါတယ်။

နွေဦးတော်လှန်ရေးမှာ တော်လှန်ရေးတပ်တွေက စစ်တပ်ရဲ့ တိုက်လေယာဉ်၊ ရဟတ်ယာဉ် အနည်းဆုံး ၁၃ စီးကို ပစ်ချထားပါတယ်။ ကရင်နီတပ်ပေါင်းစုကပဲ ၄ စီးပစ်ချနိုင်ခဲ့ပါတယ် ။ထူးခြားတာက ၄ စင်းမှာ ၃ စင်းက တိုက်လေယာဉ်ဖြစ်နေတာပါ။

ဒါကြောင့်မုတ်သုံကာလဖြစ်ပေမယ့် ကရင်နီပြည်မှာ ခုခံတော်လှန်တိုက်ပွဲတွေက ပိုပြင်းထန်လာဖို့ရှိနေတယ်လို့စစ်ရေးလေ့လာသူတွေကပြောပါတယ်။ ။


#ludunwayoo #လူထုနွေဦး #NewsUpdate

𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴
𝗬𝗼𝘂𝗧𝘂𝗯𝗲 -    / @peoplespring  
𝗙𝗮𝗰𝗲𝗯𝗼𝗼𝗸 -   / ludunwayoo  
𝗪𝗲𝗯𝘀𝗶𝘁𝗲 - https://www.ludunwayoo.com/
𝗜𝗻𝘀𝘁𝗮𝗴𝗿𝗮𝗺 -   / ludunwayoo  
𝗧𝗲𝗹𝗲𝗴𝗿𝗮𝗺 - https://t.me/peoplespring