جبتلكم الورشة اللي كامل تحوسو عليها مخبز روايال بالجوز واللوز

🔴 بالنسبة للمكسرات عندي 160غ لوز بالقشور + 160غ جوز مجموع عندنا 320g
طريقة رحي ( طحن ) نفسها تاع لوز لي خدمنا بيه دزيريات و مقروظ لوز يعني يتحمصو على بياض مالازمش يتحمرو يسخنو و نرحيوهم و هما سخونين باش ميتعجنوش و مايطلقوش زيت تاعهم .
🔴بالنسبة لطياب كيما مقررظ لوز 150°- 160° لمدة من 8د - 10د جوست ينشف البيض و نتحصلو على الاحمرار خفيف من تحت 60%من نجاح مخبز ولا مقروط لوز طيابو يلعب دوررر كبير . الفرن تاعكم مالازمش يكون سخون باسكو رايح يتلهف معكم ف طياب يسبق يتحمر من تحت و هو الداخل مازال مانشفش و مالازمش يكون الفرن ناقص باسكو رايح يطول معكم و ينشف الداخل automatiquement يجيكم معجن و يابس .
🔴 مخبز جوز و لوز مايجيش معه قشور ليمون يجي بذوق فانيليا و يجي بزاففف بنين même طلية تاعو و ماتجيش بذوق ليمون يا إما ذوق فانيليا و ماء زهر ولا ذوق نيسكافي.