ဒေါက်တာဇော်မြင့်မောင်ရဲ့ နောက်ဆုံးခရီးကို ဂါရဝ ပြုနှုတ်ဆက်တဲ့ မန္တလေးလူထု | People's Spring

ဒေါက်တာဇော်မြင့်မောင်ရဲ့ နောက်ဆုံးခရီးကို ဂါရဝ ပြုနှုတ်ဆက်တဲ့ မန္တလေးလူထု

People's Spring

အမျိုးသားဒီမိုကရေစီအဖွဲ့ချုပ် (NLD ) ပါတီ ဒုတိယ ဥက္ကဋ္ဌ ဖြစ်သူ မန္တလေးတိုင်း ဝန်ကြီးချုပ် ဒေါက်တာဇော်မြင့်မောင်ရဲ့ နာရေးကို ဒီနေ့ ပြုလုပ်ရာ မန္တလေးမြို့လုံးကျွတ်လိုက်ပါပို့ဆောင်ကြတာတွေ့ရပါတယ်။

မန္တလေးမှာ စစ်ကောင်စီတပ်ရဲ့ ရက်စက်ကြုမ်းကြုတ် ဖိနှိပ်မှုတွေကြားကနေ ပြည်သူလူထုဟာ သူတို့ ချစ်ခင်လေးစားရတဲ့ ဒေါက်တာဇော်မြင့်မောင်ရဲ့ နောက်ဆုံးခရီးကို လိုက်ပါပို့ဆောင် ဂါရဝပြုကြတာပါ။

နာရေးယာဉ်တန်း နေအိမ်ကနေ တောင်အင်းမြောက်အင်းသုဿန် ဆီ စတင်ထွက် ခွာရာ လမ်းတလျောက်မှာ ဆိုင်ကယ်တွေ၊ ကားတွေ​၊ စက်ဘီးတွေ နဲ့ ထောင်သောင်းချီတဲ့ မန္တလေးမြို့ ပြည်သူလူထုက လိုက်ပါပို့ဆောင်ကြတာတွေ့ရပါတယ်။

လမ်းတလျှောက်မှာလည်း လမ်းဘေး ဝဲညာ တလျောက်မှာ နာရေးယာဉ်တန်းကို စောင့်ဆိုင်းပြီး ဒေါက်တာဇော်မြင့်မောင်ကို စောင့်ကြို ဂါရဝပြုနှုတ်ကြတဲ့ လူထုကလည်းဒုနဲ့ဒေးရှိပါတယ်။

နာရေးယာဉ်တန်းဖြတ်သွားချိန်မှာ " ဆရာဇော်ကို နှုတ်ဆက်ပါတယ်။ဆရာဇော်ကို နှုတ်ဆက်ပါတယ်" လို့ မြို့ခံလူထုက နှမြောတမ်းတ စွာနဲ့ နှုတ်ဆက်ကြပါတယ်။

နာရေးယာဉ်တန်းမှာတင် လွမ်းသူပန်းခွေ သယ်ဆောင်ကား ၁၀ ထက်မနည်းပါပြီး အဲဒီနောက်မှာတော့ မျက်စိတဆုံးရှည်လျားတဲ့ လိုက်ပါပို့ဆောင်သူတွေကို တွေ့ရပါတယ်။

နာရေးပြုလုပ်မယ့် အမရပူရမြို့ ၊တောင်အင်းမြောက်အင်းသုသာန်မှာလည်း စောင့်ဆိုင်းနေကြတဲ့ လူထုအင်မတန်များပြားတာကြောင့် တိုးမပေါက် အောင် ဖြစ်နေတယ်လို့ နာရေးလိုက်ပါပို့ဆောင်ပေးတဲ့ မြို့ခံလူငယ်တစ်ဦးကပြောပါတယ်။

အခုလို မန္တလေးမှာ လူထုစုဝေးမှုဟာ စစ်တပ်အာဏာသိမ်းပြီးနောက် ပထမဆုံးအကြိမ် အင်နဲ့အားနဲ့ စုစည်းကြတာလည်းဖြစ်ပါတယ်။

စစ်ကောင်စီကလည်း လုံခြုံရေးကို ယူနီဖောင်းနဲ့ရော၊အရပ်ဝတ်နဲ့ပါ ချထားတွေ့ရတယ်လို့ အဲဒီလူငယ်က အသိပေးပါတယ်။

အသက် ၇၃ နှစ်အရွယ် သွေးကင်ဆာ ဝေဒနာသည် ဒေါက်တာဇော်မြင့်မောင်ကို စစ်တပ်အာဏာသိမ်းတဲ့ ၂၀၂၁ ခုနှစ် ဖေဖော်ဝါရီ ၁ ရက်ကတည်းက စစ်တပ်က ဖမ်းဆီးခဲ့တာပါ။

အဲဒီနောက် ပုဒ်မပေါင်းများစွာနဲ့ ထောင်ဒဏ် ၂၉ နှစ်ချပါတယ်။

ဒေါက်တာဇော်မြင့်မောင် အခုလို ရောဂါကျွမ်းပြီး ဆုံးပါးရတာဟာ ထောင်တွင်းမှာ ရောဂါဝေဒနာနဲ့ကိုက်ညီတဲ့ ကျန်းမာရေးစောင့်ရှောက်မှု မရတာကြောင့်လို့ စစ်ကောင်စီကို NLD ပါတီ၊ NUG အစိုးရနဲ့ နိုင်ငံတကာ သံရုံးတွေက ပြစ်တင်ထားပါတယ်။

ထောင်တွင်းမှာ ကျန်းမာရေးဆိုးရွားပြီးနောက် မန္တလေးဆေးရုံကြီး အထူးကြပ်မတ်ကုသဆောင်မှာ တက်ရောက်ကုသရာ အောက်တိုဘာလ ၇ ရက်မနက် ၃နာရီမှာ ဒေါက်တာဇော်မြင့်မောင် ဆုံးပါးသွားတာပါ။

စစ်ကောင်စီဟာ ဒေါက်တာဇော်မြင့်မောင်ရဲ့ နောက်ဆုံးအချိန်ရောက်မှ လွတ်ငြိမ်းခွင့်ပေးစာကို ဆေးရုံမှာ လာရောက်ဖတ်ပြခဲ့ပါတယ်။

မကွယ်လွန်မီ နာရီပိုင်းအလိုမှ လွတ်ငြိမ်းသက်သာခွင့်ပေးတဲ့လုပ်ရပ်ဟာ စစ်မှန်တဲ့ သနားကြင်နာမှုမဟုတ်ဘူးလို့ ဉရောပသမဂ္ဂ က ထုတ်ပြန်ပါတယ်။

= = =

#ludunwayoo #လူထုနွေဦး #NewsUpdate

𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴
𝗬𝗼𝘂𝗧𝘂𝗯𝗲 -    / @peoplespring  
𝗙𝗮𝗰𝗲𝗯𝗼𝗼𝗸 -   / ludunwayoo  
𝗪𝗲𝗯𝘀𝗶𝘁𝗲 - https://www.ludunwayoo.com/
𝗜𝗻𝘀𝘁𝗮𝗴𝗿𝗮𝗺 -   / ludunwayoo  
𝗧𝗲𝗹𝗲𝗴𝗿𝗮𝗺 - https://t.me/peoplespring