Mien Sermon by Yauzsing: Njoux En (Soteriology) 7-22-12

Mbuo oix juangc jienv hoqc Hiuv Tin-Hungh fai Sienx Fim Nyei Gorn Ndoqv (Janx nyei waac heuc Theology, janx Gikc waac gorngv Theo-Tin-Hungh Logos-waac fai za'eix) Mbuo oix juangc jienv hoqc taux camv nyungc sienx Tin-Hungh mienh nyei gorn ndoqv (Singx Diex, Singx Dorn, Singx Lingh, Fin-mienh, Mienv/Saadaan, Mienv, Njoux en, Zuiz, Baamh Mienh, Jiu-Bang, caux Ga'haav Hingv nyei sic). Mbuo hoqc taux mbuo sienx nyei gorn ndoqv fai Tin-Hungh (Theology) weic zuqc Tin-Hungh heuc mbuo hoqc hiuv Ninh (Singx Nzung 46:10), Weic zuqc Ninh se nduqc dauh Zien Ziouv, yaac weic mbuo nyei hnyouv oix hiuv duqv Tin-Hungh. Hoqc hiuv Tin-Hungh se baamh mienh nyei domh gong yaac benx jaaix-jiex nyei gong (Yo^han 17:3; Ye^li^mi 9:23-24; Ho^se^yaa 6:6). Weic Tin-Hungh zeix mbuo daaih maaih Ninh nyei fangx zeiv (Tin deic douh 1:27) mbuo jaa hoqc hiuv Tin-Hungh ziouc jaa hiuv ganh. Hoqc hiuv mbuo sienx nyei gorn ndoqv fai Tin-Hungh ziouc bun mbuo gauh haih ziangh duqv horpc caux doix-dangc nyei maengc, mbuo hnangv haaix nor hiuv fai buatc Tin-Hungh mbuo ziouc hnangv wuov nor buoqc zangc Ninh. Hiuv mbuo sienx nyei gorn ndoqv bun mbuo maaih hnyouv mbuox mienh taux mbuo sienx wuov dauh Tin-Hungh, maaih hnyouv zoux cing-nzengc, ziouc gauh haih ziangh ei jienv Ziouv nyei waac. Mbuo maiv haih hiuv duqv nyungc-nyungc taux Tin-Hungh, mv baac dongh Ninh laauc yaangh mbuox mbuo taux Ninh ganh nyei, mbuo oix zuqc hoqc, bun mbuo haih hiuv, ziouc haih hnamv Tin-Hungh.

Ih hnoi mbuo oix juangc jienv hoqc taux janx Meiv Guoqv waac heuc Soteriology, waac nyei gorn yiem Janx Gikc waac heuc Soteria caux Logos maaih eix-leiz yiem Mienh waac gorngv "Za'eix fai hoqc Njoux En nyei gorn ndoqv". Naaiv se benx da'cietv ginc yiem Hiuv Tin-Hungh fai Sienx Fim Nyei Gorn Ndoqv nyei domh Hoc-dauh. Ging-sou mengh nyei gorngv mbuo duqv njoux se weic Tin-Hungh nyei en. Kungx Tin-Hungh (Diex, Dorn, caux Singx Lingh) haih njoux baamh mienh (Yo^naa 2:9 gorngv kungx Ziouv hnangv haih njoux maengc) Yiem E^fe^so 2:8 gorngv "Meih mbuo duqv njoux se weic Tin-Hungh nyei en, weic zuqc meih mbuo sienx kaux Ninh. Se maiv zeiz meih mbuo ganh zoux nyei, se Tin-Hungh ceix bun nyei zingh nyeic." Mbuo oix juangc jienv hoqc taux njoux en nyei eix-leiz, njoux en nyei jauv, njuox en nyei yietc nyeic, caux njoux en nyei fuqv. Mbuo za'gengh laengz zingh Tin-Hungh weic ninh hlo haic nyei en bun njiec taux mbuo, njoux mbuo yiem mienv yiem zuiz cuotv daaih bun mbuo duqv benx Tin-Hungh nyei mienh yaac duqv bieqc Tin-Dorngh nyei guoqv.

For additional resources go to/Maaih zunh doz/nzung yiem:
http://www.cpccredding.org/media.php?...
http://yauzsing.wordpress.com/