စုဖုရားလတ်စံအိမ်နဲ့စိတ်ဝင်စားစရာ ကိုယ့်မင်းကိုယ်ချင်းလမ်းတဝိုက်မှာ

ဝင်စတန်ချာချီ၏ဖခင် ဗြိတိသျှနိုင်ငံရေးသမား Lord Randolph Churchill အားရည်ညွှန်းမှည့်ခေါ်ခဲ့သည့်လမ်းဖြစ်ပါတယ်။ နောင် ကိုယ့်မင်းကိုယ့်ချင်းလမ်းဟုပြောင်းလဲခေါ်တွင်ကာ ယနေ့ခေတ်မှာတော့ ကမ္ဘာအေးဘုရားလမ်းဟု တွင်​လေသည်။ ယခု ကိုယ့်မင်းကိုယ့်ချင်းရိပ်သာလမ်းလို့ခေါ်တဲ့ လမ်းသွယ်လေးကိုခေါ်သည်ဟု အရင်ကအထင်ရောက်ခဲ့ဖူးတယ်။ နောက်မှ ရွှေဂုံတိုင်မီးပွိုင့်မှ A bank ရှိရာ ကမ္ဘာအေးဘုရားလမ်းတကြောကို ကိုယ့်မင်းကိုယ်ချင်းလမ်းဟု ခေါ်ခဲ့မှန်းနားလည်ရသည်။ ကိုယ့်မင်းကိုယ့်ချင်းလမ်းဟုဆိုလျှင် ကျွန်တော်တို့နဲ့အရင်းနှီးဆုံးအကြောင်းအရာက မိဖုရားကြီးစုဖုရားလတ် အိန္ဒိယမှမြန်မာနိုင်ငံသို့ ပြည်တော်ပြန်ခွင့်ရစဥ်က ကွယ်လွန်ချိန်ထိ သူမနေထိုင်သွားသည့်အိမ်ရှိရာလမ်း ဟူ၍ပင်ဖြစ်သည်။ ထိုနားမှာပင် ယနေ့ထိအထင်ကရရှိနေပေမယ့် အမှတ်မဲ့ဖြစ်နေမိတဲ့ အဆောက်အဦးအကြောင်းကိုတော့ သိပ်မပြောဖြစ်ကြ။ ထိုအဆောက်အဦးမှာ ရေခဲဆိုင်မှတ်တိုင်နှင့်ကပ်လျက် ရွှေတိဂုံဘုရားအရှေ့ဘက်မုခ်ရှိရာ ကြားတောရလမ်းထိပ်အနီးတွင်ပင်ရှိသည်။ ကျွန်တော်တို့ငယ်စဥ်ကတော့ ပန်းချီပန်းပုကျောင်းဟုသိကြသော အဆောက်အဦးဖြစ်လေသည်။