萬千星輝頒獎典禮 | 頒獎嘉賓妙語連珠 林敏驄：新節目叫『中年邵音音』三料視后佘詩曼「吹雞」呼召張智霖出場成彩蛋

萬千星輝頒獎典禮頒獎嘉賓同樣星光熠熠，嘉賓們更妙語連珠.....
譚耀文&姜浩文頒發最佳女配角獎，譚耀文：「我曾經都係親生仔嚟㗎！」姜浩文：「曾生(曾志偉)講㗎嘛，話呢幾年嘅頒獎禮都搵我哋頒獎，仲話每頒一個獎拍一套劇，冇同你講咩？」譚耀文：「冇喎，拍兩部喎我！再加埋中年好聲音！」
胡楓拍住林明禎頒馬來西亞獎，
胡楓問林明禎：「你想唔想嚟TVB拍劇?」林：「同你一齊？」胡：「係呀我做你爺爺。」林：「梗係唔好啦！你做我男朋友好啲！」胡：「我諗全世界嘅人反對係我一個贊成。快啲同高層講呀！」
林敏驄&江美儀頒發最佳綜藝節目獎，一上台林敏驄已經搞搞震：「頭先跳舞（亞洲超星團）嗰班同你好襯。」江：「邊方面？」林：「都係白衫白褲、個妝好似殭屍。」然後又將《隱形戰隊》講「隱形照隊」，江美儀叫他中文講好少少：「係《隱形戰隊》」。之後阿驄繼續說：「綜藝節目啱你（江美儀），你贏晒獎都冇嘢撈，你平時都『中下中下』，綜藝唔係咁玩㗎，綜藝節目主持人一定要大方﹑有台型﹑壓得住場，好似Do姐（鄭裕玲）響邊度？」江：「走咗啦﹗」林：「咁快開始炒人？」江：「炒咗好耐㗎喇。」林：「余詠珊呢？」江：「吓，走咗好多年喇喎。」林：「咁大鑊？哎唷陰公囉！」阿驄：「咁快落下一段？有邊個唔講得？」江：「總經理就真係唔講得！」林：「總經理點會唔講得！總經理有另一個身份係我嘅臥底！自從佢搵完我之後，出面啲戲搵親我都係做主角！」林：「我哋下季會有個新節目叫『中年邵音音』，講邵音音平時生活及舉動，應該幾香艷下。」
「回巢」頒獎嘉賓的還有羅嘉良&林保怡，羅嘉良：「觀眾經常都叫我哋劇中嘅名，我計過百份之33叫我在創世紀『葉榮添』個名；仲有百份之28講『大頭文』；百份之30講『李奇』！淨返百份之9先會叫我羅嘉良或者『撈家』。」
「最佳電視歌曲」獎由何超儀及布志綸頒發。何超儀笑言家姐何超瓊「有錢出錢，我哋有力出力」，而布志綸就問道為何會揀中自己一起頒獎，何超儀就答道：「因為我有同TVB講過呢，想佢幫我搵一個又高大又唱得又靚仔嘅人幫我頒獎，點知佢話唔識啲咁嘅人，叫我搵，咁我自己識嘅又高大又靚仔又好聲嘅得你一個布志綸。」不過布志綸就隨即反問：「我真係唔知你識咩朋友，不如我介紹我啲朋友畀你識呀。」
「蝦仔爹地」組合盧海鵬、賈思樂、「三嫂」戚美珍齊齊頒發「最佳男主持」獎及「最佳女主持」獎，盧海鵬：「盧海鵬試咪，大家都要食雞！」
壓軸頒獎嘉賓由三料視后佘詩曼「吹雞」呼召「老拍檔」張智霖出場成為全晚彩蛋。