ترانا عتيبة كان جاء فالعلوم علوم - عيضه الثبيتي & شبل الدواسر 2024

كلمات : عيضه الثبيتي
أداء : شبل الدواسر


فهقت الشماغ وفارق العين حلو النوم
وليلي سرى و الصبح مادوني و دونه

مسافة ثلاث ايام يمكن تجي في يوم
على اللّي لا مال أمبيره اْيعد طبلونه

توكلّت بك يارب ياحي ياقيوم
يطُول الطريق ويصبح الصعب ياهونه

بروق السحاب تلوح وغيوم سد غيوم
سحابٍ تقول يصافح الارض بمزونه

احب المطر و الطير لامن كسر بالحوم
لو الطير بعض احيان تجرحني لحونه

لا قام الحمام ينوح زاد الهموم هموم
جريح المحبه والهوى لا تلومونه

ولا يجبر الخاطر رفيقٍ ردي عزوم
حزام الظهر ياجعل الانذال يفدونه

ياطيب الرفيق الوافي الطيّب الشغموم
ماهمّه لو رقبته على الموت مرهونه

رفيق السعد في كل ماقف عداه اللّوم
يبى ونعم والدنيا ولا شي فعيونه

والانسان يرضى بالمقدّر و بالمقسوم
ياسبحان من نمشي بـ أمر كافه ونونه

عليّ الطلاق إن الكفو يامر ومخدوم
ويفرحني اليا اوحيت دقّة تليفونه

يارايد بن سليمان فالموعد المرسوم
تبا النار تالع و السماء يختلف لونه

تراحيب ممزوجه من الورد و اليشموم
وعودٍ يفوح ومضْيفٍ ماكبر صحونه

هذا الليله اْتقول الفخر للحفل معزوم
مقامٍ ضيوفه بالتراحيب ممنونه

ولا هي غريبه وانت من ذخر روس القوم
وابوك الكريم اللي بفعله يعدّونه

سليمان بن ظيف الله الوافي الزيزوم
عزيز الجناب وعزّة الراس بمتونه

لا منك نخيته ماتحرّا لـ تكفى قوم
على ازهل وتبشر عِدْ حاجتك مضمونه

محله من وجيه العرب مصطك ومزحوم
ومن كثر طيبه واسم العود بركونه

عوايد ذوي عالي ليا صار دق خشوم
يعوّد شباب الشايب اللي على شونه

مطانيخ روس وسلمهم يذبحون (الكُوم)
ومنهو نصاهم يبشر بعزه وعونه

لا غلي الشحم من طيبهم يفرقون السوم
يحدّون راع السوم يرتد عربونه


على العز ياعتيبه
على العز ياعتيبه

ترانا عتيبه كان جاء فالعلوم علوم
نعسف الصعاب وسبّق الخيل معنونه

خوال الرسول ونصرة الخايف المظلوم
الافعال والامجاد بالعز مقرونه

ياكبر السماء كبراه ونجوم سد نجوم
ولا اكبر منه غير اسمنا اللي تعرفونه

لو انّي بغنّي وافتخر كل ليل ويوم
ماوفيّت ربعي رُبع مايستحقونه