Скачать или смотреть ថ្ងៃទី៩ មិថុនា៖ ការអធិស្ឋាន គឺសម្រាប់មនុស្សមានបាប

ថ្ងៃទី៩ មិថុនា៖ ការអធិស្ឋាន គឺសម្រាប់មនុស្សមានបាប
------------------------------------------------
“ព្រះអម្ចាស់អើយ សូមទ្រង់បង្រៀនយើងខ្ញុំ ឲ្យចេះអធិស្ឋានផង”(លូកា ១១:១)
ព្រះទ្រង់ឆ្លើយតបការអធិស្ឋានរបស់មនុស្សមានបាប គឺមិនមែនមនុស្សល្អឥតខ្ចោះនោះទេ។ អ្នកអាចប្រែក្លាយជាជនពិការទាំងស្រុង នៅក្នុងការអធិស្ឋាន បើអ្នកមិនបានផ្ដោតចិត្តទៅលើឈើឆ្កាង ហើយមិនដឹងអំពីបញ្ហានេះ។
ខ្ញុំអាចបកស្រាយអំពីរឿងនេះ ផ្អែកទៅលើបទគម្ពីរសញ្ញាចាស់ ដែលបានចែងថា ព្រះទ្រង់ស្តាប់ឮសម្លេងយំរបស់រាស្រ្តព្រះអង្គ ដែលបាបរបស់ពួកគេបានបណ្តាលឲ្យពួកគេមានបញ្ហា បានជាពួកគេស្រែករកការជួយរំដោះ(ឧទាហរណ៍ ទំនុកដំកើង ៣៨:៤,១៥ ៤០:១២-១៣ ១០៧:១១-១៣)។ តែខ្ញុំសូមធ្វើការបង្ហាញ ផ្អែកទៅលើបទគម្ពីរលូកា ជំពូក១១ តាមរបៀបពីរយ៉ាង :
នៅក្នុងសេចក្តីអធិស្ឋានរបស់ព្រះអម្ចាស់(លូកា ១១:២-៤) ព្រះយេស៊ូវមានបន្ទូលថា “កាលណាអ្នករាល់គ្នាអធិស្ឋាន នោះត្រូវថា…” ហើយបន្ទាប់មក ក្នុងខ.៤ ព្រះអង្គបានរាប់បញ្ចូលការទូលសូមថា “សូមអត់ទោសបាបយើងខ្ញុំ”។ ដូចនេះ បើអ្នកតភ្ជាប់ចំណុចចាប់ផ្តើមនៃសេចក្តីអធិស្ឋាននេះ ជាមួយនឹងចំណុចកណ្តាល នោះយើងឃើញព្រះអង្គមានបន្ទូលថា “កាលណាអ្នករាល់គ្នាអធិស្ឋាន នោះត្រូវថា ... សូមអត់ទោសបាបយើងខ្ញុំ”។
បានសេចក្តីថា ការអធិស្ឋានសូមព្រះអង្គអត់ទោសបាបយើង គួរតែបានធ្វើជាផ្នែកដ៏សំខាន់នៃការអធិស្ឋានទាំងអស់របស់យើង ដូចការអធិស្ឋានថា “សូមព្រះនាមទ្រង់បរិសុទ្ធ”។ មានន័យថា ព្រះយេស៊ូវជ្រាបថា យើងចាំបាច់ត្រូវស្វែងរកការអត់ទោសបាប រៀងរាល់ពេលយើងអធិស្ឋាន។
អាចនិយាយបានម្យ៉ាងទៀតថា យើងជាមនុស្សមានបាបគ្រប់ពេល។ គ្មានអ្វីដែលល្អឥតខ្ចោះនោះទេ។ គឺដូចដែលលោកម៉ាទីន លូស័របានមានប្រសាសន៍ នៅពេលគាត់ជិតផុតដង្ហើមនៅលើគ្រែថា “យើងជាអ្នកសុំទាន។ នេះជាការពិតមែន”។ ទោះយើងបានឈានដល់កំរិតណាមួយនៃការស្តាប់បង្គាប់ មុនពេលយើងអធិស្ឋាន ក៏យើងនៅតែចូលទៅរកព្រះអម្ចាស់ ក្នុងនាមជាមនុស្សមានបាប។ ហើយព្រះទ្រង់មិនងាកព្រះភ័ក្ត្រចេញពីការអធិស្ឋានរបស់មនុស្សមានបាបឡើង ពេលណាយើងអធិស្ឋានដូចនេះ។
កន្លែងទីពីរដែលយើងអាចឃើញលក្ខណៈនៃការអធិស្ឋាននេះ គឺនៅក្នុងបទគម្ពីរ លូកា ១១:១៣ ដែលចែងថា “បើអ្នករាល់គ្នាដែលជាមនុស្សអាក្រក់ អ្នកចេះឲ្យរបស់ល្អទៅកូនយ៉ាងដូច្នេះ នោះចំណង់បើព្រះវរបិតា ដែលគង់ស្ថានសួគ៌ តើទ្រង់នឹងប្រទានព្រះវិញ្ញាណបរិសុទ្ធ មកអស់អ្នកដែលសូម ជាជាងអម្បាលម៉ានទៅទៀត”។
ត្រង់ចំណុចនេះ ព្រះយេស៊ូវបានហៅពួកសាវ័ករបស់ព្រះអង្គថា “មនុស្សអាក្រក់”។ នេះជាការប្រើពាក្យសម្ដីធ្ងន់ៗ។ ហើយព្រះអង្គមិនមានន័យថា ពួកគេបានដាច់ចេញពីព្រះអង្គ ហើយការអធិស្ឋានរបស់ពួកគេនឹងមិនទទួលការឆ្លើយតបនោះឡើយ។ ព្រះអង្គចង់មានន័យថា ដរាបណាលោកិយមានបាបនៅតែមានវត្តមាន សូម្បីតែសិស្សរបស់ព្រះអង្គ ក៏អាចមានភាពវៀចវេរ ដែលធ្វើឲ្យខូចកិច្ចការគ្រប់យ៉ាងដែលពួកគេធ្វើ តែមិនបានរារាំងពួកគេ មិនឲ្យធ្វើការល្អបានឡើយ បើពួកគេពឹងផ្អែកទៅលើព្រះគុណ និងអំណាចព្រះអង្គ។
យើងជាមនុស្សអាក្រក់ដែលព្រះអង្គបានប្រោសលោះ។ យើងយកឈ្នះសេចក្តីអាក្រក់របស់យើង បន្តិចម្តងៗ ដោយអំណាចនៃព្រះវិញ្ញាណបរិសុទ្ធ។ តែភាពពុកផុយពីកំណើតរបស់យើង មិនរលាយបាត់ទាំងស្រុង ដោយការផ្លាស់ប្តូរជំនឿនោះទេ។
យើងជាមនុស្សមានបាប ហើយយើងជាអ្នកសុំទាន។ បើយើងទទួលស្គាល់បាបនេះ ឈប់ប្រព្រឹត្តវា ជម្នះវា ហើយតោងឲ្យជាប់ឈើឆ្កាងព្រះគ្រីស្ទ ធ្វើជាក្តីសង្ឃឹមរបស់យើង នោះព្រះទ្រង់នឹងស្តាប់យើងឮ ហើយឆ្លើយតបការអធិស្ឋានរបស់យើង។
#Plovpit
#ផ្លូវពិត
#DirsiringGod
#JohnPiper
#សៀវភៅគ្រីស្ទាន
#SolidJoys