Скачать или смотреть အဆင့်တက်လာတဲ့ ယူကရိန်းစစ်ပွဲ | People's Spring

အဆင့်တက်လာတဲ့ ယူကရိန်းစစ်ပွဲ

အိမ်နီးချင်း ယူကရိန်း နိုင်ငံကို အင်အား အလုံးအရင်းနဲ့ ရုရှားတပ်တွေ ဝင်ရောက်ခဲ့တဲ့ ကျူးကျော်စစ်ပွဲဟာ အခုသီတင်းပတ်ထဲမှာ ရက်ပေါင်း ၁၀၀၀ ပြည့်မြောက်ခဲ့ပါပြီ။ နာကျင်စရာတွေ၊ ခါးသီးမှုတွေ ပြည့်နှက်နေတဲ့ ရက်ပေါင်း ၁၀၀၀ ပြည့်မြောက်တဲ့နေ့ဝန်းကျင်မှာပဲ စစ်ပွဲနဲ့ ပတ်သက်လို့ ထင်ရှားတဲ့ အရွေ့တွေ၊ ပြောင်းလဲမှု အလားအလာတွေကိုလည်း မြင်လာရပါတယ်။ နိုင်ငံတကာအရေး လေ့လာသူတွေ အဓိကထား အာရုံစိုက်နေတဲ့ အခြေအနေ တစ်ခုကတော့ နှစ်ဖက်ကြားမှာ သုံးစွဲတဲ့ စစ်လက်နက်တွေက ကနဦး ထိန်းသိမ်းထားတဲ့ ဘောင်တွေကို ကျော်ဖြတ်လာကြခြင်းပါပဲ။ ပြီးတော့ ယူကရိန်း စစ်ပွဲကို ဗဟိုပြုပြီး တတိယ ကမ္ဘာစစ်ဆိုတဲ့ ဝေါဟာရကို ရည်ညွှန်း သုံးနှုန်းမှုတွေ၊ လက်တွေ့ ချဉ်းကပ် စဉ်းစားကြတာတွေလည်း ရှိလာနေပါတယ်။

ယူကရိန်း စစ်ဦးစီးချုပ်ဟောင်း ဗယ်လာရီ ဇာလုဇ်ညီကတော့ အနောက် မဟာမိတ် နိုင်ငံတွေကို ရည်ရွယ် သတိပေးရာမှာ တတိယ ကမ္ဘာစစ်ဟာ အခုကတည်းက စတင်နေပြီလို့ မှတ်ချက်ပေးသွားခဲ့ပါတယ်။ မြောက်ကိုရီးယားလို နိုင်ငံမျိုးတွေက ရုရှားဖက်ကနေ ပေါ်ပေါ်ထင်ထင် ဝင်ရောက်ပြီး စစ်ကူပေး တိုက်ခိုက်လာတာကို ကြည့်ရင် စစ်ပွဲဟာ ရုရှားနဲ့ ယူကရိန်း နှစ်နိုင်ငံတည်းရဲ့ ကိစ္စ မဟုတ်တော့တာကို အလွယ်တကူ သိမြင်စေလိမ့်မယ်လို့ သူက ပြောပါတယ်။

၂၀၂၄ ခုနှစ်ဟာ တတိယ ကမ္ဘာစစ် စတင်တဲ့ ကာလလို့ တိတိကျကျ သတ်မှတ်လိုက်နိုင်ပြီလို့ သူထင်ကြောင်း၊ အခုအခါမှာ ယူကရိန်းဟာ ရုရှားတစ်နိုင်ငံတည်းနဲ့ တိုက်ခိုက်နေရတာ မဟုတ်သလို မြောက်ကိုရီးယားကလည်း ယူကရိန်း စစ်မြေပြင်ဆီ တပ်တွေ စေလွှတ်ထားကြောင်း၊ ဒါ့အပြင် အီရန်က ထောက်ပံ့ထားတဲ့ ဒရုန်းတွေကလည်း ရုရှားက ယူကရိန်း ပြည်သူတွေကို သတ်ဖြတ်ရာမှာ အရှက်သိက္ခာမဲ့စွာ အကူအညီ ပေးနေကြောင်း ဇာလုဇ်ညီက ပြောကြားခဲ့ပါတယ်။ သူဟာ လောလောဆယ်မှာတော့ ဗြိတိန်နိုင်ငံဆိုင်ရာ ယူကရိန်း သံအမတ်အဖြစ် တာဝန်ယူထားပါတယ်။ သူက ယူကရိန်းရဲ့ မဟာမိတ် အနောက်နိုင်ငံတွေ အနေနဲ့ ပကတိ အရှိတရားကို နားလည်လက်ခံပြီး စစ်ပွဲနဲ့ ပတ်သက်ရင် လက်တွေ့ကျကျ ပြန်သုံးသပ်သင့်ပြီလို့ တိုက်တွန်းခဲ့ပါတယ်။

ဒီနေရာမှာ ကမ္ဘာစစ်ဆိုတဲ့ ချောက်ချားစရာ ဝေါဟာရကို ခွဲခြမ်းစိတ်ဖြာကြည့်ဖို့ လိုပါတယ်။ လူ့သမိုင်းမှာ ကမ္ဘာစစ်နှစ်ကြိမ် ဖြစ်ခဲ့ပြီး သန်းနဲ့ချီ သေဆုံးခဲ့ကြပါတယ်။ ကမ္ဘာစစ် ဆိုတာဟာ နိုင်ငံနှစ်ခုကြားက တိုက်ပွဲမျိုး မဟုတ်တော့ဘဲ လက်နက်အင်အားကြီး နိုင်ငံတွေ အပြိုင်အဆိုင် မဟာမိတ်ပြုပြီး တိုက်ခိုက်ရာက ကျယ်ပြောလှတဲ့ ဒေသတွေထိ စစ်မီးတွေ ကူးစက်ကုန်တာမျိုးပါ။

အခြေအနေတွေဟာ ယူကရိန်းစစ်ပွဲ ရက်ပေါင်း ၁၀၀၀ ပြည့်တဲ့ ကာလမှာတော့ ပိုပြီးတင်းမာလာမယ့် အလားအလာတွေဆီ ဦးတည်ပြီး ရွေ့လာပါတယ်။ ပထမဆုံး အမေရိကန် သမ္မတ ဂျိုးဘိုင်ဒန်ဟာ ကာလရှည်ကြာ ငြင်းဆိုနေခဲ့ရာကနေ ယူကရိန်းကို အမေရိကန်လုပ် တာဝေးပစ် ဒုံးကျည်တွေ အသုံးပြုပြီး ရုရှားပိုင်နက်ထဲကို တိုက်ခိုက်ခွင့် ပြုလိုက်ပါတယ်။ ဒါဟာ ရွေးကောက်ပွဲ အနိုင်ရပြီး အမေရိကန် သမ္မတသစ် ဖြစ်လာမယ့် ဒေါ်နယ်လ်ထရမ့်နဲ့ ဘိုင်ဒန်တို့ တွေ့ဆုံမှုအပြီးမှာ တွေ့လာရတဲ့ အပြောင်းအလဲ ဖြစ်တာကြောင့် ထရမ့်ကိုယ်တိုင်လည်း သဘောတူ လက်ခံထားတယ်လို့ ယုံကြည်ရပါတယ်။ အစောပိုင်းမှာတော့ ဘိုင်ဒန်ဟာ ကီလိုမီတာ ၃၀၀ လောက်က ပစ်မှတ်တွေကို ချေမှုန်းနိုင်တဲ့ အဲဒီဒုံးကျည်တွေကို ရုရှားပိုင်နက်ထဲမှာ အသုံးပြုခွင့် မပေးဘဲ ယူကရိန်းပိုင်နက်ထဲ ကျူးကျော်လာတဲ့ ရုရှားတပ်တွေကို တိုက်ခိုက်ဖို့ အတွက်ပဲ ခွင့်ပြုထားခဲ့ပါတယ်။ ဘိုင်ဒန်ရဲ့ သဘောထား ပြောင်းလဲပြီးတဲ့နောက် ယူကရိန်းဟာ အမေရိကန် ဒုံးကျည်တွေကို အသုံးပြုပြီး ရုရှားပိုင်နက်ထဲက လက်နက်ရုံတွေကို တိုက်ခိုက်ခဲ့ပါတယ်။ နောက်ထပ် ၂ ရက်အကြာမှာ ဗြိတိန်ဆီက အလားတူ ထောက်ပံ့ထားတဲ့ ဒုံးကျည်တွေကို အသုံးပြုပြီး ယူကရိန်းက ရုရှားပစ်မှတ်တွေကို နောက်တစ်ကြိမ် တိုက်ခိုက်ပြန်ပါတယ်။

ဒီတော့ နိုဝင်ဘာ ၂၁ ရက်နေ့မှာ ရုရှားကလည်း စစ်ပွဲတွေအတွင်း ဘယ်တုန်းကမှ မသုံးဖူးတဲ့ တာလတ်ပစ် တိုက်ချင်းပစ် ဒုံးကျည် (IRBM)တစ်စင်းနဲ့ ယူကရိန်းကို တိုက်ခိုက်ခဲ့ပါတယ်။ အဲဒီအကြောင်းကို ရုရှား သမ္မတ ဗလာဒီမာ ပူတင်ကိုယ်တိုင်ကလည်း အတည်ပြုခဲ့ပါတယ်။ တိုက်ချင်းပစ် ဒုံးကျည်တွေဟာ နျူကလီးယား ထိပ်ဖူးတွေရော၊ သာမန် ထိပ်ဖူးတွေကိုပါ တပ်ဆင်နိုင်ပြီး အဲဒီဒုံးကျည်တစ်စင်း ပစ်လွှတ်လိုက်ပြီဆိုရင် ဘယ်လိုထိပ်ဖူး တပ်ထားသလဲ ဆိုတာကို ထောက်လှမ်းဖို့ မလွယ်ပါဘူး။ ဒီတော့ နိုင်ငံအချင်းချင်း စစ်ဖြစ်တဲ့ အခါမှာ အဲဒီဒုံးကျည်တွေကို သုံးရင် နျူကလီးယား စစ်ပွဲကို စတင်တယ်လို့ အစိုးရိမ်ကြီးပြီး ခြေလွန်လက်လွန်တွေ တုံ့ပြန်နိုင်တဲ့အတွက် တိုက်ချင်းပစ် ဒုံးကျည် ပိုင်ဆိုင်တဲ့ နိုင်ငံတွေဟာ လက်နက် စမ်းသပ် ပစ်ခတ်တာတွေကလွဲရင် စစ်ပွဲမှာ လက်တွေ့ မသုံးခဲ့ကြပါဘူး။ ဒါပေမဲ့ အမေရိကန်နဲ့ ဗြိတိန်လုပ် ဒုံးကျည်တွေကို ရုရှားပိုင်နက်ထဲထိ ယူကရိန်းက ပစ်ခတ်လိုက်ချိန်မှာတော့ ရုရှားဟာ အဲဒီ စည်းကို စကျော်လိုက်တဲ့ သဘောပါပဲ။

ပူတင်က အဲဒီဒုံးကျည်ဟာ သမားရိုးကျ ထိပ်ဖူးမျိုးပဲ တပ်ဆင်ထားတယ်လို့ သေသေချာချာ ရည်ညွှန်း ပြောဆိုခဲ့တာကိုက ဒီလက်နက်ဟာ နျူကလီးယားနဲ့ တိုက်ခိုက်မှုအတွက်ပါ သုံးလို့ရတယ် ဆိုတာကို ထပ်လောင်း သတိပေးလိုက်သလိုပါပဲ။ ပူတင်က တာလတ်ပစ် ဟိုက်ပါဆောနစ် ဒုံးကျည်လို့ ရည်ညွှန်းခဲ့တဲ့အတွက် ယူကရိန်းကို တိုက်ခိုက်ခဲ့တဲ့ အမျိုးအစားဟာ ကီလိုမီတာ ၃၅၀၀ ကနေ ၅၀၀၀ လောက်ထိ ပျံသန်းနိုင်တယ်လို့ ယူဆရတယ်။ နောက်ပြီး ဟိုက်ပါဆောနစ် မြန်နှုန်းနဲ့ ပျံသန်းနိုင်ပြီး အသံထက် ၁၀ ဆ ပိုမြန်တာကြောင့် ဘယ်လေကြောင်းကာကွယ်ရေး စနစ်ကမှ တားဆီးနိုင်မှာ မဟုတ်ဘူးလို့လည်း ပူတင်က ကြွေးကြော်သွားခဲ့ပါတယ်။ စိတ်ဝင်စားစရာ တိုက်ဆိုင်မှု နောက်တစ်ခုကတော့ ရုရှားဟာ နိုင်ငံရဲ့ နျူကလီးယား လက်နက်တွေ ထုတ်သုံးခွင့်ဆိုင်ရာ မူဝါဒတွေကို ပိုမို ရန်လိုတဲ့ သဘောထားမျိုးဆီ ပြောင်းလဲလိုက်ပြီး ရက်ပိုင်းအကြာမှာပဲ ဒီပစ်ခတ်မှု ဖြစ်ခဲ့တာပါ။

#ludunwayoo #လူထုနွေဦး #NewsUpdate

𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴
𝗬𝗼𝘂𝗧𝘂𝗯𝗲 -    / @peoplespring  
𝗙𝗮𝗰𝗲𝗯𝗼𝗼𝗸 -   / ludunwayoo  
𝗪𝗲𝗯𝘀𝗶𝘁𝗲 - https://www.ludunwayoo.com/
𝗜𝗻𝘀𝘁𝗮𝗴𝗿𝗮𝗺 -   / ludunwayoo  
𝗧𝗲𝗹𝗲𝗴𝗿𝗮𝗺 - https://t.me/peoplespring