Скачать или смотреть N449-ដំណើរទស្សនកិច្ចសិក្សា និងដាំកូនឈើរបស់និស្សិតនៃសាកលវិទ្យាល័យ ប៊ែលធី អន្តរជាតិ សរុបប្រមាណ ៥០០នាក់

“ដំណើរទស្សនកិច្ចសិក្សា និងដាំកូនឈើ របស់និស្សិតនៃសាកលវិទ្យាល័យ ប៊ែលធី អន្តរជាតិ សរុបប្រមាណ ៥០០នាក់”

សាកលវិទ្យាល័យ ប៊ែលធី អន្តរជាតិ ទាំងពីរទីតាំង បានដឹកនាំនិស្សិតឆ្នាំទី១ ឆមាសទី២ មកពីគ្រប់វេនសិក្សា និងគ្រប់មហាវិទ្យាល័យ ចុះទស្សនកិច្ចសិក្សាទៅកាន់តំបន់រមណីយដ្ឋាន អភិវឌ្ឍន៍ កសិ-ទេសចរណ៍ ម៉ុង ឫទ្ធី សែនជ័យ ស្ថិតនៅខេត្តកំពង់ស្ពឺ (១ថ្ងៃ វិលល្ងាច) ក្រោមអធិបតីភាពដ៏ខ្ពង់ខ្ពស់ ឯកឧត្តមបណ្ឌិត ម៉ុង ឫទ្ធី ប្រធានគណៈកម្មការទី៣ និងជាប្រធានក្រុមសមាជិកព្រឹទ្ធសភាប្រចាំភូមិភាគទី៧ និងលោកជំទាវ ព្រមទាំង ឯកឧត្តមសន្តិបណ្ឌិត ឡូយ សុផាត ប្រធានគណៈកម្មការទី៣រដ្ឋសភា។ ដំណើរទស្សនកិច្ចសិក្សានេះផងដែរ ក៏មានការអញ្ជើញចូលរួមពីសំណាក់ ឯកឧត្តមបណ្ឌិត លី ឆេង តំណាងរាស្ដ្រមណ្ឌលរាជធានីភ្នំពេញ ស្ថាបនិក-អគ្គនាយក នៃប៊ែលធី គ្រុប និងជាប្រធានក្រុមប្រឹក្សាភិបាល នៃសាកលវិទ្យាល័យ ប៊ែលធី អន្តរជាតិ ព្រមទាំង ឯកឧត្តម លី ណាវុឌ្ឍ អគ្គនាយករង នៃប៊ែលធី គ្រុប និងជាសាកលវិទ្យាធិការ នៃសាកលវិទ្យាល័យ ប៊ែលធី អន្តរជាតិ និងថ្នាក់ដឹកនាំ បុគ្គលិក សាស្រ្តាចារ្យ និងនិស្សិត ក៏ដូចជាយុវជនស្ម័គ្រចិត្ត ស.ស.យ.ក កាយរឹទ្ធិជាតិកម្ពុជា និងកាកបាទក្រហមកម្ពុជា នៃសាកលវិទ្យាល័យ ប៊ែលធី អន្តរជាតិ ទាំង២ទីតាំង សរុបប្រមាណ ៥០០នាក់។

ដំណើរទស្សនកិច្ចសិក្សានេះ បានរៀបចំឡើងក្នុងគោលបំណងដើម្បីឱ្យនិស្សិតបានសិក្សាឈ្វេងយល់ ទាំងក្នុងថ្នាក់ និងក្រៅថ្នាក់ អាចផ្សារភ្ជាប់ទៅនឹងធម្មជាតិ ចេះស្រឡាញ់ ថែរក្សាការពារបរិស្ថាន និងបង្កើតបរិយាកាសឱ្យនិស្សិតកាន់តែសប្បាយរីករាយ មានសាមគ្គីភាព ជាពិសេសអាចជំរុញការសិក្សារបស់និស្សិតឱ្យកាន់តែស៊ីជម្រៅបន្ថែមទៀត អំពី តំបន់រមណីយដ្ឋានអភិវឌ្ឍន៍ កសិ-ទេសចរណ៍ ម៉ុង ឫទ្ធី សែនជ័យ ខេត្តកំពង់ស្ពឺ ដើម្បីធ្វើជាទុនសម្រាប់ពង្រឹងសមត្ថភាពរបស់ខ្លួនឯង និងធ្វើខ្លួនឱ្យសាកសមជាទំពាំងស្នងឫស្សី ដើម្បីរួមចំណែកអភិវឌ្ឍប្រទេសជាតិនាពេលអនាគត។

ដំណើរទស្សនកិច្ចសិក្សានេះ បានប្រព្រឹត្តទៅនាថ្ងៃសៅរ៍ ៦រោច ខែពិសាខ ឆ្នាំម្សាញ់ សប្តស័ក ព.ស ២៥៦៩ ត្រូវនឹងថ្ងៃទី១៧ ខែឧសភា ឆ្នាំ២០២៥ ដោយធ្វើដំណើរតាមរយៈរថយន្តទំនើប ប៊ែលធី ទេសចរណ៍។

#BELTEI_IU #Kampong_Speu_province
#BELTEI_International_University
#Mong_Reththy_SenChey_Agro_Tourism_Development_Area