Munnu Bhai recites اجے قیامت نئیں آئی

منو بھائی
اجے قیامت نئیں آئی
وال ودھا لئے رانجھے نیں تے ٹِنڈ کرا لئی ہِیراں نیں
مِرزے خاں نال دھوکہ کیتا اوہدے اپنیاں تِیراں نیں
مِیٹر لا کے خوب چلائی صاحباں اوہدیاں وِیراں نیں
پر اجے قیامت نئیں آئی
تاریخ تماشا بُھکھاں دا، تہذیب کھڈونا رَجاں دا
تنقید جگالی لفظاں دی، تشہیر سیاپا لَجاں دا
موسیقی راتب کُتیاں دا تے ادب گتاوا مجھاں دا
پر اجے قیامت نئیں آئی
دھک مکوڑے پڑھن نمازاں ، دعوے کرن خدائیاں دے
بند کران شراباں نالے پرمٹ لین عیسائیاں دے
وعدے پیندے آپیں کردے ناں بدنام ڈیسائیاں دے
پر اجے قیامت نئیں آئی
زیراں دی پَٹی دے مطلب نِکلن لگ پئے زبراں چوں
عینک پا کے انھے لبھن حق حقیقت خبراں چوں
ٹی وی دیاں قوالیاں سُن کے مُردے جاگے قبراں چوں
پر اجے قیامت نئیں آئی
پارا تھرما میٹر دا، سیاست چوھدری طالب دی
ہیرا منڈی شاہیے دی تے دِلّی مرزا غالب دی
چادر جنرل رانی دی تے چاردیورای جالب دی
پر اجے قیامت نئیں آئی
چِٹے ورقے دَین شہادت کالی شاہ جہالت دی
سچل وعدہ معاف گواہی، نئیں رہی لوڑ وکالت دی
غصے دے نال تھر تھر کنبے کرسی عرش عدالت دی
پر اجے قیامت نئیں آئی
ویری اُچیاں محلاں دے پئے منگن راہ فصیلاں توں
منگن رحم قصائیاں کولوں تے خیرات بُخیلاں توں
خواباں دے وِچ بڑھکاں مارن موت ڈراوے مِیلاں توں
پر اجے قیامت نئیں آئی

منو بھائی