Скачать или смотреть ಭಾವ ತರಂಗ...ಹಾಡಿದವರು: ರಾಮಕೃಷ್ಣ ಕಾಟುಕುಕ್ಕೆ

ಕಾಟುಕುಕ್ಕೆ ಶ್ರೀ ಸುಬ್ರಾಯ ದೇವರ ಭಕ್ತಿಗೀತೆ.
ಅಷ್ಟಬಂಧ ಬ್ರಹ್ಮಕಲಶೋತ್ಸವದ ಸವಿನೆನಪಿಗಾಗಿ.

ಸಾಹಿತ್ಯ: ಶ್ರೀಮತಿ ಧಾನ್ಯಶ್ರೀ ಸರಳಿ
ಸಂಗೀತ, ರೇಕಾರ್ಡಿಂಗ್ ಮತ್ತು ವಿಡಿಯೋ ಎಡಿಟಿಂಗ್: ಶ್ರೀ ರವಿರಾಜ್ ಶೆಟ್ಟಿ ಓಡಿಯೂರು ಉಜಿರೆ

ಸಾಹಿತ್ಯ:

ಭಾವ ತರಂಗವು ಭಕ್ತಿಯೊಳಗಿಳಿದು
ಪಾವನ ಧಾಮವ ಸೇರುತಿದೆ
ಕಾವನ ತಟದೊಳು ಶಿರಬಾಗುತಲಿಹೆ
ಸೇವೆಯ ಭಾಗ್ಯದ ಫಲವಿದುವೆ॥

ಬೆಳಕಿನ ಸಿರಿಯಲಿ ಬಿರಿದಿಹ ಹೂಗಳು
ಹೊಳಪನು ಪಡೆದಿವೆ ಗುಡಿಯೊಳಗೆ
ಸೆಳೆಯುತಲೆಮ್ಮನು ತವ ಚರಣಕೆರಗಿ
ನಳನಳಿಸುತಲಿವೆ ಪದದೊಳಗೆ॥

ಸೃಷ್ಟಿಯು ಸ್ಥಿತಿಲಯ ಕಾರಣ ದೇವನೆ
ವೃಷ್ಟಿಯೊಳೊಳಿತಿನ ಸಿಂಚನವು
ನಿಷ್ಠೆಯ ಕಾರ್ಯದಿ ನಿನ್ನಿರವಿನ ಬಲ
ಇಷ್ಟವು ಸಕಲದಿ ಸನ್ಮತಿಯು॥

ಶುಭದಲಿ ಶುಭವಿದು ಜೀವನದುದ್ಧಾರ
ಅಭಯವ ನೀಡುವ ಕಾರ್ತಿಕನು
ನಭದಲಿ ಮಿನುಗುವ ತಾರೆಯ ತೆರದಲಿ
ಉಭಯದೊಳೇಕನು ಷಣ್ಮುಖನು॥

ಕಾರ್ತಿಕೇಯನೆ ಬೇಡುವೆನಯ್ಯ ನಾ
ಆರ್ತಿಯಿಂದಲಿ ಕಾಯೆಮ್ಮ
ಪ್ರಾರ್ಥನೆಗೊಲಿಯುವ ಸುಬ್ರಹ್ಮಣ್ಯನೆ
ಪಾತ್ರಗಳೊಳೆಲ್ಲ ಧರಿಸೆಮ್ಮ॥

ಭಾವಾರ್ಥ:

ಯಾವ ರೀತಿಯಲ್ಲಾದರೂ ಸರಿಯೇ ದೇವನ ಇರವು ನಮಗೆ ಜೀವನದಲ್ಲಿ ಪ್ರತಿನಿತ್ಯವೂ ಗೋಚರಿಸುತ್ತಲೇ ಇರುತ್ತದೆ. ಆ ಭಾವ ತರಂಗದಿಂದಲೇ ನಮ್ಮೆಲ್ಲರ ಜೀವನವು ಮಾನ್ಯತೆ ಪಡೆಯುತ್ತದೆ. ಯಾರು ಯಾವುದಕ್ಕೆ ಯೋಗ್ಯನೋ ಅವನಿಗೆ ಯೋಗಾನುಸಾರ ಏನೇನು ಲಭಿಸಬೇಕೋ ಅದೆಲ್ಲವೂ ದೊರೆಯುತ್ತದೆ. ಮಾಡಿದ ಸೇವೆಗನುಣವಾದ ಫಲಕ್ಕೆ ನಾವು ನಿತ್ಯ ಕಾತರಿಸಬೇಕಿಲ್ಲ ಕಾಲಾನುಸಾರ ಅದರ ಮಹತ್ವ, ಪೂರ್ಣಾನುಗ್ರಹ ಲಭಿಸುವುದರಲ್ಲಿ ಯಾವ ಸಂಶಯವೂ ಇಲ್ಲ.

ಬೆಳಕಿನ ಸಿರಿಯಲ್ಲಿ ಅರಳಿದ ಹೂಗಳು ಹೇಗೆ ದೇವನಿಗೆ ಯಾವುದಾದರೂ ರೂಪದಿಂದ ಸೇರಲ್ಪಡುತ್ತದೋ, ಅದು ನಮ್ಮನ್ನು ಹೇಗೆ ದೇವನಿಗೆ ಬಾಗಬೇಕೆಂದು ತಿಳಿಸಿಕೊಡುತ್ತದೋ ಅದೆಲ್ಲವೂ ವೇದ್ಯವಾದುದು. ಅವುಗಳೆಲ್ಲವೂ ಮಂತ್ರ, ಭಜನೆ, ಶ್ಲೋಕಗಳ ಮುಖೇನವೋ ಅಥವಾ ಇನ್ಯಾವುದೋ ರೂಪದಿಂದ ನಳನಳಿಸುತ್ತದೆ.

ಎಲ್ಲದರ ನಿಯಾಮಕ ಕತೃವಾದ ದೇವನೊಳಗೆ ಒಳಿತಿನ ಮಳೆಯೇ ನಮ್ಮ ಪಾಲಿಗೆ ಸಿಂಚನ, ಮಾಡುವ ಕಾರ್ಯದಲ್ಲಿ ನಿಷ್ಠೆ ಇದ್ದಾಗ ಎಲ್ಲವೂ ಸುಂದರ, ಸುಮನಸ ಎನಿಸಲ್ಪಟ್ಟು ಸನ್ಮತಿಯನ್ನು ಗಳಿಸುವುದರಲ್ಲಿ ನಿಸ್ಸಂಶಯ.

ನಾಮರೂಪವೆಷ್ಟೇ ಇದ್ದರೂ ನಭದಲ್ಲಿ ಮಿನುಗುವ ತಾರೆಯಂತೆ ದೇವನೊಬ್ಬನೇ. ಅನೇಕ ವಿಚಾರಗಳಿಂದ ಅವನನ್ನು ಅರ್ಚಿಸುತ್ತೇವೆಯಾದರೂ ಅದರೊಳಗಿನ ತಿರುಳು ಒಂದೇ ಆಗಿದೆ. ಅಂತಹ ದೇವನು ನಮ್ಮೆಲ್ಲರ ಪ್ರಾರ್ಥನೆಗೆ ಅನುಕ್ಷಣವೂ ದಕ್ಕುವಂತಹವನು. ಅವನೇ ನಮಗೆಲ್ಲಾ ದಿಕ್ಕಾಗಿ ಗೋಚಸುವನು. ಹಾಗಾಗಿ ನಮ್ಮೆಲ್ಲರೊಳಗೆ ಅವನೇ ಜೀವವಾಗಲಿ.. ಜೀವಿತವು ಧನ್ಯವಾಗಲಿ.. ನಾವೆಲ್ಲರೂ ಅವನನ್ನೇ ಸೇರುವಂತೆ, ಅವನೇ ಆಗುವಂತೆ ಆತ ಅನುಗ್ರಹಿಸಲಿ ಎಂಬುದೇ ಈ ಕವನದ ಆಶಯವಾಗಿದೆ..