Скачать или смотреть ശ്രീ കൂടല്‍മാണിക്യം ക്ഷേത്രത്തിലെ കഴക നിയമനം കൂടല്‍മാണിക്യം ദേവസ്വം അഡ്വൈസ് മെമ്മോ അയച്ചു

ശ്രീ കൂടല്‍മാണിക്യം ക്ഷേത്രത്തിലെ കഴക നിയമനത്തിനായി ദേവസ്വം റിക്രൂട്ട്മെന്‍റ് ബോര്‍ഡ് നിയമിച്ച ചേര്‍ത്തല സ്വദേശി കെ എസ് അനുരാഗിന് കൂടല്‍മാണിക്യം ദേവസ്വം അഡ്വൈസ് മെമ്മോ അയച്ചു. ശനിയാഴ്ച രാവിലെ നടന്ന ദേവസ്വം ഭരണസമതി യോഗം കഴക തസ്തികയില്‍ അനുരാഗിനെ നിയമിക്കാന്‍ തീരുമാനിച്ചിരുന്നു. തുടര്‍ന്നാണ് അനുരാഗിന് ഉച്ചയോടെ സ്പീഡ് പോസ്റ്റ് വഴി അഡ്വൈസ് മെമ്മോ അയച്ചത്. ദേവസ്വം റിക്രൂട്ട്മെന്‍റ് ബോര്‍ഡ് നടത്തിയ നിയമനത്തെ ചോദ്യം ചെയ്ത് ഇരിങ്ങാലക്കുട തെക്കേ വാരിയത്ത് ടി. വി. ഹരിക്യഷ്ണന്‍ നല്‍കിയ ഹര്‍ജി കഴിഞ്ഞ ദിവസം ഹൈക്കോടതി തള്ളിയിരുന്നു. ഹര്‍ജിക്കാര്‍ ആവശ്യപ്പെട്ട കാര്യങ്ങള്‍ കോടതിയില്‍ തെളിയിക്കാനോ, ആവശ്യമായ രേഖകള്‍ ഹാജരാക്കുവാനോ അവര്‍ക്ക് കഴിഞ്ഞില്ലെന്ന് കൂടല്‍മാണിക്യം ദേവസ്വം ബോര്‍ഡ് ചെയര്‍മാന്‍ അഡ്വ സി. കെ .ഗോപി പറഞ്ഞു അതുകൊണ്ട് കേസ്സ് തള്ളിയത്. അവര്‍ക്ക് അവകാശവാദങ്ങള്‍ ഉണ്ടെങ്കില്‍ സിവില്‍ കോടതിയെ സമീപീക്കാനാണ് ഹൈക്കോടതി നിര്‍ദ്ദേശിച്ചിട്ടുളളതെന്ന് അഡ്വ സി. കെ ഗോപി ചൂണ്ടിക്കാട്ടി. കേരള ദേവസ്വം റിക്രൂട്ട്മെന്‍റ് ബോര്‍ഡ് കഴകം തസ്തികയില്‍ നിയമനത്തിനായി ഒരു വ്യക്തിക്ക് പോസ്റ്റിങ്ങ് ഓര്‍ഡര്‍ നല്‍കിയ സമയത്താണ് കേസ്സ് വന്നത്. കേസ്സ് ഇപ്പോള്‍ തീര്‍പ്പായ സാഹചര്യത്തിലാണ് കെ. ഡി. ആര്‍. ബി. നിയമിച്ചയാളെ കഴകം തസ്തികയില്‍ നിയമിക്കാന്‍ ദേവസ്വം ഭരണസമിതി യോഗം തീരുമാനിച്ചതെന്ന് ചെയര്‍മാന്‍ അഡ്വ സി. കെ. ഗോപി പറഞ്ഞു. കൂടല്‍മാണിക്യം ക്ഷേത്രത്തില്‍ ഇന്നുവരെ തന്ത്രിമാര്‍ കഴകം ജീവനക്കാരെ നിയമിച്ചതിന്‍റെ രേഖകളില്ല. കഴകം ജീവനക്കാരെ നിയമിക്കാനുള്ള അധികാരം ദേവസ്വം ബോര്‍ഡിനാണ്. ഇപ്പോള്‍ ആ ചുമതല കെ. ഡി. ആര്‍. ബി ക്കാണ്. കെ. ഡി. ആര്‍. ബി യാണ് ഇപ്പോള്‍ തന്ത്രി, മേല്‍ശാന്തി ഒഴികെയുള്ള എല്ലാ ദേവസ്വം, ക്ഷേത്രം ജീവനക്കാരെയും നിയമിക്കുന്നത്. കെ. ഡി. ആര്‍. ബി. റിക്രൂട്ട് ചെയ്യുന്ന ഉദ്യോഗാര്‍ത്ഥികളെ നിയമിക്കുന്നതിനുള്ള ചുമതല ദേവസ്വം മാനേജ്മെന്‍റിനുണ്ട്. ആ ചുമതല ദേവസ്വം നിര്‍വ്വഹിക്കുമെന്നും അഡ്വ സി. കെ. ഗോപി പറഞ്ഞു. ശനിയാഴ്ച രാവിലെ നടന്ന ദേവസ്വം ഭരണസമിതി യോഗത്തില്‍ തന്ത്രി പ്രതിനിധി ഒഴികെയുള്ള ഭരണസമിതിയംഗങ്ങളായ ഡോ മുരളി ഹരിതം, രാഘവന്‍ മുളങ്ങാടന്‍, അഡ്വ കെ. ജി. അജയ്കുമാര്‍, വി. സി. പ്രഭാകരന്‍, കെ. ബിന്ദു, അഡ്മിനിസ്ട്രേറ്റര്‍ ജി. എസ്. രാധേഷ് എന്നിവര്‍ പങ്കെടുത്തു. തന്ത്രി പ്രതിനിധി യോഗത്തിനെത്താതിരുന്നത് സാങ്കേതിക കാരണങ്ങളാലാണന്ന് ചോദ്യങ്ങള്‍ക്ക് മറുപടിയായി അഡ്വ സി. കെ. ഗോപി പ്രതികരിച്ചു. അതേ സമയം ദേവസ്വത്തിന്‍റെ ഉത്തരവ് ലഭിച്ചാല്‍ ജോലിയില്‍ കയറാനാണ് തീരുമാനമെന്ന് കെ. എസ്. അനുരാഗും പ്രതികരിച്ചു