Regaining Elephantpass from North- උතුරින් අලිමංකඩට ලඟාවීම

🇱🇰🔥 රැකියාවක බිහිසුණු මතක 17...

🔴අලිමංකඩ සමග A-9 නිදහස්.....
=================================

උතුරින් ආ 55 හා 53 සේනාංක දකුණින් පැමිණි 58 සේනාංකය සමග අලිමංකඩදී (Elephant Pass) යා වී වසර 25කට පසුව සමස්ත A-9 මාර්ගයම පූර්ණ ලෙස නිදහස් කරගැනීම අවසන් සටනේ අතිශයින්ම තීරණාත්මක හා වැදගත්ම හැරවුම් ලක්ෂ්‍යකි. අලිමංකඩ යනු ශ්‍රී ලංකාවේ පටුම බිම්තීරය සහිත කොටසයි. තවත් ලෙසකින් කිවහොත් Bottle Neck එකයි. දැවැන්ත කලපු තීරය මතින් ඉර නැගිම හා බැසීම ඉතා පැහැදිලිව හා සොඳුරුතම දර්ශනයක් ලෙස බලාගත හැකි එකම ස්ථානය ලෙසද අලිමංකඩ ප්‍රකටය.
පලෙයි, පුදුකාඩු, සෝරන්පත්තු, ඉයක්කච්චි පසුකොට අලිමංකඩට එන මග දෙපස සතුටු සිනා පිරුණු සෙබලුන්ය. ඇතැමෙක් තැන තැන ගිමන් හරිති, කල්ලි ගැසී කතාබස් කරති. ගිනිඅවි සුද්ද පවිත්‍ර කරති. ඉදිරි යුද සැලසුම් ගැන සාකච්ඡා කරති. ඒ අතර තවත් ජ්‍යෙෂ්ඨ නිලධාරීහූ හා සෙබලු අලිමංකඩ බිඳවැටී ත්‍රස්තවාදීන්ගේ අතට පත්වීමට පෙර සටන් කළ හැටි සිහිපත් කරති. දශකයකට පසු දුටු ,එදා සිටි හුරුපුරුදු ආගිය තැන් විමසා බලති.
බ්‍රිගේඩියර් ප්‍රසන්න ද සිල්වා සිය බලසේනාධිපතිවරු හා බලඇණි අණදෙන්නන් කැඳවා සිතියම් බිම එලා ඊලඟ අදියර ගැන සාකච්ඡා කළහ. ඒ අතර සැඟවී සිටියහැකි ත්‍රස්තවාදීන් සොයා හමුදා සෙබලු අහුමුළු පීරති. අකුල් වන ලැහැබ් වෙත වෙඩි තබති. මෙවැනි ජයග්‍රහණයක් දින ගණනකට ආපසු හැරවීමට සැඟවුණු ත්‍රස්තවාදීන් කිහිපදෙනෙකු හොඳටම ප්‍රමාණවත් ය. ඒ අතරවාරයේ ඉංජිනේරු බලකා නිලධාරීන් හා සෙබලු කැඩී බිඳී ගොස් ඇති පාලම් තනති. ඒ සන්නද්ට රථ ඇතුලු හමුදා වාහන ඉදිරි මෙහෙයුම් වෙත පිටත් කිරීමටය.

යාපනය හැර උතුරේ පාලන බලය රජයට අහිමි වූ 2000 වසරේ සිට A-9 හෙවත් යාපනය - මහනුවර ප්‍රධාන මාර්ගයේ කිලෝමීටර් 100 ක ප්‍රදේශය හෙවත් වවුනියාව- ඕමන්තේ සිට මුහමාලේ දක්වා කොටසද අපට අහිමිව ගියේය. එතැන් සිට සිදුවූයේ ත්‍රස්තවාදීන් කඳවුරු බඳිමින් දෛනිකව ශක්තිමත් වීමය. එම කොටි බල කඳවුරු බිඳ දමමින් මානුෂීය මෙහෙයුමේ හමුදා සේනාංක A-9 මාර්ග හරහා ත්‍රස්තවාදීන් නැගෙනහිර කොටසට තල්ලු කර දැමුවේ 2009 ජනවාරි 8 වැනිදායි. ඒ සමගම ජනවාරි 9 වැනිදා වනවිට A-9 මාර්ගය වසර 25 කට පසු මුදා ගැනීමට හැකිවූ බව ප්‍රකාශයට පත් කෙරිණ.
A-9 මාර්ගය ඒ වන විට හොඳ තත්වයක නොපැවතුනත් ඒ දක්වා ගුවනින් හා මුහුදෙන් උතුරට සිදුකළ සියලු සැපයුම් ගොඩබිමින් සිදුකරගැනීමට මූලික පසුබිම සකස්විය. මෙහෙයුම් සඳහා අවැසි යුධෝපකරණ බෙදාහැරීම, උතුරේ ජනතාවට හා ආරක්ෂක අංශ වෙත අත්‍යවශ්‍ය ආහාර සපයාගැනීම ඒ අතරින් ප්‍රමුඛ විය. මග දෙපස පූර්ණ ආරක්ෂාව තහවුරු වන තෙක් රාත්‍රි ගමන් එතරම් සිදු නොවුනත් දින කිහිපයකින් එ් අවදානම පහවිය.
එතෙක් කොළඹත් සමග පලාලි ගුවන්තොටුපළ ඔස්සේ සබඳතා පවත්වා ගත් අපිද, දින කිහිපයකට පසු අපේම වාහනයක් රූපවාහිනී සංස්ථාවෙන් ගෙන්වාගැනීමට ක්‍රියා කළෙමු.⭕ (ඒක වෙනම කතාවකි)