Скачать или смотреть कुशे औंसी बुबाको मुख हेर्ने दिन २०८२ को पवित्रदिनमा सम्पुर्ण पिताहरुमा सम्मान साथ हार्दिक श्रद्धा 🕉️

✍️ वसन्तराज अधिकारी 

घोराही, दाङ ।



पिता सरी  ज्ञान कुनै नै छैन ।

अक्षय ज्ञान कहिल्यै मेटिन्न ।।  

                  

खेतुलालको नाती ।

बलदेवको छोरा ।।

बसन्तराज नाम 

अधिकारी थर ।।१।।


पितृभुमी मुल 

प्युठान तिराम ।

जन्मस्थल मेरो 

मजगैं दाङ ।।२।।


उदयपुर राज्य 

अधिकारी राजा ।

लेखिएको छ 

बंशावली साझा ।।३।।


बुबाको हात समाई 

चक्लेट मिठाई खाई ।

ति वात्सल्य दिन 

बितेका रमाई ।।४।।


सम्झन्छु आज 

पुनर्जन्म लाग्छ ।

आफै छु बाबु 

गौरव जाग्छ ।।५।।


बुबाको रिक्तता

छयालीस बर्ष भो ।

चौध बर्ष छँदा 

बुबा स्वर्ग भाको ।।६।।


आमाको माया 

अपार प्यार ।

अरुको लाख 

आमाको काख ।।७।।


संघर्ष झेले 

खेती किसानी गर्दै ।

पितृभुमिमा गै 

शिक्षक भएरै ।।८।।


दुख बिना सुख 

रात बिना दिन ।

सहज कहाँ हुन्थ्यो 

अनाथका ति दिन ।।९।।


अवरुद्ध शिक्षा 

स्वजाग्रत चेष्टा ।

खुल्यो दिव्य ज्ञान 

अथक परिश्रम निष्ठा ।।१०।।


निजामती सेवा

उच्च-शिक्षा प्राप्ती ।

राष्ट्रसेवा महान 

जन्मभुमि धर्ती ।।११।।


मेहनत परिश्रम 

दृढ ईच्छा अठोट ।

आत्म बिश्वास मनमा 

भएर दृढ़ ।।१२।।


मांस मदिरा 

अभक्ष पान ।

छैनन दुर्व्यसन 

एक स्वाभिमान ।।१३।।


बुबा म श्रद्धाञ्जली 

दिन्छु लाख२ ।।

स्मृतिपटमा छ 

अविस्मरणीय अमीट याद ।।१४।।


अनन्त माया

छहारी छाया ।

सन्तान प्रेम 

गृहस्थ धर्म ।।१५।।


यो जन्मपछि 

पुनर्जन्म भए ।

पाउँ हजुरकै 

नित्य सानिध्य ।।१६।।


नित्य म गर्छु 

स्मरण हजुरको ।

पाईरहेछु आज

आशिर्वचन जो ।।१७।।


समय छ बलवान 

ईश्वर छ महान ।

गुरु देव पितृ 

रहन्छ त्रिॠण ।।१८।।


मिल्छ मुक्ति मार्ग

बैकुण्ठ धाम ।

लिएर हिडे 

यो तत्व ज्ञान ।।१९।।


ठुला२ यज्ञ 

यज्ञादि दान ।

भन्दा नि श्रेष्ठ 

असल मानव बन्न ।।२०।।


सच्चा कमाई

सच्चाई ज्ञान ।

चित्त शुद्ध भै 

बितोस जीवन ।।२१।।


बुबा हजुरको

जव याद गर्छु ।

शिर निहुराई 

शरण म पर्छु ।।२२।।


जानी नजानी 

गरेका दुश्कर्म ।

क्षय गरी सदा

पाउँ पुण्य धर्म ।।२३।।


धेरै छन याद 

स्मरण अगाध ।

शब्द नै छैन 

अव्यक्त अवाक ।।२४।।


बसेर ध्यान 

गरी बन्द नेत्र ।

तव मात्र खुल्छ 

ज्ञान अनन्त ।।२५।।


प्रतिदिन त्रिकाल 

छ हजुरको ध्यान ।

स्मरण म गर्छु 

बनी बालक समान ।।२६।।


पिता सरी ज्ञान कुनै नै छैन ।

अक्षय ज्ञान कहिल्यै मेटिन्न ।।२७।।


जो दिव्य ज्योति 

प्रकाशपुञ्ज ।

त्यै भित्र बन्छ 

ॐ कार गुञ्ज ।।२७।।

अस्तु !!                                                                                                                 

  बुबा स्व. बलदेवप्रसाद अधिकारी 
जन्म : १९८७ तिराम, प्युठान 
कीर्तिशेष : २०३६ फागुन मजगैं, दाङ ।  

बुबाको मुख हेर्ने दिन :
शनिबार भदौ ७, २०८२ शुभम् ।
#कुशेऔंसी_बुबाको_मुख_हेर्ने_दिन ।