#TF

第一間林記車仔麵，絕對係太安樓人氣王之一，檔口放咗咁多盤車仔餸，就知佢係唔簡單。唔知點入手？直接同老板講聲幫你發辦，4餸車仔麵有咖喱魷魚、韭菜餃、豬粉腸同五香牛筋，最驚喜係五香牛筋，用筷子一夾就可以夾斷，口感軟腍；咖喱魷魚夠爽彈，好有咖喱香；韭菜餃非常大隻，入面滿滿韭菜同肉，非常足料；豬粉腸喺其他車仔餸嚟講比較少見，內臟處理得幾好，冇異味，略嫌韌咗少少，其他滿分！ 
  
第二間來來小吃店，呢間糖水鋪淨係開4個鐘，大部分嘅食材係自家製，早上用嚟備料，到夜晚先至開賣。既然9成料都係手工做，當然叫五種冰。配料極多，手工芋圓比坊間更大粒，每粒食到紫薯、芋頭同番薯嘅味道；仙草凍夠滑，係台灣嘅古早味呀～～另外一款比較特別嘅麵茶粉，由台灣直送，食落有芝麻花生嘅香氣，令成個冰增加層次，好正呀！ 
  
第三間小麵站係太安樓地膽推薦，仲話係太安樓被底估嘅食店@@呢度主打小雲吞，每粒人手包，入面係菜肉餡，食到蔬菜嘅爽脆。叫咗老壇酸菜湯小雲吞，呢個老壇酸菜湯真係出色！雖然話小雲吞先係主角，但飲完個湯之後，下次嚟可以唔食小雲吞，但一定要飲老壇酸菜湯！東北水晶拉皮晶瑩剔剔，入口爽滑，味道酸辣好開胃。 
  
最後一間係老三炒麵，亦係呢排太安樓討論度極熱門的人氣食檔，因為係即炒粉麵非常有𨬶氣，所以嚟食，預咗好多人排隊，所以要食，真係要付出時間等！ 
呢度最出名係雜錦炒麵，先揀主食即係要咩粉麵，再揀調味即係醬汁。見到有腸粉，馬上order特色雜錦炒腸粉！估唔到嘅係，店員仲會問你腸粉想要咩口感，我就揀咗腍身啲～講番個雜錦入面有成十樣配料：腸仔、豬柳漢堡、紅腸、火腿、香茅肉碎、蟹柳、魚腐、雞柳、煙鴨胸同榨菜，除咗以上嘅配料，仲見到蔬菜同芽菜，炒得極有鑊氣入晒味，一份賣40蚊，份量夠兩個人share，超級抵食！ 
  
   
林記車仔麵 
4餸車仔麵 $53（咖喱魷魚、韭菜餃、豬粉腸、五香牛筋） 
地址：西灣河筲箕灣道57-87號太安樓地下A12號鋪 
  
來來小吃店 
五種冰 $47（煉奶加$3） 
手工芋圓、仙草凍、米麻糬、麵茶粉、芋頭、粉粿 
地址：西灣河筲箕灣道57-87號太安樓地下第二街A33B號鋪 
  
小麵站 
老壇酸菜湯小雲吞（細份）$22  
東北水晶拉皮 $25 
地址：西灣河筲箕灣道57-87號太安樓地下A55B號鋪 
  
老三炒麵 
特色雜錦腸粉 $39 
地址：西灣河筲箕灣道57-87號太安樓地下A2-9號鋪 
   
主持、撰文：Yvonne Lam 
攝影：Fong Ka Him
剪接：Fong Ka Him、Kate
美術：Anita Lam  
  
*特別鳴謝太安樓地膽@cafewhalehk Nick 
*各食店的營業時間以該店為準 
 
全自費真實食評，內容反映當日質素，並非廣告！最新價格以餐廳為準。  
   
#太安樓 #太安樓美食 #宵夜 #外賣 #掃街 #車仔麵 #炒粉麵#仙草凍 #米麻糬 #芋頭 #手工芋圓 #咖喱魷魚 #韭菜餃 #豬粉腸 #五香牛筋 #麵茶粉 #老壇酸菜湯 #小雲吞 #水晶拉皮 #小麵站 #來來小吃店 #林記車仔麵 #老三炒麵 #街坊小店 #18區搵食 #TalkFood #TalkFood西灣河