Скачать или смотреть អាជ្ញាធរខេត្ត៖ វិស័យឯកជនមានសារៈសំខាន់ ចូលរួមចំណែកបណ្តុះបណ្តាលធនធានមនុស្សប្រកបដោយគុណភាព

អាជ្ញាធរខេត្ត៖ វិស័យឯកជនមានសារៈសំខាន់ ចូលរួមចំណែកបណ្តុះបណ្តាលធនធានមនុស្សប្រកបដោយគុណភាព

ក្នុងពិធីចែកបណ្ណសរសើរដល់សិស្សានុសិស្សទទួលបានជ័យលាភីនិន្ទេសA និងសិស្សានុសិស្សដែលបានបញ្ចប់ការសិក្សាក្នុងឆ្នាំសិក្សា២០២៤ - ២០២៥ របស់សាលាវេសហ្គេតអន្តរជាតិនៅខេត្តសៀមរាប នាថ្ងៃទី២៥ ខែតុលា ឆ្នាំ២០២៥ លោកស្រី ម៉ននី រង្សី អភិបាលរងខេត្តសៀមរាបបានលើកឡើងថា៖ ការចូលរួមចំណែកពីវិស័យឯកជនក៏មានសារៈសំខាន់ផងដែរ ក្នុងការជួយផ្តល់សេវាអប់រំដល់សិស្ស និស្សិតស្របតាមចក្ខុវិស័យរបស់ក្រសួងអប់រំ ក្នុងការកសាងធនធានមនុស្សប្រកបដោយស្មារតី ទទួលខុសត្រូវខ្ពស់ ព្រមទាំងចូលរួមចំណែកក្នុងការធ្វើឲ្យសម្រេចនូវគោលដៅអប់រំជាតិ ដែលធានាការបណ្តុះបណ្តាលមូលធនមនុស្ស ពេញលេញប្រកបដោយវិជ្ជាសម្បទា បំណិតសម្បទា និងចរិយាសម្បទា។

លោកស្រីមានប្រសាសន៍បន្តថា ពិតណាស់វិស័យអប់រំ មានតួនាទីយ៉ាងសំខាន់ក្នុងការរួមចំណែកដល់ការអភិវឌ្ឍជាតិ ដោយកុមារ យុវជន និងមនុស្សពេញវ័យ ត្រូវទទួលបានការសិក្សា និងការអប់រំពេញមួយជីវិត ហើយការអប់រំ ត្រូវផ្តោតលើការ កសាងជំនាញ និងការផ្តល់ឱកាស ដល់សិស្សគ្រប់រូប ក្នុងការទទួលបាននូវចំណេះដឹងមូលដ្ឋាន សម្រាប់ឈានទៅសិក្សាលើចំណេះជំនាញបច្ចេកទេស និងឯកទេសផ្សេងៗ ដើម្បីសម្រេចបានការអភិវឌ្ឍដែលផ្តល់អត្ថប្រយោជន៍ពេញលេញដល់គ្រប់ស្រទាប់យុវជន ក្នុងការកសាងធនធានមនុស្សប្រកបដោយគុណភាព។

លោកស្រីអភិបាលរង បានចាត់ទុកលទ្ធផលដែលប្អូនៗ និងក្មួយៗ ទទួលបាននាពេលនេះ គឺភាពជោគជ័យពិតប្រាកដរបស់ប្អូនៗ ក្នុងន័យនេះសូមប្អូនៗខិតខំហ្វឹកហ្វឺនរៀនសូត្របន្ត លើមុខវិជ្ជាផ្សេងៗ និងភាសាបរទេសបន្ថែមទៀត ដើម្បីបង្កើនសមត្ថភាព ចំណេះដឹង ចំណេះធ្វើ ឈានឱ្យទាន់សភាពការណ៍វិវត្តន៍រីកចម្រើនរបស់សង្គមជាតិ ហើយក៏ត្រូវប្រកាន់ខ្ជាប់នូវវិន័យ សេចក្តីថ្លៃថ្នូរ និងរក្សាសាមគ្គីភាពនៅក្នុងគ្រប់ មជ្ឈដ្ឋានជីវភាពរស់នៅ ដើម្បីក្លាយខ្លួនជាកូនល្អ សិស្សល្អ មិត្តល្អ និងជាពលរដ្ឋល្អមានប្រយោជន៍សម្រាប់សង្គមជាតិយើងផងដែរ។

ក្នុងរបាយការណ៍លោក រ័ត្ន រស្មី នាយកសាលាវេសហ្គេតអន្តរជាតិមានប្រសាសន៍ថា៖ ចាប់ពីឆ្នាំសិក្សា ២០២៥-២០២៦ នេះតទៅ សម្រាប់សាខាទី២ ផ្សារដើមក្រឡាញ់ទទួលបានអាជ្ញាប័នពីក្រសួងអប់រំ នៃរដ្ឋាភិបាលប្រទេសអូស្ត្រាលីដែលអនុញ្ញាតដាក់ឱ្យដំណើរការកម្មវិធីសិក្សាចំណេះទូទៅអង់គ្លេសពីកម្រិតមត្តេយ្យសិក្សា ដល់មធ្យមសិក្សាស្របតាមកម្មវិធីសិក្សារដ្ឋប្រទេសអូស្ត្រាលីខាងលិច។ កម្មវិធីសិក្សានេះនឹងសម្រួលឲ្យសិស្សទាំងអស់អាចធ្វើ ការផ្លាស់ប្តូរការសិក្សាទៅក្រៅប្រទេសបានយ៉ាងងាយ ជាពិសេសសិស្សានុសិស្សនឹងទទួលបានការអប់រំជាសកលមួយពីប្រទេស ជឿនលឿន ដូចនឹងការសិក្សានៅប្រទេសអូស្ត្រាលីដែរ។

អត្ថបទ និងរូបភាព៖ លោកទ្រា ពន្លឺ
កែសម្រួល៖ លោក ហាំ ម៉េងហួត