Скачать или смотреть Samarqandda qutqaruvchilarning kasbiy mahorati mustahkamlanmoqda

Samarqand viloyati Favqulodda vaziyatlar boshqarmasi tomonidan qutqaruvchilarning kasbiy ko‘nikmalarini mustahkamlash, ularning ruhiy va jismoniy tayyorgarlik darajasini yanada oshirish maqsadida kecha-yu kunduz o‘quv mashg‘ulotlari muntazam ravishda tashkil etilmoqda.
Navbatdagi maxsus-taktik o‘quv mashg‘ulotlari Samarqand shahri hamda Urgut tumani hududidagi yirik savdo komplekslarida o‘tkazildi. Mashg‘ulotlar davomida shartli ravishda yuzaga kelgan yong‘inni bartaraf etish, binoda bo‘lgan fuqarolarni xavfsiz hududga tezkor evakuatsiya qilish, shuningdek, jabrlanganlarga birinchi tibbiy yordam ko‘rsatish bo‘yicha amaliy harakatlar bajarildi.
Shuningdek, tadbir doirasida ichki ishlar organlari, tez tibbiy yordam xizmati hamda boshqa tegishli tezkor xizmatlar bilan o‘zaro hamkorlikdagi harakatlar ham sinovdan o‘tkazildi. Favqulodda vaziyat sodir bo‘lgan paytda kuch va vositalarni to‘g‘ri taqsimlash, axborot almashinuvi, hududni o‘rab olish, jamoat tartibini saqlash va jabrlanganlarni shifoxonaga yetkazish jarayonlari amaliy jihatdan mashq qilindi.
O‘quv jarayonida qutqaruvchilar tomonidan yong‘in o‘chirish texnikalaridan samarali foydalanish, maxsus asbob-uskunalarni to‘g‘ri qo‘llash, tutun bilan to‘lgan binolarda harakatlanish hamda fuqarolarni xavfsiz olib chiqish bo‘yicha ko‘nikmalar mustahkamlandi.
Bunday o‘quv mashg‘ulotlari favqulodda vaziyatlarda barcha tezkor xizmatlarning hamjihat va muvofiqlashtirilgan harakatini ta’minlash, talafotlarning oldini olish hamda aholi xavfsizligini yuqori darajada kafolatlashga xizmat qiladi.