Скачать или смотреть საზოგადოებრივის გენდირექტორის მოვალეობას თინათინ ბერძენიშვილი შეასრულებს

საზოგადოებრივი მაუწყებლის სამეურვეო საბჭომ დღეს გამოცემული გადაწყვეტილებით, ცნობად მიიღო უკვე ყოფილი გენერალური დირექტორის, გიორგი ბარათაშვილის განცხადება, თანამდებობის დატოვების შესახებ და ახალი გენერალური დირექტორის არჩევამდე, მისი მოვალეობის შესრულება მაუწყებლის მედიისა და კომუნიკაციის ბლოკის დირექტორ თინათინ ბერძენიშვილს დააკისრა.

შეგახსენებთ, თანამდებობის დატოვების შესახებ განცხადება კანცელარიაში ბარათაშვილმა დღეს დილით შეიტანა. დღესვე ის თანამშრომლებსაც გამოემშვიდობა.

ბარათაშვილის მიერ თანამდებობის შესაძლო დატოვების შესახებ ინფორმაცია სამი დღის წინ გავრცელდა, რაც თავად ბარათაშვილმაც დაადასტურა.

ბარათაშვილი საზოგადოებრივი მაუწყებლის გენერალური დირექტორის თანამდებობაზე 2012 წლის 28 დეკემბერს დაინიშნა და მას უფლებამოსილების ვადა 2018 წელს ეწურებოდა.

პროცედურულად, მას შემდეგ, რაც სამეურვეო საბჭო გენდირექტორის განცხადებას დააკმაყოფილებს, 10 დღის ვადაში უნდა გამოაცხადოს ღია კონკურსი ვაკანტურ თანამდებობაზე.

მსურველებს განაცხადებისთვის 30 კალენდარული დღე აქვთ, რომლის ამოწურვის შემდეგ საბჭომ 3 დღის ვადაში უნდა გამოაქვეყნოს კანდიდატთა სია და ერთკვირიან ვადაში მაუწყებლის ახალი დირექტორი შეარჩიოს.