Скачать или смотреть مرثیہ بر وفات حضرت اقدس مولانا غلام محمد وستانوی رحمہ اللہ بآواز زکریا ندوی حفظہ اللہ

مرثیہ بر وفات: خادم القرآن و الحدیث مولانا محمد غلام وستانوی صاحب رئیس جامعہ اشاعت العلوم اکل کوا و رکنِ شوری دارالعلوم دیوبند

غلامِ وستانوی کی فرقت سے، غم کا موسم ہے دل پہ طاری
چلے ہیں قرآں کے آج خادم ، گئی ہے جنت میں اک سواری

وہ سیکڑوں علمی درسگاہوں کے منتظم بھی تھے پاسباں بھی
وہ روح تھے دینی مدْرَسوں کی ، نہیں ملے گی وہ جانثاری!

ہزاروں مسجد کے وہ تھے بانی ، تھی ان کی فطرت میں جانفشانی
زمینِ گجرات رو رہی ہے ، دلوں پہ طاری ہے بے قراری

ہیں آج افسردہ اہلِ دانش ، فلک سے ایسا ستارا ٹوٹا
زمانہ کرب و الم میں ڈوبا ، فضا پہ طاری ہے سوگواری

وہ ٹوٹے لوگوں کا حوصلہ تھے، وہ دینِ برحق کی اک صدا تھے
سبھی سے شفقت سے پیش آتے ، تھی ان کی پہچان انکساری

وہ طالبینِ علومِ نبوی کے میزباں تھے ، وہ قدر داں تھے
وہ وارثِ علمِ مصطفیٰ تھے ، عجیب تھی ان میں وضع داری

انھوں نے اکّل کوا میں علم و ہنر کا ایسا چمن سجایا
جو کر رہا ہے زمانے بھر میں علومِ قرآں کی آب یاری

ہزاروں مکتب ، ہزاروں مسجد ، کئی ادارے ترا اثاثہ
سکھائی لاکھوں سے زیادہ بچوں کو تم نے اے شیخ شہسواری

حذیفہ وستانوی سا عالم تمھارا وارث ، جگر کا ٹکڑا
ہے جاری تیری وفات سے شیخ ان کی آنکھوں سے اشکباری

نہیں ہے اب تاب ضبطِ غم کی ، انس یہ دل دوز حادثہ ہے
تو ان کے مرقد کو یا الہی بنادے جنت کی اک کیاری!

از قلم: محمد انس قاسمی بجنوری
مرکز دارالایمان علی پورہ جٹ ضلع بجنور