Скачать или смотреть Manan Ella | මනං ඇල්ල - ඇහැලියගොඩ | කොළඹට ලග සොදුරුතම දිය ඇල්ලක් |

මනං ඇල්ල

කොළඹ සිට ඉතා අඩු කාලයකදී ලගා විය හැකි නගරයක් වන ඇහැලියගොඩ පිහිටි සොදුරු දිය ඇල්ලක් වන "මනං ඇල්ල" නැරඹීම සදහා අප කථිකා කර ගත්තේ ඇහැලියගොඩ සංචාරයේ ආරම්භයේදීම යි. නමුත් අතරමගදී මුණ ගැසුණු සොදුරු කලා කරුවකු වන සෝමදාස ලේචමගේ මහතා සොයා යාමට සිදු වූයේ ඇහැලියගොඩ ගම්වාසීන් ඔහු පිළිබද පැවසූ කරුණු කාරණා අනුව අප සිත් තුල හට ගත් කුතුහලය අකා මකා කර ගැනීමටයි.

කෙසේ වෙතත් සෝමදාස මහතාට සමු දුන් අප ගමන් කලේ "මනං ඇල්ල" පිහිටි ඉසව්වටයි. වෙනස්ම සහ සොදුරුතම මාර්ගයකින් ගමන් කල අපට කුඹුරු යායන් මැදින් සහ සපත්තු පාලම් මතින් ගමන් කරන්නට සිදු වූයේ ඈත පිටිසර ගම්මානයකදී දැනෙන්නා වූ හැගීමක් හදවතට එක් කරවමිනු යි. එම මාර්ගයේ වාහනයකින් යා හැකි දුර ගමන් කල පසු අවසානයේ ලගා වූයේ "හිච්චිවත්ත අත්තාගේ" නිවස අසලටයි. වයසින් මුහුපුරා ගියත් හදවතින් තරුණ "හිච්චිවත්තේ අත්තා" අපගේ ආරාධනයකින් තොරවම මනං ඇල්ලට යන අඩි පාර පෙන්වීමට පැමිණියේ ඇහැලියගොඩ තම උපන් ගම කරගත් මිනිසුන්ගේ ආගන්තුක සත්කාර පිළිබදව සාක්ෂි සාධක සපයමිනුයි.

මනං ඇල්ලෙන් කඩා හැලෙනා සීතල දිය දහර ගලා යන ඇල පහරේ වතුර මට්ටම වැඩි වී තිබුනේ පැවැති මද වර්ශාවක් හෙයිනි. ඇල පහරින් එගොඩ වූ අප නැවතත් ඉහලට ගමන් කලේ පෙද පාසි වලින් වැසී ගිය ගල් සහ ගස් වලින් පිරී ගිය සොදුරු වූ වනමං පෙතක් පසු කරමිනි. තද කොල පැහැති ගහ කොල අතරින් වැටී ඇති ඇල පහරේ ඇති කුඩා ගල් මුල් වල හැපෙමින් පෙන කැටි නංවමින් ගලා බසිනා සුදෝ සුදු වන් දිය දහර සැබැවින්ම මනස්කාන්තය.

ශ්‍රී ලංකාව කෙතරම් සොදුරු පාරාදීසයක් දැයි කීමට මේ සංචාරය පමණක්ම සෑහේ යැයි විටෙක මා හට සිතේ. සොදුරු වන වැස්මකින් වැසුණු සීතල දිය දහරක් ගලා යන මෙබදු තෝතැන්නක් කොළඹට ආසන්න පෙදෙසක තිබීමත් සැබැවින්ම අරුමයකි. ගම්වාසීන් සහ මින් පෙර එහි පැමිණි සංචාරකයින් මෙම පරිසරයට කිසිදු හානියක් සිදු නොකොට තිබීම සැබැවින්ම වර්ණනාවට ලක් කල යුතුය.

පැය කාලක පමණ පා ගමනකින් අනතුරුව අප ලගා වූයේ "මනං ඇල්ල" සමීපයට යි. කොටස් තුනකට කඩා හැලෙනා මනං ඇල්ල ඒ වන විට පැවති වර්ශාවෙන් පෝශණය වී කඩා හැලෙන්නේ අවට පරිසරයම හිරිකඩ දූවිල්ලකින් වසාගෙන යි. දිය ඇල්ල සමීපයට යන අඩි පාර දෙපස ඇති නෙලූ ශාඛ සහ තවත් මීවන ශාඛ සුළගට ඒ මේ අතට නැළවෙන්නේ දිය ඇල්ල ආසන්නයේ ඇති සොදුරු රග මඩලකට සමාන පෙනුමක් සහ සුන්දරත්වයක් නෙත් මානයේ මවා පාමිනි. සීතල සුළගේ පාවී අවුත් සිරුරේ දැවටෙනා සීතල හිරිපොද ගමන් වෙහෙස නිවන්නට සොබාදහමෙන් ලබා දෙන්නා වූ ඔසුවක් වැනිය.

පැය ගනණාවක් මේ සොදුරු ඉසව්වේ ගත කල අප දිය ඇල්ල ඉහලට ගමන් කිරීමට තීරණය කලද වර්ශාවේ දැඩි වීම හේතුවෙන් ඒ අදහස වෙනත් දිනයක සඵල කරගැනීමට පිඹුරු පත් සකසා දිය ඇල්ලට සමු දී නැවතත් ඇල පාර දිගේ පහලට බැස ගත්තේ දිය නා ගැනීමට සුදුසු තැනක් සොයාගෙනයි.

සොභාවිකවම සැදුනු තටාකයකට සමාන තැනෙක දියට පැන ගත් අප පැයක පමණ කාලයක් ඒ මේ අත ඇවිද යමින් පිහිනමින් රාත්‍රි වන තුරුම කාලය ගත කලේ කාලයකට පසුව හමු වූ සොදුරු තෝතැන්නක් අතැර දමා නැවතත් කලබලයෙන් ජීවන අරගලයකට එහා මෙහා දුවනා මාර්ග තදබදය පිරුණු කොළඹට ඒමට තිබූ අකමැත්ත නිසාවෙනි.

කෙසේ වෙතත් ඇහැලියගොඩින් ඉඩංගොඩට පැමිණි අප,ඉඩංගොඩින් රත්නපුරය දක්වා ගමන් කොට රත්නපුර සුමන සමන් දේවාලය වැද පුදා ගෙන ඇහැලියගොඩ කේන්ද්‍ර කරගත් සංචාරයේ පලමු අදියර අවසාන කලේ තවත් දිනෙක ඇහැලියගොඩ ප්‍රදේශයේ සංචාරය කිරීමට කථිකා කරගනිමිනු යි.

රුප රචනාවෙන් මුනගැහෙමු.

ආයුබෝවන් මම දිනේෂ්.

➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖
Instagram -   / dinesh_a_pathum  
➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖

“Copyright @ [Dinesh A Pathum 2023]. Any illegal reproduction of this content will result in immediate legal action.‼️“