DADOLIN MAUBERE FOHO || Poezia Liurai Aifunan

DADOLIN MAUBERE FOHO
Poezia Liurai Aifunan

Imajem Iha Video Kotuk Ne'e, Aman David nuudar Sobrevivente ida husi Suku Mau-Chiga

Music : Flowing Ambient - SergePavkinMusic
Link :    • Free Music / Cinematic Background Mus...  


Natureza Halerik liu husi Anin tatoli
Liberdade Tanis Hakilar husu Nia sentidu
Lafaek-Lulik la lian Tanis ho nonok
Ema mak Nia Hili Matenek duni iha hakerek
Liman hakerek mesak buat makerek
Bulak Dalan ninin mós bele sai Ukun-Na'in
Demokrasia mak Razaun hodi hatan iha lian

Tamba Ukun Luta-na'in haluha Nia naran
Haluan liras loke Biban buka Belun foun
La preokupa Ó ne'e se, Karik Traidor ida !?
Haluha tiha Ó Nia Pasadu mai hamutuk ita fahe ukun
Importante mak Ó iha kbiit lori Ha'u ba manan
Hanesan Asu Ne'ebé Hadomi Nia Na'in hatenu Nia viziñu
Se mak iha Ha'u Nia kotuk Nia mak hetan Biban

Tamba Matenek hotu iha hakerek
Halibur malu hakerek, hakerek malu sai makerek
La Koñese Se mak Luta-na'in ba Ukun-Rasik-An
La Koñese se mak Traidor ba Ukun-Rasik-An
Tetu ba dasi hotu-hotu hanesan mesak Ukun-Na'in
La Tauk sai Maulambe, Tauk Liu mak lakon kadeira
Ba Ne'ebé lian ne'e husu, husi Ne'ebé lian ne'e simu
Wainhira Maksatan maksaran maksobak rame-rame !?

Komprimisu Domin bé uluk hafanu klamar Nia brani
Pinta ho letra iha pájina Lulik nuudar prinsipiu Maubere
Wainhira Ukun-Rasik-An Povu mak tenki Moris diak uluk
Realidade kleuk...
karik tamba uluk Ibun loke La'oS fuan mak haruka...
Kabun-tek sira bé uluk la fiar vitoria ne'e sei mai
Dau-daun tur meza Redondo desidi Nasaun nia Destinu

Tabaku Batar-kulit horut Kafé Moruk
Sukit sai Memoria bé hela de'it historia
Ba Ha'u Belun diak bé uluk istima malu Kamarada
Oras ne'e iha Sidade tur kadeira osan mean
Karik haluha ona Ha'u tamba Belun foun gravatadu
Labele haluha ita Nia prinsipiu Ukun-Rasik-An
Tamba Ha'u lakohi ita Nia Oan Bolu Ó Maulambe

Iha Dalan ba To'os, Maubere foho hananu
Uluk maubere metin la namlele iha prinsipiu
Maski nakukun Falun-metin, nafatin Metin liman-karuk
Oras ne'e Ai-Knanoik la furak ona iha fihir
Tamba ukun ho Osan sona Borus prinsipiu