Ghéni Ketti (Mersiye)
Hey Hayat ! Bu hayat shundaq bir hayatki, insan hozurigha ömür yetmes, Azabigha adem ölmes, sirlirigha eqil yetmes ! Ölüm bashqa kelgende bolsa adem shuqeder nailaj, bichare ikenki, « biraz texir qil, men hazir emes » déyelmes. Berheq, dunyagha kelgenkenmiz, ketmey qalmaymiz. Axiret sepirige beziler ilgirirek, yene bezilirimiz kéyinrek yol alimiz. Eng qedirlik kishilirimizdin waqitsiz ayrilish insanning pütkül wujudini chirmaydighan azabliq tuyghu. Hesritina.
Bir heptidin ashti. Yürek parem, hayatim qizim Dilfuruz xushchaqchaq, méhriban, qedirlik dadisi Ghéni Emetning üshtumtut wapatidin elem bilen yighlawatidu. Qizim dadisidin ayrildi. Men hayatimdiki eng yéqin sirdishimdin, rohiy yölenchükimdin ayrildim.
Ghéni Emet 1965-yili 5-ayning 2-küni Ürumchide tughulghan. 2024-yili 8-ayning 23-küni Jüme jiddiy yürek muskuli tiqilmisi körülüp, qutquzush ünüm bermey, 59 yéshida bu dunya bilen widalashti.
Ghéni ata-anilirining wapadar oghli, ini-singillirining köyümchan, hazir-jawab akisi idi. Dostliri üchün sadiqliqi, merdliki hem chinliqi bilen hörmetke sazawer, ishenchlik dost idi. Ghénining muhajirettiki dostliridin bireylen bu qayghuluq xewerni anglap, Ghéning wapatigha qayghurup, « … Ghéni aqköngül, wetenperwer zat idi… » dep yéziptu.
Ghéni Emet bundin 21 yil ilgiri yawropagha kelip ketkenidi. Eyni chaghda özining muhajirette yashiyalmaydighanliqini chüshendürüp shundaq dégini ésimde :« Men ata-anam aldida perzentlik burchumni ada qilmay, ukilirim aldida akiliq mes’uliyitimni ötümey, uyghurlirim bilen hemnepes bolmay qandaqmu chet’ellerde yüreleymen. Men ana yurtumning hawasi bilen nepes almisam, tupriqigha dessimisem yashiyalmaymen, konsul kochiliridiki nur yüzlük moysipitlirimizni körüp turmisam chidimaymen, hetta kochilardiki baqqallar, tilemchilermu manga söyümlük tuyulidu… »
Ghéni öz tallishi bilen ish körüp, wetende yashidi. Mana emdi hemmeylenni, wetende bolsun yaki chet’ellerde yashawatqanlar bolsun, uruq-tuqqan, dost-burader hemmeylenni razi qilip hem hesrette qoyup kétip qaldi. 59 yil ilgiri kindik qéni tökülgen ana tupraqqa, özige teelluq zimin’gha qaytip kirip yatti.
Insan bu dunyagha kimlerdin we nelerde apiride bolidighanliqini bilmiginidek, bu dunyadin qachan, qandaq kétip qalidighanliqini hem bilmeydu. Shek –shübhisizki yaxshi insanlarning ölümimu yaxshi uzutilidu. Ghéni ketti, shunche köp kishiler hesretlinip yash tökti. Qizimiz Dilfuruz bolsa menggülük séghinish hijran azablirigha tutuldi …Nime dégülük ? Elekmolla ! Alladin kelgen’ge insan « Elekmolla », « Elhemdullillah » démektin özge yol tapqan emesqu !?
Alladin töwen qulluq bilen tileymizki, merhum Ghéni Emetning makani nurlar ichide bolsun ! Allahim merhumning bilip-bilmey ötkügen gunahlirini meghpiret qilghayla ! Dowzaq azabliridin saqit qilghayla ! Firdews jennetlerdin orun bergeyla ! Qizim Dilfuruz Ghénining dadisidin waqitsiz ayrilishazabida köyüwatqan yüreklirige melhem bergeyla Allahim!
Elwida Ghéni, lékin bekmu baldur kétiwaldingiz-he ?! Hesritina….
2024-yili 31-awghust, Jenve. Shiwitsariye.
غېنى كەتتى (مەرسىيە)
ھەي ھايات !
بۇ ھايات شۇنداق بىر ھاياتكى، ئىنسان ھوزۇرىغا ئۆمۈر يەتمەس، ئازابىغا ئادەم ئۆلمەس، سىرلىرىغا ئەقىل يەتمەس ! ئۆلۈم باشقا كەلگەندە بولسا ئادەم شۇقەدەر نائىلاج، بىچارە ئىكەنكى، « بىراز تەخىر قىل، مەن ھازىر ئەمەس » دېيەلمەس. بەرھەق، دۇنياغا كەلگەنكەنمىز، كەتمەي قالمايمىز. ئاخىرەت سەپىرىگە بەزىلەر ئىلگىرىرەك، يەنە بەزىلىرىمىز كېيىنرەك يول ئالىمىز. ئەڭ قەدىرلىك كىشىلىرىمىزدىن ۋاقىتسىز ئايرىلىش ئىنساننىڭ پۈتكۈل ۋۇجۇدىنى چىرمايدىغان ئازابلىق تۇيغۇ. ھەسرىتىنا.
بىر ھەپتىدىن ئاشتى. يۈرەك پارەم، ھاياتىم قىزىم دىلفۇرۇز خۇشچاقچاق، مېھرىبان، قەدىرلىك دادىسى غېنى ئەمەتنىڭ ئۈشتۇمتۇت ۋاپاتىدىن ئەلەم بىلەن يىغلاۋاتىدۇ. قىزىم دادىسىدىن ئايرىلدى. مەن ھاياتىمدىكى ئەڭ يېقىن سىردىشىمدىن، روھىي يۆلەنچۈكىمدىن ئايرىلدىم.
غېنى ئەمەت 1965-يىلى 5-ئاينىڭ 2-كۈنى ئۈرۇمچىدە تۇغۇلغان. 2024-يىلى 8-ئاينىڭ 23-كۈنى جۈمە جىددىي يۈرەك مۇسكۇلى .
......تىقىلمىسى كۆرۈلۈپ، قۇتقۇزۇش ئۈنۈم بەرمەي، 59 يېشىدا بۇ دۇنيا بىلەن ۋىدالاشتى.
..........
غېنى كەتتى، شۇنچە كۆپ كىشىلەر ھەسرەتلىنىپ ياش تۆكتى. قىزىمىز دىلفۇرۇز بولسا مەڭگۈلۈك سېغىنىش ھىجران ئازابلىرىغا تۇتۇلدى …
نىمە دېگۈلۈك ؟ ئەلەكموللا ! ئاللادىن كەلگەنگە ئىنسان « ئەلەكموللا »، « ئەلھەمدۇللىللاھ » دېمەكتىن ئۆزگە يول تاپقان ئەمەسقۇ !؟
ئاللادىن تۆۋەن قۇللۇق بىلەن تىلەيمىزكى، مەرھۇم غېنى ئەمەتنىڭ ماكانى نۇرلار ئىچىدە بولسۇن ! ئاللاھىم مەرھۇمنىڭ بىلىپ-بىلمەي ئۆتكۈگەن گۇناھلىرىنى مەغپىرەت قىلغايلا ! دوۋزاق ئازابلىرىدىن ساقىت قىلغايلا ! فىردەۋس جەننەتلەردىن ئورۇن بەرگەيلا !
قىزىم دىلفۇرۇز غېنىنىڭ دادىسىدىن ۋاقىتسىز ئايرىلىشازابىدا كۆيۈۋاتقان يۈرەكلىرىگە مەلھەم بەرگەيلا ئاللاھىم!
ئەلۋىدا غېنى، لېكىن بەكمۇ بالدۇر كېتىۋالدىڭىز-ھە ؟!ا….
Информация по комментариям в разработке