Bertso saioa (1) (Leitza, 2021-07-10) (29'54'')

Bertso saioa burutu da Leitzako plazan. Sei protagonista izan dira oholtza gainean: Julio Soto, Miren Amuriza, Iker Zubeldia, Aitor Mendiluze eta Xabat Illarregi bertsolariak Ane Intxausti gai-jartzailearen esanetara. Haserako agurraren ostean, beste honako gai hauek ikusi eta entzun ahal izango dituzu lehen bideo honetan: 1-Bostak. Aurten txapelketa urtea da Nafarroan. Bina bertso. Lehenengoan, txapelketako saio baten aurretik dituzten mania, erritual, ohiturak… jasoko dira bertsoan. Bigarrenean, berriz, txapelketako saio baten ondoren dituztenak. 2-Aitor eta Miren. Guraso-alabak dira. Aitorrek taberna du baina jubilazioa ere laister helduko da. Miren langabezian dago. Aitak taberna eskaini dio alabari baina honek ez du ezer jakin nahi. 3-Xabat eta Julio. Biak bi nafar ez euskaldunak dira. Oposaketa batera aurkeztu dira. Juliok alemaniera ikasi berri du, eta Xabatek, euskara. Juliok puntu gehiago ditu oposaketetan Xabatek baino.