Скачать или смотреть MBÒOTUM KHASSIDA WAKANA HAQQAN / Par Serigne Ahmadou Mbacké Darou Moukhty

𝗪𝗔𝗞𝗔𝗔𝗡𝗔 𝗛𝗔𝗞𝗛𝗔𝗡 𝗛𝗔𝗟𝗔𝗬𝗡𝗔𝗔 𝗡𝗔𝗦𝗥𝗨𝗟 𝗠𝗢𝗨𝗠𝗜𝗡𝗜𝗜𝗡𝗔

Wakaana Hàqan, bokk ci Qasida yi nga xam ne Boroom Tuubaa ngi ko taalife ca Gànnaar (Mauritanie) ci dëkk bu ñuy wax Xomaag. Mu tënké ko ñatti aaya ci Àlxuraan, benn bi mooy "WAKAANA HÀQAN gi nekk ci mujjug aaya 46 ci saaru Rom, beneen bi mooy "FALAA TAHLAM NAFSUN MAA UXFIYA..." ca saaru Sajda, ayya 16, bi ci topp mooy "FASTAJAABA LAHUM..." gi nekk ci saaru Aali Imraan.

Mu taalif ko ci fukki fan yi mujj ci weeru Koor, ci atum 1323H dëpóog atum 1905 ci atum nasaraan.

Muy Qasida gog Sëriñ baa ngi ko woye ci bahru Rajaz, muy Qasidag ñaan ak déeyaaleeg sunu Boroom, ak sant sunu Boroom.

Muy Qasida gu yéemé lool, te bari njariñ lool, te bari ay xarbaax, ni ko Sëriñ bi waxee ci biir Qasida gi
أسأله كون ته القصيدة □ خارقة لعادة مفيدة

Yan sabab moo tax Sëriñ bi bind Wakaana Haqan ?
Sabab yi tax Boroom Tuubaa taalif Qasida gi nak, jamono yi mu nekkee Gànnaar, jafe jafe yu bari da faa amoon ci diggante ñi yor Réew ma, ak lenn ci waa dëkk ba, rawatina kilifa diiné yi. Ñu daan léen bunduxatal ak di léen teg ay coono yu meti, bañ demee ba xat-xat yi tar lool nak, ci lañ dogu ci ne da ñuy def ab délégation dem ci Xaadimu Rasuul ngir jàmbat ko séeni jafe-jafe, ak sàkku ci moom mu defal léen ci ñaan.

Bi ñu aksee Xumaag ci Sëriñ bi, ba wax ko séen soxla, fekk amna ci ñoom (délégation bi) ku tudd Abdul Laahi Ibn Abiihi, moom dafa géntoon gis Sëriñ Tuubaa, mu taalif Qasida goo xam ne « Wakaana Hàqan » la ko tënké, di ci ñaanal jullit ñi.

Bi ñu ñëwée, ba wax séen soxla ba noppi, ci la Abdul Laahi dàl di nettali Sëriñ bi li mu gént, ci la Sëriñ Tuubaa ne bërét fi mu togoon, jog duggu ci biir, def fa diir bu gàtt dàl di génnaat, indi Qasida gi muy mbind mu tooy xepp.

Mootax Sëriñ Muhàmadul Amiin Joob neena « li ci gëna yéemé mooy, xamuñ woon ndax Sëriñ bi da koo bindoon deñci ko di léen xaar, wala diir bi mu duggé ci biir la ko bind. Waaye daal lu ci man di xew xarbaax la, ndax xam nañ ne diir bi mu duggée ci néeg bi, ak bi mu génnée, bind fi Qasidag 150 wala 152 bëyit (soo ci limaale « Azhabta yiñ ci baamu) xaju fi ».

Yan njariñ la Qasida gi am ?
Bokk na ci ay njariñam Sëriñ bi ñaan na sunu Boroom ne « képp kuy jàngg Qasida gi, na nga ko defal xéewal yu kawe njort »
منّ على قارئ ذي الحروف □ بما يفوق الظنّ من معروف

Qasida gi day indi jàmm ci am réew ak ci ki koy jàngg, day yokk ay xéewal, ku koy jàngg doo ñàkk dépense, barab bañ koy jànggee du bekkoor mukk.

Am na doomi Sëriñ Tuubaa ju masa gis benn taalibé bu koy jàngg, mu laaj ko «lu tax ngay jàngg Qasida gi ?»
Taalibé ba ne ko «da maa jubu rek, mootax ma koy jàngg»
Mu ne ko «Qasida gi de ku mu jubu ku ne, Sëriñ Tuubaa jubu na la»

Ci xalimag Akb Majalis