Скачать или смотреть నర్సీపట్నంలో నూకాలమ్మ అమ్మవారి పునః ప్రతిష్ట మహోత్సవాలు ఘనంగా! | Prime9 Vizag

#prime9vizag #narsipatnam #devotionalfestival #religiouscelebration


నూకాలమ్మ అమ్మవారి ఆలయ పునఃప్రతిష్ట లో స్పీకర్

నర్సీపట్నంలో దేవాదాయ ధర్మాదాయ శాఖ ఆధ్వర్యంలో శ్రీ నూకాలమ్మ అమ్మవారి దేవాలయ పునఃప్రతిష్ట మరియు కలశ స్థాపన మహోత్సవాలు మంగళవారం అంగరంగ వైభవంగా ప్రారంభమయ్యాయి. మార్చి 10వ తేదీ నుంచి 12వ తేదీ వరకు మూడు రోజుల పాటు జరగనున్న ఈ వేడుకలు ఆంధ్రప్రదేశ్ రాష్ట్ర శాసనసభాపతి చింతకాయల అయ్యన్నపాత్రుడు పూర్తి పర్యవేక్షణ, సహకారంతో అత్యంత శోభాయమానంగా సాగుతున్నాయి. మొదటి రోజు యాగశాల ప్రవేశం, విఘ్నేశ్వర పూజ, పుణ్యాహవాచనం, పంచగవ్యం, అఖండ దీపారాధన తదితర విశేష కార్యక్రమాలను వేదపండితులు శాస్త్రోక్తంగా నిర్వహించారు. ఈ కార్యక్రమాల్లో స్పీకర్ చింతకాయల అయ్యన్నపాత్రుడు, సతీమణి కౌన్సిలర్ పద్మావతి, టీడీపీ రాష్ట్ర ప్రధాన కార్యదర్శి చింతకాయల విజయ్, కౌన్సిలర్ చింతకాయల రాజేష్ తదితరులు భక్తిశ్రద్ధలతో పాల్గొన్నారు. పెడపర్తికి చెందిన యాగ బ్రహ్మ, శైవాగమ కిషోర్, ఆగమ భాస్కర యాగకేసరి బ్రహ్మశ్రీ యలమంచిలి కృష్ణమూర్తి, శివాచార్య బృందం ఆధ్వర్యంలో ఈ మూడు రోజుల దీక్షా కార్యక్రమాలు జరుగుతున్నాయి. పూజా కార్యక్రమాల అనంతరం స్పీకర్ చింతకాయల అయ్యన్నపాత్రుడు మాట్లాడుతూ ఆలయ నిర్మాణ విశేషాలను వివరించారు. నర్సీపట్నం ప్రజలందరి ఇలవేల్పు అయిన నూకాలమ్మ వారి ఆలయ నిర్మాణాన్ని ఆరు సంవత్సరాల క్రితమే ప్రారంభించామని, అప్పట్లో తాను పది లక్షల రూపాయలు డిపాజిట్ చేయగా ప్రభుత్వం 40 లక్షలు మంజూరు చేసిందని, మొత్తం 50 లక్షలతో పనులు మొదలుపెట్టామని తెలిపారు. అయితే గత ప్రభుత్వం ఆలయ నిర్మాణాన్ని అశాస్త్రీయంగా, ఇష్టానుసారంగా సగం చేసి వదిలేసిందని ఆయన విమర్శించారు. గత ప్రభుత్వ హయాంలో గుడి నిర్మాణం ఆగిపోయిందని చెప్పి సీఎంఆర్ షాపింగ్ మాల్ వారి వద్ద నుంచి పది లక్షల రూపాయలు తీసుకున్నారని, కానీ ఆ డబ్బులు ఆలయ అకౌంట్‌లో జమ చేయకుండా పక్కదారి పట్టించారని ఆరోపించారు. అమ్మవారి సొమ్ము తిన్నవారు బాగుపడరని ఆయన హెచ్చరించారు. తిరిగి తమ ప్రభుత్వం వచ్చిన తర్వాత దేవాదాయ శాఖ మంత్రిగారితో మాట్లాడి మరో 10 లక్షలు డిపాజిట్ చేసి 40 లక్షలు నిధులు తెచ్చామని స్పష్టం చేశారు. అలాగే ఆలయంలో మిగిలిన పనులు పూర్తి చేయడానికి అదనంగా మరో 25 లక్షల రూపాయలు అవసరమవుతాయని, అందుకోసం ఐదు లక్షలు మళ్లీ డిపాజిట్ చేస్తున్నామని వెల్లడించారు. పది కాలాల పాటు నిలిచిపోయేలా శాస్త్రోక్తంగా అమ్మవారి ప్రతిష్టా కార్యక్రమాలు జరిపిస్తున్నామని ఆయన పేర్కొన్నారు.
​ఈ నెల 12వ తేదీ గురువారం ఉదయం 9.14 నిమిషాలకు యంత్ర విగ్రహ ప్రతిష్టలు, శిఖరం నుండి బూరెలు పోయుట, అన్నదానం తదితర కార్యక్రమాలు జరగనున్నాయని అయ్యన్నపాత్రుడు తెలిపారు. ఇందులో భాగంగా బుధవారం సాయంత్రం 5 గంటలకు నర్సీపట్నంలోని మొత్తం 20 వార్డుల నుంచి పెద్ద ఎత్తున మహిళలు పసుపు నీళ్లు, బిందెలతో తరలివచ్చి అమ్మవారికి అభిషేకం చేయాలని ఆయన పిలుపునిచ్చారు. అలాగే మార్చి 12 నుంచి 18వ తేదీ వరకు కొత్త అమావాస్య జాతర మహోత్సవాలు జరుగుతాయని, ఏప్రిల్ 1వ తేదీన మర్రిడమ్మ పండుగను కూడా ఎంతో వైభవంగా నిర్వహిస్తామని ఆయన ప్రకటించారు. ఈ మూడు రోజుల పాటు జరిగే అమ్మవారి పునఃప్రతిష్టా మహోత్సవాలకు భక్తులు పెద్ద సంఖ్యలో విచ్చేసి అమ్మవారి కృపకు పాత్రులు కావాలని కోరారు. ఈ కార్యక్రమంలో ఆలయ కమిటీ చైర్మన్ శ్రీనివాస్, టిడిపి కౌన్సిలర్లు ముఖ్య నేతలు, భక్తులు, కమిటీ సభ్యులు పాల్గొన్నారు.

| Subscribe |
| Prime9 Vizag |