Скачать или смотреть មេផ្សារហ៊ុន៖ ថ្លៃភាគហ៊ុនស្ទើរតែទាំងអស់ កំពុងជួញដូរក្នុងថ្លៃទាប ជាឱកាសសម្រាប់អ្នកវិនិយោគក្លាយជា...

មេផ្សារហ៊ុន៖ ថ្លៃភាគហ៊ុនស្ទើរតែទាំងអស់ កំពុងជួញដូរក្នុងថ្លៃទាប ជាឱកាសសម្រាប់អ្នកវិនិយោគក្លាយជាម្ចាស់របស់ក្រុមហ៊ុនល្អៗ ក្នុងថ្លៃពិសេស ដើម្បីចំណេញក្នុងពេលខាងមុខ (Video inside)

(ភ្នំពេញ)៖ លោក ហុង សុខហួរ ប្រតិភូរាជរដ្ឋាភិបាលទទួលបន្ទុក ជាអគ្គនាយកផ្សារមូលបត្រកម្ពុជា បានលើកឡើងថា ថ្លៃភាគហ៊ុនស្ទើរតែទាំងអស់ នាពេលបច្ចុប្បន្ន កំពុងជួញដូរក្នុងថ្លៃទាប ដែលជាឱកាសសម្រាប់អ្នកវិនិយោគ ក្លាយជាម្ចាស់របស់ក្រុមហ៊ុនល្អៗ ក្នុងថ្លៃពិសេស ដើម្បីចំណេញក្នុងពេលខាងមុខ។

ការលើកឡើងបែបនេះ ធ្វើឡើងក្នុងឱកាសដែល លោក ហុង សុខហួរ អញ្ជើញចូលរួម ក្នុងកម្មវិធីពីព័រណ៍ផ្សារភាគហ៊ុនកម្ពុជា «My Frist STOCK» នៅផ្សារទំនើប AEON Mall ភ្នំពេញ នៅថ្ងៃទី២៨ ខែវិច្ឆិកា ឆ្នាំ២០២៥។

បើតាមអគ្គនាយកផ្សារមូលបត្រកម្ពុជា, ថ្លៃភាគហ៊ុនស្ទើរតែទាំងអស់ បច្ចុប្បន្ននេះ កំពុងតែត្រូវបានជួញដូរក្នុងថ្លៃទាប ដូចនេះយើងអាចក្លាយជាម្ចាស់ របស់ក្រុមហ៊ុនល្អៗបាន ក្នុងថ្លៃពិសេស។ លោក ហុង សុខហួរ បានថ្លែងថា «នេះគឺជាឱកាសមាសរបស់យើងនៅទីនេះ ព្រោះថ្លៃ ភាគហ៊ុនអាចនឹងឡើងថ្លៃវិញ ក្នុងពេលខាងមុខ ដូចខ្ញុំធ្លាប់បាននិយាយថា ទិញហ៊ុន ក៏អាចក្លាយជាអ្នកមានបានដែរ»។

ជាមួយគ្នានេះ លោក ហុង សុខហួរ ក៏សូមបន្តលើកទឹកចិត្តឱ្យវិនិយោគិនចាស់ មានការអត់ធ្មត់បន្តិចទៀត កុំទាន់លក់ភាគហ៊ុននាពេលនេះ ប្រសិនបើមិនមានតម្រូវការសាច់ប្រាក់បន្ទាន់ ព្រោះលោកសង្កេតឃើញថា វិនិយោគិនធំមួយចំនួនកំពុង ប្រមូលទិញភាគហ៊ុនទុក ដើម្បីសន្សំ ឬដើម្បីទុកលក់វិញនាប៉ុន្មានឆ្នាំខាងមុខ ព្រោះពួកគាត់យល់ឃើញថាថ្លៃ ហ៊ុនមានតម្លៃធូរថ្លៃខ្លាំង ហើយមានឱកាសនៃការឡើងថ្លៃខ្លាំងនាពេលខាងមុខ។

លោក ហុង សុខហួរ សូមស្នើសុំភ្ញៀវកិត្តិយសទាំងអស់ និងទស្សនិកជននៅតាមប្រព័ន្ធអនឡាញ សាកល្បងទាញយកកម្មវិធី CSX Trade ដើម្បីបើកគណនីជួញដូរ និងសាកល្បងវិនិយោគ ជាមួយផ្សារហ៊ុនទាំងអស់គ្នា។

ទន្ទឹមគ្នានេះ លោក ហុង សុខហួរ បានឲ្យដឹងថា ផ្សារមូលបត្រកម្ពុជា មានក្រុមហ៊ុនចុះបញ្ជី១១ ផ្នែកមូលបត្រកម្មសិទ្ធិ និងក្រុមហ៊ុនលក់មូលបត្របំណុលមានចំនួន ១៤ ក្រុមហ៊ុន ដែលបានប្រមូលទុនពីលើទីផ្សារ ប្រមាណ៦៥០លានដុល្លារ និងបានចុះបញ្ជីក្នុងផ្សារមូលបត្រកម្ពុជា។

លោកបន្ដថា ក្រឡេកទៅមើលចំនួនវិនិយោគិនរបស់យើងវិញ បានកើនឡើងយ៉ាងច្រើន នាប៉ុន្មានខែចុងក្រោយនេះ ដែលគិតមកត្រឹមបច្ចុប្បន្ន យើងមានគណនីជួញដូរ សរុប៦៨,២៦៣គណនី ហើយគិតត្រឹមចុងខែតុលានេះ ហើយរហូតដល់ដំណាច់ឆ្នាំ ២០២៥ ចំនួនគណនីនឹងកើនដល់ជាង ៧ម៉ឺនគណនី។

បើក្រឡេកទៅមើលទំហំជួញដូរវិញ លោក ហុង សុខហួរ សម្លឹងឃើញថា ប៉ុន្មានឆ្នាំនេះ យើងនៅស្ថិតក្នុងនិន្នាការនៃការធ្លាក់ចុះ ប៉ុន្តែលោកជឿជាក់ថា ២០២៥ ជាឆ្នាំចុងក្រោយនៃ ការធ្លាក់ចុះនេះហើយ ដោយសារកំណើន និងចំណាប់វិនិយោគីនថ្មីៗ ការបន្តទទួលបានទំនុកចិត្តពីវិនិយោគិន ចាស់ៗ ទាំងវិនិយោគិនក្នុងស្រុក និងបរទេស ហើយនឹងការឈានជើងចូលទីផ្សាររបស់វិនិយោគិនធំៗមួយចំនួន៕