Скачать или смотреть တီးတိန်မြို့နယ်၊ထုတ်လိုင်ရွာမှာ စစ်ကော်မရှင်တပ်မှ ဗုံးကြဲ တာကြောင့် အဆောက်အဦး တချို့ ပျက်စီး

နို၀င်ဘာလ ၂၀ ရက်။

နိုဝင်ဘာလ ၂၀ ရက်နေ့ မနက် ၁၂ နာရီ အစောပိုင်းမှာ စစ်ကော်မရှင် လေတပ်မှ တီးတိန်မြို့နယ်၊ထုတ်လိုင်ရွာကို ဗုံးကြဲ တိုက်ခိုက်တာကြောင့် အခြေခံပညာ အထက်တန်း ကျောင်းဝန်း အတွင်းရှိ ဘော်ဒါဆောင် အပါအဝင် အဆောက်အဦး အချို့ နှင့် သာသနိက အဆောက်အဦး အချို့ ပျက်စီးခဲ့တယ် လို့ ဒေသခံများရဲ့ ပြောပြချက် အရ သိရှိရ ပါတယ်။

“ဗုံးကြဲလာတော့ သန်းခေါင် ကျော်နေပြီ။ ပထမ တကြိမ်က ၁၂: ၂၁ အချိန် ဖြစ်တယ်။ နောက် ၁၀ မိနစ် လောက် အကြာ ၁၂: ၂၂ လောက်မှာ ပေါက်ကွဲသံ ထပ်ကြားရတယ်။ ပေါက်ကွဲသံ ကြောင့် ကျွန်မတို့ နေအိမ်ဆို တုန်လှုပ်သွားတယ်။ အိမ်အောက်ခန်းက တံခါးတွေ၊ ပြတင်းပေါက်တွေ ရုတ်တရက် ပွင့်သွားတယ်။ သွပ်ပြားတွေလည်း အသံမျိုးစုံ ထွက်ပြီး အပေါက်တွေ ပြည့်သွားတယ်။ တညလုံး အိပ်လို့ မရတော့ဘူး” လို့ ထုတ်လိုင်ရွာရှိ အမျိုးသမီး တဦးက ပြောကြား ခဲ့ ပါတယ်။

စစ်ကော်မရှင် လေတပ်မှ ထုတ်လိုင်ရွာကို လေယာဉ် နဲ့ ဗုံး နှစ်ကြိမ် ကြဲချတာကြောင့် ထုတ်လိုင် အထက်တန်း ကျောင်းဝန်း အတွင်းရှိ ဘော်ဒါဆောင်ရဲ့ မိန်းခန်းမ၊ ရေချိုးဆောင် နှင့် စားဖိုဆောင်တို့ ပျက်စီးသွားကြောင်း၊ ထုတ်လိုင် AG ဘုရားရှိခိုးကျောင်း နှင့် AG Section ရုံး အဆောက်အဦး တို့လည်း ထိခိုက်သွားကြောင်း၊ ရွာထဲရှိ နေအိမ် အချို့လည်း ထိခိုက်ခဲ့ပြီး ပြည်သူများ အနေဖြင့် ထိခိုက်ဒဏ်ရာ ရှိတာမျိုး တော့ မရှိကြောင်း ဒေသခံများရဲ့ ပြောပြချက် အရ သိရှိရ ပါတယ်။

ထုတ်လိုင်ရွာဟာ တီးတိန်မြို့နယ် အတွင်းရှိ ရှေးကျသော ရွာကြီးတရွာ ဖြစ်ပြီး ၁၉၂၉ ခုနှစ်မှာ အစိုးရ အခြေခံ ပညာ မူလတန်းကျောင်း စတင် ဖွင့်လှစ်နိုင်ပြီး၊ ၁၉၄၇ ခုနှစ်မှာ အစိုးရ အခြေခံ ပညာ အထက်တန်းကျောင်း ရရှိခဲ့တဲ့ ရွာတရွာ ဖြစ်ပါတယ်။

ထုတ်လိုင် အခြေခံ ပညာ အထက်တန်းကျောင်း ဟာ ဘော်ဒါဆောင် အပါအဝင် ကျောင်းတွင်း အခြေခံ အဆောက်အဦး နှင့် ကျောင်း အင်္ဂါရပ် အပြည့်အစုံ ရှိတဲ့ မြန်မာပြည် လွတ်လပ်ရေး မရခင် တည်ဆောက် ဖွင့်လှစ်ခဲ့သော ချင်းတောင်ဒေသ၏ သမိုင်းဝင် အထက်တန်းကျောင်း တခုလည်း ဖြစ်ပါတယ်။