«រឿងមាយើង» បទកាកគតិ ស្មូតក្អែកលោតទី២ ចំនួន៧វគ្គ វគ្គទី១- ៧

១.មាយើងដាស់ស្តេច
ឆាប់មួយរំពេច
ទើបទូលទៅថា
បពិត្រស្តេចឡើង
ជវ័នអស្សា
ឆាប់ៗម្នីម្នា
ឥឡូវនេះនៃ។
២.ត្បិតមានទេពតា
និត្យនៅរក្សា
លើដើមព្រះជ្រៃ
ខឹងថាស្តេចនឹង
និយាយហើយនៃ
ផ្ទំលក់វឹងវៃ
ស្ងៀមស្ងាត់ភាសា។
៣.ខ្ញុំចាំស្តេចផ្ទំ
រលីវទៅខ្ញុំ
ឮពាក្យទេពតា
ស្តេចស្តាប់មាយើង
ស្ទុះឡើងអស្សពាហ៍
បំផាយម្នីម្នា
មាយើងដោយដិត។
៤.ក្សិណមែកព្រះជ្រៃ
ធ្លាក់ផុតក្សត្រថ្លៃ
ព្រះបាទព្រហ្មទត្ត
ស្តេចទៅរំលង
ពីភ័យមរណ៍ថ្វាត់
ទើបមានយើងគិត
ទូលទៅទៀតថា។
៥.បពិត្រព្រះភូ
ធររាជឥសូរ
នេះឯងមួយគ្រា
មួយទៀតខ្ញុំឮ
ពាក្យអស់ទេព្តា
ថាដល់សីមា
ព្រះអង្គនាយនោះ។
៦.នឹងកាច់ខ្លោងទ្វារ
សង្កត់ភូបាល
វឹងវិញទៀតសោត
ថាបើកន្លង
រំលងពីនោះ
លុះព្រះអង្គឆ្ពោះ
ចូលក្នុងបន្ទំ។
៧.នឹងប្រែកាឡា
ជាពស់មហិមា
ខាំក្សត្រឧត្តម
បពិត្រក្សត្រា
ទេពតាជំនុំ
ដូច្នេះនេះខ្ញុំ
ឮជាក់តែម្តង។