Скачать или смотреть TANI 50,000 ZA MBOLEA AINA YA DAP ZAINGIZWA NCHINI

Kampuni ya Mbolea Tanzania (TFC) imeingiza nchini zaidi ya tani 50,000 za mbolea aina ya Di Ammonia Phosphates (DAP) kwa ajili ya mahitaji kwa wakulima katika msimu huu wa kilimo.

Mkurugenzi Mkuu wa Kampuni ya Mbolea Tanzania (TFC), Bw. Samuel Mshote amesema Serikali imepokea meli aina ya BC Zoe kutoka nchini Saudi Arabia iliyopakia mbolea hiyo na kuwasili nchini mapema wiki hii.

Ameeleza kuwa lengo la Serikali ni kuhakikisha kuwa jumla ya tani 97,000 za mbolea aina ya DAP zinaingizwa nchini wakati awamu ya awali Kampuni hiyo imewasilisha tani 50,000 sawa na asilimia 60%.

“Tunawahakikishia Wakulima tunaendelea kuleta mbolea na kujiandaa na misimu mingine ijayo ya kilimo na sisi kama Kampuni ya Serikali tutahakikisha mbolea zote mkulima anazipata kutokana na msimu husika,” amesema Mkurugenzi Mshote.

Aidha amesema matumizi ya mbolea nchini yameongezeka kutoka tani 300,000 miaka mitatu iliyopita hadi kufikia tani 900,000 kwa mwaka na lengo kuu la Serikali ni kufikia matumizi ya mbolea zaidi ya tani 1,200,000 kwa mwaka kwa mbolea zote; huku Serikali imeazimia utengenezwaji wa mbolea kupitia viwanda vyetu vya ndani ili kupunguza wigo wa kuagiza nje ya nchi.