Скачать или смотреть தன் மறதியே துக்க கேடு FORGETFULNESS OF THE SELF IS THE  CAUSE OF SUFFERING

   டிசம்பர் 26        வெள்ளி               

         தன் மறதியே துக்ககேடு!


துக்கம் என்ற ஒன்று தனியாக இல்லை. நம் சொரூபத்தின் இயல்பு சச்சிதானந்தம், பேரானந்தம். உலகப் பொருள்களில் கிஞ்சித்தும் சுகம் இல்லை. சொரூப மறதியே துக்ககேடு. அதை சதா நினைவில் கொள்வது துக்க நிவர்த்தி.

—---------------------------------------------------------------------------------------------

            FORGETFULNESS OF THE SELF IS THE 

                            CAUSE OF SUFFERING


There is no such thing as SUFFERING alone. The NATURE of our SELF is SAT-CIT-ANANDAM, BLISS. There is not even little happiness in the worldly objects. FORGETFULNESS of the FORM is the CAUSE of SUFFERING. To remember that always is the cessation of SUFFERING.

—-------------------------------------------------------------------------------------------------

இன்பம் துன்பம் இரண்டும் இரட்டைகள். ஒன்றாகவே தோன்றி ஒன்றாகவே மறைபவை. ஒன்றை ஒன்று விட்டு ஒன்று பிரியாதவை. இன்பம் இருக்கும் இடத்தில் துன்பம் மறைபொருளாக வரும். அதுபோல துன்பம் நிலவும் இடத்தில் இன்பம் மறைந்து காணப்படும்.  இரண்டுமே நிலையானவைகள் அல்ல.  தற்காலிகமானவை. இன்பத்தை தொடர்ந்து துன்பமும் துன்பத்தைத் தொடர்ந்து இன்பமும் சுழற்சியாக வந்து கொண்டே இருக்கும். இதுதான் வாழ்க்கையின் இயல்பு.


“இன்பமும் துன்பமும் இல்லானே உள்ளானே” என்று மணி வாசகப் பெருமான் சிவபெருமானை போற்றுகிறார். ஈசன் விமலன். மும்மலங்கள் அற்றவன். அவனை இன்பமோ துன்பமோ பற்றாது. இரட்டை அறிவிற்கு அப்பாற்பட்டு ஏகமாய் ஆத்ம சொரூபமாய் விளங்குபவன் ஈசன். எனவே  இன்ப துன்பங்கள் அற்றவன் இறைவன். 


 இன்பமும் துன்பமும் உள்ளானே ஈசன் என்று மணிவாசகர் குறிப்பிடுவதன் பொருள் என்னவென்றால்,  தன்னுடைய சிவனடியார்களின் இன்ப துன்பங்களை தானே ஏற்று அனுபவித்து அவர்களுக்கு விடுதலை அளிப்பதால்,  அவன் இன்பமும் துன்பமும் உள்ளானே என்று ஆகின்றான்.


 சத் சித் ஆனந்தம் நம் இயல்பு என்று பகவான் ரமணர் ஒரு உபதேச  வுந்தியார் பாடலில் நமக்குத் தருகிறார் 


தனாதியல் யாதெனத் தான்றெரி கிற்பின்

னனாதி யனந்தசத் துந்தீபற

வகண்ட சிதானந்த முந்தீபற.


தன்னுடைய ஆதி இயல்பு என்னவென்று மனதில் உள்ளே ஆய்ந்து கொண்டே போனால், தொடக்கமும் முடிவும் இல்லாத ‘சச்சித்’, சொரூபத்தை தரிசிக்கலாம். அதை மேலும் ஆராய்ந்து  கொண்டே போனால் அதுவே அகண்ட எல்லையில்லாத சச்சிதானந்த சொரூபமாக அனுபவமாகும். எனவே நம்முடைய அடிப்படை இயல்பு ஆனந்தம், ஆனந்தம், பேரானந்தம்.


 உலகப் பொருள்களால் நமக்கு சுகமோ துக்கமோ உண்டாவதில்லை. சுகமும் துக்கமும் நம்முடைய மனநிலையை, பார்வையை பொறுத்தே அமைகின்றன.  நம் யதார்த்த சொரூபத்தின் இயல்பான சுகம் அனுபவிக்கப்படுகிறது. நம் சொரூபத்தை விட்டு விலகும் போது துக்கம் ஏற்படுகிறது. துக்கம் என்று தனியாக இல்லை.  சுகம் அனுபவிக்கப்படாததே துன்பம், துக்கம். 


 உலகப் பொருள்களில் சுகம் இருப்பதாக உண்டாகும் தவறான அபிப்பிராயமே அறியாமை எனப்படும். இந்த அறியாமையின் காரணமாக சுகம் வெளியில் இருப்பதாக நினைத்து மனம் உலகில் மேய்ச்சலுக்கு புறப்பட்டு விடுகிறது. இன்பம் என்பது உலகப் பொருள்களில் இல்லை. உலகப் பொருள்களை அனுபவிக்கும் போது உண்டாகும் அற்ப சுகமும் நம் இயல்பான ஆத்ம சுகமே ஆகும். 


 தன் மறதியே சுகக்கேடு.  துன்பம் உண்டாகும் போது அதற்கான காரணத்தை உலகப் பொருள்களில் தேடாமல், நம் கவனம் உள்ளோக்கி சொரூபத்தின் மீது திரும்ப வேண்டும். 


 நான் யார்?  என்னும் மகா வாக்கியம் நம் சொரூபத்தை நினைவூட்டும்.  ‘நான்’ என்ற சொல் எண்ணங்கள் மயமான மனதையும், எண்ணங்களற்ற மனதின் அடிநாதமான ஆத்மாவையும் குறிக்கும் ஒரு சொல்லாகும். நான் என்பதை சதாக்கருதி கொண்டிருந்தால் கூட நம் சொரூபத்தில் கொண்டு சேர்க்கும் என்று பகவான் ரமணர் தன் பக்தர்களுக்கு உபதேசித்தார். 


 எனவே மனதில் துக்கம் தோன்றும் போது உள்நோக்கி பார்த்து “நான் நான்”என்று  கருதிக் கொண்டே இருந்தாலே துக்க எண்ணம் மறைந்து விடும்.  துக்க மறைவே சுக அனுபவத்தின் அடையாளம்.  தனியாக சுகம் என்று ஒன்று இல்லை. துக்கம் நீங்குவதே சுகம். 


திருமூலர் திருமந்திரம் இன்பம் பற்றி பேசுகிறது.


நான் பெற்ற இன்பம் பெறுக இவ்வையகம்

வான் பற்றி நின்ற மறை பொருள் சொல்லிடின்

ஊன்பற்றி நின்ற உணர்வுறு மந்திரம்

தான்பற்றப் பற்றத் தான் தலைப்படுமே.


தான் பெற்ற ஆத்ம சுகம் இந்த உலகம் முழுவதும் கிடைக்க வேண்டும் என்று விரும்புகிறார் திருமூலர். 


 நான் பெற்ற இன்பம் மந்திர வடிவாக உணர்வு நிலையில் உடலில் உள்ளது. அந்த மந்திரத்தை இடைவிடாது சொன்னால் பிரபஞ்சம் முழுவதும் நிறைந்துள்ள மறை பொருளின் தன்மை நமக்கு விளக்கி காட்டும்.


             “ஓம் தத் சத்”

—-------------------------------------------------------------------------------------------------