Bakının işıqları (1950)

12+

Film Bakı neftçiləri haqqındadır. Hadisələr 30-cu illərdə başlayır və II Dünya Müharibəsi illərində davam edir. Bu vaxt Bakı neft mədənləri artıq yeni texnika ilə təchiz edilmişdi, açıq dənizdə yeni qazma üsulları sınaqdan çıxarıldı. Neftçilər ordunu bol yanacaqla təchiz etmək və qələbəni yaxınlaşdırmaq üçün fədakarcasına çalışırdılar. Hadisələrin fonunda usta Əlibala və onun neftçilər briqadası üzvlərinin əmək qəhrəmanlığı, fədakarlığı, gündəlik qayğıları və şəxsi həyatı öz əksini tapıb.

Film 1958-ci ildə “Azərbaycanfilm” kinostudiyasında yenidən redaktə edilib. Stalinin ölümündən sonra filmdən ayrı-ayrı epizodlar kəsilib götürülüb və ekrana buraxılıb. Film ekranlara gec buraxılsa da qadağan olunması barədə sənədlər aşkar olunmayıb. Filmin orijinal variantının surəti 2001-ci ildə çıxarılıb Azərbaycan Dövlət Film Fonduna təhvil verilib.
Azərbaycan kinosunda ilk dəfə Stalin və Mir Cəfər Bağırovun obrazı bu filmdə yaradılıb.
Filmə baxış keçiriləndə Mir Cəfər Bağırov öz obrazının ifasından narazı qalıb: “Təhmasib məni yaltaq eləyib. Mən yaltaq olmamışam”.

İstehsalçı: Bakı kinostudiyası
İlk baxış tarixi: 15.02.1958
Texniki göstəricilər: 35 mm, 4:3, a/q
Janr: dram

Rejissorlar: Aleksandr Zarxi, İosif Xeyfits, Rza Təhmasib
Ssenari müəllifləri: Qriqori Koltunov, Yevgeni Pomeşşikov
Operator: Qavriil Yegiazarov
Rəssam: Mixail Yuferov
Bəstəkar: Qara Qarayev
Rollarda: Mirzağa Əliyev (buruq ustası Əlibala), Mərziyə Davudova (Anaxanım), Nikolay Oxlopkov (mühəndis Şatrov), Nəcibə Məlikova (Mirvarid), Rza Təhmasib (Mir Cəfər Bağırov), İsmayıl Eloğlu (Fuad), Nikolay Kryuçkov (neftçi Paramonov), Pyotr Arjanov (Qarsiya)