Скачать или смотреть ဝါဒဖြန့် ဗီဒီယိုထဲမှာ ဟောလိဝုဒ် ရုပ်ရှင်တွေ ဖြတ်ညှပ်ကပ် သုံးထားလို့ လှောင်ပြောင်ခံနေရတဲ့ တရုတ်စစ်တပ်

ဝါဒဖြန့် ဗီဒီယိုထဲမှာ ဟောလိဝုဒ် ရုပ်ရှင်တွေ ဖြတ်ညှပ်ကပ် သုံးထားလို့ လှောင်ပြောင်ခံနေရတဲ့ တရုတ်စစ်တပ်

စက်တင်ဘာ - ၂၂၊ ၂၀၂၀

တရုတ်စစ်တပ်ရဲ့ ဝါဒဖြန့် ဗီဒီယိုထဲမှာ ဟောလိဝုဒ် ရုပ်ရှင်ထဲက ဇာတ်ဝင်ခန်းတွေ ထည့်သုံးထားတယ်ဆိုပြီး လှောင်ပြောင် ခံနေရပါတယ်။ အဲဒီ ဗီဒီယိုထဲမှာ တရုတ်ရဲ့ နျူကလီးယား လက်နက်တွေ တင်ဆောင်နိုင်တဲ့ H-6 ဗုံးကြဲလေယာဉ်တွေက ဂူအမ်ကျွန်းမှာရှိတဲ့ အမေရိကန် စစ်အခြေစိုက် စခန်းကို တိုက်ခိုက်နေတဲ့ ပုံစံမျိုး သရုပ်ဖော် ဖန်တီးထားပါတယ်။

တရုတ်ရဲ့ မိုက်ခရိုဘလော့ဂ် ပလက်ဖောင်း တစ်ခုဖြစ်တဲ့ Weiboပေါ်မှာ ဒီဗီဒီယိုကို တင်ထားရာမှာ ကြည့်ရှုသူ ငါးသန်းထက်မနည်း ရှိခဲ့ပါတယ်။ ဒါပေမဲ့ ဒီဗီဒီယိုထဲမှာ ပါနေတဲ့ မြင်ကွင်း တချို့ဟာ Transformers၊ Hurt Lockerနဲ့ The Rockတို့လို ဟောလိဝုဒ် ဇာတ်ကားတွေထဲကနေ ဖြတ်ညှပ်ကပ် လုပ်ထားမှန်း သတိထားမိသွားကြတဲ့ အခါမှာတော့ လူရယ်စရာကိစ္စ ဖြစ်လာပါတော့တယ်။

အနည်းဆုံးတော့ တရုတ်မှာ မူပိုင်ခွင့်ကိစ္စ တရားစွဲခံရတဲ့ ပြဿနာမျိုး မရှိနိုင်တဲ့အတွက် ကံကောင်းပါတယ်လို့ Weibo သုံးစွဲသူ တစ်ဦးက လှောင်ပြောင် ရေးသားခဲ့ပါတယ်။ နောက်တစ်ဦးကလည်း အမေရိကန် ရုပ်ရှင်တွေကို ထပ်ခိုးချပြန်တဲ့ လုပ်ရပ်ကို ရယ်ပဲ ရယ်နေတော့မယ်လို့ ပြက်ရယ် ပြုခဲ့ပါတယ်။

Gods of War – Attack!လို့ နာမည်ပေးထားတဲ့ နှစ်မိနစ်ကြာ ဝါဒဖြန့် ဗီဒီယိုကို ပြီးခဲ့တဲ့ သီတင်းပတ်ကုန်မှာ တရုတ် လေတပ်က ထုတ်လွှင့် ပြသခဲ့တာပါ။ ဗီဒီယိုထဲမှာ ဟောလိဝုဒ် ရုပ်ရှင် ဇာတ်ဝင်ခန်းတွေကို ခိုးချထားတယ်ဆိုတဲ့ စွပ်စွဲချက်တွေနဲ့ ပတ်သက်လို့တော့ တရုတ် စစ်တပ်က ဘာမှတ်ချက်မှ မပေးဘဲ နှုတ်ဆိတ်နေဆဲ ဖြစ်ပါတယ်။