Скачать или смотреть គំនិតកែច្នៃពីសំណល់ស្រកីដូងទៅជាវត្ថុធាតុដើមមានតម្លៃក្នុងវិស័យកសិកម្ម

ស្រកីដូងដែលជាសំណល់បកចេញពីត្រឡោកដូង ដែលមនុស្សភាគច្រើនហាក់មិនសូវចាប់អារម្មណ៍ និងឲ្យតម្លៃនោះ បច្ចុប្បន្នត្រូវបានគេយកទៅកែច្នៃជាវត្ថុធាតុដើមដ៏មានប្រយោជន៍សម្រាប់បម្រើដល់ការដាំដុះនៅក្នុងវិស័យកសិកម្មបានយ៉ាងល្អប្រសើរ។
លោក ជា ឡង់ឌី ជាម្ចាស់កសិដ្ឋាន Takhmao Farm មានទីតាំងនៅភូមិក្របៅ ឃុំកំពង់សំណាញ់ សង្កាត់តាខ្មៅ បានឲ្យដឹងថា ស្រកីដូងម៉ដ្ឋនេះមានអត្ថប្រយោជន៍ច្រើនមុខដែលគេអាចយកទៅលាយដីដាំដំណាំ បណ្ដុះកូនរុក្ខជាតិ ផ្សាំមែកឈើ គ្របគល់ដំណាំ ឬកែច្នៃជាផើង និងជាវត្ថុធាតុដើមសម្រាប់បម្រើដល់វិស័យផ្សេងៗទៀត។
ពាក់ព័ន្ធទៅនឹងទំហំនៃការផលិត លោកអាចផលិតស្រកីដូងម៉ដ្ឋបាន 300-500បាវក្នុងមួយថ្ងៃ ដោយក្នុងមួយបាវមានទម្ងន់ប្រមាណ 4គីឡូក្រាម។ លោកបន្តទៀតថា ស្រកីដូងទុំមានគុណភាពជាងស្រកីដូងខ្ចីដោយសារវាមានសរសៃច្រើន ប្រើបានយូរ និងមិនងាយពុក។ ចំណែកអតិថិជនរបស់លោកភាគច្រើនមកពីតាមបណ្ដាលខេត្តមានចំការធំៗដូចជាខេត្តមណ្ឌលគិរី ក្រចេះ បាត់ដំបងជាដើម ដែលធ្វើឱ្យការលក់ចេញរបស់លោកអាចបានប្រមាណ 70-100បេ និងទទួលបានចំណូលប្រមាណ 300-400 ដុល្លារក្នុង1ថ្ងៃ។
លោក ជា ឡង់ឌី បានចាប់ផ្ដើមអាជីវកម្មនេះតាំងពីឆ្នាំ2015 ក្នុងដើមទុនប្រមាណជាង 30លានរៀលដែលត្រូវចំណាយទៅលើការទិញម៉ាស៊ីន ត្បាល់កិន ការធ្វើរោងសម្រាប់កិន និងស្តុកស្រកីដូងទុក ពិសេសគឺការភ្ជាប់ចរន្តអគ្គិសនីដែលត្រូវការថាមពលខ្លាំងជាងអគ្គិសនីធម្មតា។
លោកបន្ថែមថា៖ ដោយសារឃើញស្រកីដូងដែលបកហើយនៅតាមផ្សារគរចោលច្រើន ហើយអ្នកលក់ខ្លះក៏ត្រូវបង្ខំចិត្តបង់លុយឱ្យគេប្រមូលយកទៅចោលទៀតនោះ ទើបលោករកគំនិតប្រមូលវាយកមកច្នៃ។
ចំពោះអ្នកដែលចង់បើកអាជីវកម្មប្រភេទនេះ លោក ឡង់ឌី បានផ្ដល់ជាគំនិតមួយចំនួនថា ៖ «យើងគួរសិក្សាទៅលើវត្ថុធាតុដើម និងវត្ថុប្រើប្រាស់ឱ្យបានច្បាស់លាស់សិន ដោយសារតំបន់ខ្លះពុំអាចផ្គត់ផ្គង់វត្ថុធាតុដើមបានគ្រប់គ្រាន់ទេ ឬក៏ត្រូវការចំណាយទៅលើការដឹកជញ្ជូនថ្លៃជាដើម។ មួយវិញទៀតគឺទីតាំងក្នុងការផលិតដែលត្រូវរកកន្លែងណាដែលសមរម្យ ព្រោះវាហុយខ្លាំងដែលអាចប៉ះពាល់ដល់ការស់នៅក្នុងសហគមន៍»។