Скачать или смотреть ព្រះសាសនមុនី ហ៊ឹម ប៊ុនធឿន ប្រទានឱវាទដល់សិក្ខាកាមសិក្សាបដិបត្តិវគ្គសិក្សាវិក្រឹតការ គរុកោសល្យវិបស្សនា

ព្រះសាសនមុនី ហ៊ឹម ប៊ុនធឿន ធម្មត្ថេរោ ប្រទានឱវាទធម្មីកថាដល់សិក្ខាកាមសិក្សាបដិបត្តិ នៃវគ្គសិក្សាវិក្រឹតការ គរុកោសល្យវិបស្សនា ជំនាន់ទី២៣
━━━━━━━━━━━━
ព្រះសាសនមុនី ហ៊ឹម ប៊ុនធឿន ធម្មត្ថេរោ ប្រទានឱវាទធម្មីកថាដល់សិក្ខាកាមសិក្សាបដិបត្តិ នៃវគ្គសិក្សាវិក្រឹតការ គរុកោសល្យវិបស្សនា ជំនាន់ទី២៣ ពេលរាត្រី មុខទីលានព្រះអង្គធំ បានជាធម្មទានផ្តោតលើការអនុវត្ត បដិបត្តិ តាមព្រះធម៌វិន័យ ឱ្យបានត្រឹមត្រូវតាមផ្លូវបដិបទាមគ្គ ។
ក្នុងឱវាទធម្មីកថា ការសិក្សាវិបស្សនា មិនត្រឹមតែជាការសិក្សាផ្នែកទ្រឹស្តីប៉ុណ្ណោះទេ ប៉ុន្តែជាការអនុវត្តផ្ទាល់ក្នុងជីវិតប្រចាំថ្ងៃ ដោយយក សីល សមាធិ បញ្ញា ជាគ្រឹះដ៏រឹងមាំ ។ សិក្ខាកាមគ្រប់រូប ត្រូវមានឆន្ទៈ ព្យាយាម ការអត់ធ្មត់ និងការត្រួតពិនិត្យចិត្តជានិច្ច ដើម្បីឱ្យការអប់រំក្លាយជាធម្មឱសថ ព្យាបាលកិលេសក្នុងចិត្ត នឹងបានជាវដ្តគាមិនីកុសល ជាភាវនូបនិស្ស័យបានរួចចាកវដ្តទុក្ខ ។
ការសិក្សាបដិបត្តិព្រះធម៌វិន័យ ពិតជាមានសារៈសំខាន់ ជាការរួមចំណែកថែរក្សា អភិរក្សព្រះសាសនា បំពេញតួនាទីជាពុទ្ធសាសនិកល្អ ពុទ្ធបរិសទ្យល្អ សិស្សល្អ ពលរដ្ឋល្អ ដែលត្រូវមានគុណធម៌ សច្ច ខន្តី កតញ្ញូ និងមេត្តាករុណា ។
ពុទ្ធោវាទ ជាពាក្យទូន្មាន ប្រៀនប្រដៅ ត្រាស់សម្តែងដោយព្រះសម្មាសម្ពុទ្ធ ដែលជាពុទ្ធវចនៈ ត្រូវបានព្រះអរហន្ត ឬព្រះសង្ឃសាវ័ក សង្គាយនា សិក្សាចេះចាំមុខបាឋ ទ្រទ្រង់ អភិរក្ស ផ្សព្វផ្សាយ ក្រោយពីព្រះអង្គទ្រង់បរិនិព្វាន ទុកជាធម្មទានដ៏ប្រសើរ ដើម្បីឱ្យសិក្ខាកាមទាំងអស់ មានកម្លាំងចិត្ត មាំមួនក្នុងការសិក្សា និងអនុវត្ត ឱ្យសមនឹងព្រះធម៌វិន័យ ជាធម្មឱសថឱ្យបានទូលំទូលាយ។ ព្រះពុទ្ធដីកាត្រាស់សម្តែងថា៖ ធម្មទាន ឈ្នះអស់ទានទាំងពួង ទានទូទៅ ដូចជា អាហារទាន វត្ថុទាន ថវិកាជាដើម អាចជួយបំបាត់ទុក្ខលំបាកផ្លូវកាយបានតែបណ្តោះអាសន្ន ចំណែកឯ ធម្មទាន គឺការផ្តល់ព្រះធម៌ ការបង្រៀនផ្លូវល្អ ផ្លូវត្រឹមត្រូវ ការណែនាំឱ្យស្គាល់ សីល សមាធិ បញ្ញា ដែលអាចជួយបំបាត់ទុក្ខផ្លូវចិត្ត ។ ធម្មទាន ប្រសើរជាងទានដទៃ៖
ជាអំណោយមិនផុតកំណត់ ព្រះធម៌អាចនៅក្នុងចិត្តអ្នកទទួលបានយូរអង្វែង
ជាហេតុនាំទៅរកសេចក្តីសុខយូរអង្វែង ជួយបង្កើតកុសលធម៌ និងកាត់បន្ថយកិលេស
អាចចែកចាយបន្តបាន អ្នកទទួលអាចយកទៅផ្សព្វផ្សាយបន្ត ដល់អ្នកដទៃទៀត
ការផ្តល់ចំណេះដឹងធម៌ ការណែនាំអំពីការរស់នៅត្រឹមត្រូវ ការបង្ហាញផ្លូវចិត្តស្ងប់ស្ងាត់ គឺជាទានដ៏ឧត្តម ដែលមានតម្លៃលើសទានវត្ថុទាំងឡាយក្នុងលោក ។
សូមឱ្យការសិក្សា បដិបត្តិព្រះធម៌វិន័យ ដែលជាព្រះសទ្ធម្ម ប្រតិស្ថានតាំងនៅអស់កាលយូរអង្វែង !
សូមឱ្យសព្វសត្វបានរួចចាកទុក្ខ កុំមានពៀរ និងគ្នា ចូររស់នៅជាសុខ !
សូមឱ្យពិភពលោក ទទួលបានសុខសន្តិភាពជានិច្ចនិរន្តរ៍តរៀងទៅ !
━━━━━━━━━━━━
ពុទ្ធមណ្ឌល,ថ្ងៃអង្គារ ៨កើត ខែផល្គុន ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី២៤ ខែកុម្ភៈ ឆ្នំា២០២៦