Скачать или смотреть ZEC YATEKETEZA NYARAKA ZA UCHAGUZI 2025 - UNGUJA

Mwenyekiti wa Tume ya Uchaguzi ya Zanzibar (ZEC), George Joseph Kazi, amesema uteketezaji wa nyaraka za Uchaguzi Mkuu wa mwaka 2025 umefanyika kwa mujibu wa sheria baada ya kutimia kwa muda wa siku 90 tangu kufanyika kwa uchaguzi huo.

Akizungumza katika zoezi la uteketezaji lililofanyika kijiji cha Muungoni, Wilaya ya Kusini Unguja, Jaji Kazi alisema kwa mujibu wa Sheria ya Uchaguzi Namba 4 ya mwaka 2018, Tume inatakiwa kuziteketeza nyaraka za uchaguzi baada ya siku 90, endapo hakutakuwa na amri yoyote ya mahakama inayozuia utekelezaji huo.

Alieleza kuwa zoezi hilo lilianza katika Kisiwa cha Pemba baada ya kutimia kwa muda huo wa kisheria, kufuatia kutokuwepo kwa zuio lolote la kimahakama lililozuia Tume kutekeleza wajibu wake.

Aidha, alisisitiza kuwa kuwepo kwa kesi mahakamani si sawa na kuwepo kwa amri ya zuio kisheria, akibainisha kuwa ni lazima kuwe na amri rasmi ya mahakama ili kuzuia utekelezaji wa jukumu la kisheria.

Jaji Kazi ameeleza kuwa kwa upande wa Pemba kesi zote za uchaguzi zilitupiliwa mbali kutokana na kasoro za kisheria kwa waliowasilisha maombi, huku kwa upande wa Unguja baadhi ya kesi zikiendelea kusikilizwa mahakamani.

Mwenyekiti huyo ameongeza kuwa Tume inaendelea kutekeleza majukumu yake kwa kuzingatia sheria, na yeyote anayeona kuwa kuna ukiukwaji ana haki ya kwenda mahakamani kwa ajili ya kupatiwa tafsiri au uamuzi wa kisheria.