Скачать или смотреть POONDI MAHAN (பூண்டி மகான்).

பூர்ண அவதூதர் பூண்டி மகான்.
------------------------------------------------------------

ஆற்றுச் சுவாமி என்னும் கலசப்பாக்கம் பூண்டி மகான் ( திருவண்ணாமலை).

திருவண்ணாமலை என்றவுடன் மகான் சேஷாத்ரி சுவாமிகள்,  மகான் ரமண மஹரிஷி பற்றி எல்லோருக்கும் தெரிந்திருக்கும்.  அப்படிப்பட்ட புண்ணிய ஸ்தலமான   திருவண்ணாமலை அருகே போளூர் அருகேயுள்ள கலசப்பாக்கத்தில் சென்ற நூற்றாண்டின் வாழ்ந்தவர் ஶ்ரீ பூண்டி மகான். 

    நாம் வாழும் காலத்தில் வாழ்ந்து ஜீவசமாதியான ஶ்ரீ பூண்டி ஆற்று ஸ்வாமிகளைப் பற்றி அதிகம் பேர் அறிந்ததில்லை.

   திருவண்ணாமலை  மாவட்டத்தில் போளுர் தாலுகாவில் பூண்டி என்னும் சிறிய கிராமம். அங்கு வாழ்ந்து பல அற்புதங்களை நிகழ்த்தியவர் ஶ்ரீ பூண்டி மகான் ஆவார். இவரின் அன்பும் தீட்சண்ய பார்வையும் இவரை மகான் என மக்களுக்கு அடையாளம் காட்டியது. இவர் செய்த பல அற்புதங்கள் பற்றிய தகவல்கள், போளூர் ,கலசப்பாக்கம், பூண்டி போன்ற இடங்களில் வாழும் மக்களால் பிரமிப்பாக பேசப்படுகிறது. நீண்ட தாடியும் தீட்சண்ய பார்வையுமாக மிக எளிமையான மனிதரைப் போல் காட்சியளிக்கும்  இந்த மகானை அவதாரப் புருஷனாக அந்தப்பகுதி மக்கள் பக்தியோடு வணங்கினார்கள். 

    ஞானிகளுக்கு உரிய அனைத்து சித்திகளையும் கைவரப் பெற்றிருந்தாலும்அவர் அந்த சித்தியினைத் தன்சுய நலத்துக்காகப் பயன்படுத்தாமல், பிறர் நலனுக்காக மட்டும் பயன்படுத்தி வந்தார். (சுமார் 19 ஆண்டு காலங்கள் திண்ணையை விட்டு நகராமல்அத் திண்ணையிலிருந்து அனைவருக்கும் ஆசி வழங்கியுள்ளார் பூண்டி மகான்)

பூண்டி மகான் பற்றி ஶ்ரீ மகாபெரியவா:
...............................................…............................

   மகாபெரியவா பூண்டி மகானை பற்றி பேசும்போது ரொம்ப  உயர்வாக மரியாதையோடு பேசுவார். ''நான்  பூண்டி மகானின் தரிசனம் பெற்றிருக்கிறேன்'' என்பார்.

   ஒரு முறை காஞ்சி மகாபெரியவா மகான்கள் மற்றும் ஞானிகளைப் பற்றி சொல்லும்போது  “நாம் எல்லோருமே  இந்த  எலக்ட்ரிக் பல்ப் மாதிரி தான்,  நமக்கென்று ஒளி கிடையாது, பூண்டி மகான் போல் இருப்பவர்கள் ஒளி வீசும் சக்தியை நமக்கு அளிக்கும் சுவிட்ச் போன்றவர்கள்.  ஸ்விச்  போடப்பட்டால் தானே விளக்குகள் ஒளி வீசும் என்றார்”.

ஶ்ரீ பூண்டி மகான் ஜீவசமாதி:
.........................................................

  பத்தொன்பது ஆண்டுகள் ஒட்டுத் திண்ணையில் அமர்ந்தவாறு அருளாட்சி  வழங்கிய மகான் ஜீவசமாதியடைவதற்கு மூன்று நாட்களுக்கு தன் பக்தர் சுப்பிரமணியத்திடம் “தாம் வடக்கே போய் செய்ய வேண்டிய வேலைகளை முடித்துக்கொண்டு சொல்ல வேண்டியவர்க்குச் சொல்லிவிட்டு அதன் பிறகு வந்து பூண்டியிலேயே இருந்து விடுவேன்” என்று கூறினார். 

   இரண்டு நாட்கள் கழித்து தாம் சொல்ல வேண்டிய பதினெட்டு சித்த புருஷர்களுக்கு சொல்லிவிட்டு வந்தேன் என்று சுப்பிரமணியத்திடமே கூறினார். மறுநாள் 1978 நவம்பர் 3ஆம் தேதி அனுஷம் நட்சத்திரம் அன்று காலை 9 மணியளவில் ஜீவசமாதி ஆனார். சமாதியடைந்த சிறிது நேரத்தில் மேகமூட்டம் ஏற்பட்டு கனத்தமழை ஆரம்பித்து மூன்று நாட்கள் இடைவிடாமல் பொழிந்தது. கனத்த மழையால் அந்த மூன்று நாட்களும் சுவாமியின் உடலை அப்படியே பக்தர்களின் தரிசனத்திற்கு வைத்திருந்தார்கள். மூன்று நாட்கள் ஆனபிறகும் மகானின் தேகம் கெடாமலும், இறுகிப் போகமலும், எந்தவித துர்நாற்றமும் வராமலும் உயிருடன் இருக்கும்போது எப்படி இருந்தாரோ அப்படியே ஜீவக்களையுடன் இருந்தார். பின்பு ஸ்ரீ மகான் அமர்ந்திருந்த திண்ணைக்கு அருகிலுள்ள இடத்தில் சமாதியை ஏற்படுத்தினார்கள். இங்கு மகானுக்கு ஒரு கோயிலும் கட்டப்பட்டுள்ளது. இங்கு சென்று நாம் மனப்பூர்வமாக வேண்டினால் சமாதியில் ஜீவனுடன் இருக்கும் பூண்டி சுவாமிகள் நம்மை காப்பாற்றுவார் என்பது பரிபூர்ண உண்மையாகும்.

   திருவண்ணாமலை மாவட்டம் போளூர் என்கிற நகருக்கு மேற்கேயுள்ள கலசப்பாக்கதில் இருந்து 3 கி.மீ தொலைவில் இவரது ஜீவசமாதி உள்ளது. ஜீவசமாதியில் இருந்து கொண்டு இன்றும் ஶ்ரீ பூண்டி மகான் ஆசி வழங்குகிறார்.