شيلة حماسيه - ياموتري لاعاد تمشي على الهون كامله كلمات جمال العالي اداء منير البقمي

كلمات الشاعر جمال العالي العتيبي اداء منير البقمي
شيلة حماسيه لحن حماسي ايقاع مجنون


ياموتري لاعاد تمشي على الهون
خلك على ال٢٠٠ و ارج السلامه

في القلب مشهابه وفالكبد غليون
والبال ماهو خالي من العسامه

وانا معي عجله وضيقه وقيلون
تحول دون الشوف مثل الغمامه

مانيب مستانس ولانيب مغبون
لكن لاتنشد سايقك وش علامه

لايذن المذن على اللي يصلون
من عقب مكه دون برق الرغامه

والا وحنا يالترمبيل من دون
جده وشاطيها ومفرق تهامه

كب الكباري كلها لين ما اكون
في حيد بحره كبريٍ له علامه

علامته حي النصر لايهونون
في المرتفع والضلع دونه وامامه

اخذ المخارج لا انحنى الخط وتمون
على الاشاره كان جات ب غرامه

لو ان في ظهرك مخاليص وديون
ياموتري مانيب ويا الملامه

كني من البارح عويدٍ على شون
مابان فيه من الزمان انهزامه

يدي مابين المسبحه والدركسون
واللي طرا لي شيخ طيب وكرامه

شيخ يضد خصوم ويكحل عيون
لاضاق شيخ دبي والا المنامه

شيخ الفعول اللي تراخى له متون
اللي على الامجاد هامه وقامه

لا صعبت العقده على اللي يحلون
يحلها ويبصم عليها ابهامه

لو كان لي عامين وانا اقتصر دون
قصره لكني ماقتصر في سلامه

اعز هاك الرجل لو ويش مايكون
واحب ذكره وافتخر في مقامه

اللي خبط فرعون واخوان فرعون
يبا يقود شدادهم من خطامه

فرعون يستفزع وتكفى وتكفون
والحر يكفخ ماحسب للحمامه

انشهد انه مافصل له تليفون
ولا ذاق من عقبه حلاوة منامه

صحيح ماني من هل المد والعون
وانا ولد شايب واحفظ احترامه

لكن ليا ضاقت من الكون للكون
انا سنيده ف العسير وحزامه

يبشر بوقفاتي وانا اخالف ضنون
قوم يسوقون القدم للندامه

لا اللي يسوونه ولا اللي يقولون
ماهمني ولا جذبني اهتمامه

يبطون ثم يبطون يبطون يبطون
ماوقفوا موج البحر وإلتطامه

وانته يابو مسلط ذرا راس وركون
اليا زما وقتٍ يروع احتدامه

اعدك لعسرات الايام عربون
واسوم بك وقتي وافوز بسنامه

لانك كفو ميقاف والهون للهون
ولانك على روس الشجيعين هامه

ولانك صميدع راس وابليس ملعون
ولان الرخامه قسم ورث الرخامه

جيتك ولاني راضي اللي يسوون
لو عذربوني قليّلين الشهامه

لو كنت متضايق ولو كنت مديون
مانيب جايك يالسنافي ب اقامه

جيتك مزعل قوم ومكسر قرون
مدري طناخة راس والا غشامه

قدام قصرك لو يزيدوني طعون
كني موقف عند قصر اليمامه

يضحك حجاجي عكس من يضحك سنون
وافك صدري للزمان وسهامه

واغني العرضه مع اللي يغنون
وانطل عقالي لاجلها والعمامه

تمت وراسي فوق ثابت على متون
قصيدةٍ مني عليها علامه

تلحينها مجنون والطرق مجنون
في مدحة المطنوخ ومع السلامه