Скачать или смотреть WAOMBAJI NAFASI ZA AJIRA 12,000 KUITWA KWENYE USAILI HIVI KARIBUNI

Mkuu wa Kitengo cha Habari na Mawasiliano Serikalini Bi. Lynn Chawala amesema kuwa, waombaji wa nafasi za ajira 12,000 za kada za ualimu wataitwa kwenye usaili hivi karibuni.

Bi. Chawala aliyasema hayo katika mahojiano na kituo cha Abood Fm cha Mkoani Morogoro katika kipindi cha Morning Special mwishoni mwa wiki hii.

Bi. Chawala amesema kuwa, uchakataji wa maombi hayo upo katika hatua za mwishoni, na hivi karibuni waombaji ajira hao wataitwa kwa ajili ya usaili huo ambao utafanyika nchi nzima katika kila mkoa ambapo wasailiwa wapo.

Aidha, Bi. Chawala alisisitiza kuwa waombaji ajira wanapaswa kuingia katika akaunti zao za Ajira Portal sehemu ya Personal details, na kuingia sehemu ya Current Residence na kuhuisha anuani za makazi yao kabla ya tarehe 6 Desemba 2025 ambapo taarifa inayoonekana hapo ndiyo itatumika kuwapangia vituo vya usaili.

Hivyo kama msailiwa anatarajia kufanyia usaili katika mkoa fulani basi ahakikishe taarifa iliyojazwa hapo imetaja mkoa ambao ndipo anatarajia kufanyia usaili ili apangiwe kufanya usaili katika Mkoa huo.

Bi. Chawala aliwataka waombaji ajira wataoitwa kwenye usaili kuhakikisha wanafika na nyaraka zao halisi (original) ikiwa ni pamoja na vyeti vya kitaaluma, kitambulisho, na wale ambao majina yao yanatofautiana kati ya nyaraka moja na nyingine basi wanapaswa kutafuta hati za viapo aidha Deedpoll kutoka Wizara ya Ardhi, au Affidaviti kutoka kwa Mwanasheria kulingana na aina ya utofauti wa majina hayo kwenye nyaraka zake, kwani bila kufanya hivyo msailiwa atakayekuwa na changamoto hiyo hatoruhusiwa kufanya usaili siku ya usaili.