ජයසිරිවද්දන නුවර පුරා....

ජයසිරිවද්දන නුවර පුරා....

කලාව භාවනාවක් විය යුතුයි...

කලාව භාවනාවක් විය යුතුයි... ගිලන් වූ නොසන්සිඳුණු සිත් සුවපත් කරන්නටත් සන්සිඳවන්නටත් ඊට හැකි විය යුතුයි. එය ආවේගශීලී නොවන්නක් විය යුතුයි. සංයමය, සංවරය ජනිත කළ යුතුයි. සුපිරිසිදු ද, සුපහන් ද විය යුතුයි. මා දකින කලාව එයයි.

"ජයසිරිවද්දන නුවර පුරා...." ශ්‍රී දළදා මාලිගාවට මා විසින් පූජා කෙරුණු මගේ පළමු ගේය පද රචනය... මේ ලියමන ඒ ගැන කෙටි හැඳින්වීමකටයි.
සවණක් ඝණ රශ්මි මාලා, උතුම් වූ මංගල ලක්ෂණ ආදී වූ ලොවුතුරා බුදුරජාණන් වහන්සේගේ උතුම් වූ බුද්ධ ශරීරය වර්‍ණනා කරමින්, උන්වහන්සේගේ ලෝකෝත්තර සම්බුදු ගුණ නමඳිමින් ඇරඹෙන ගීතයෙන්, යහපත් වූ ජනයා භක්ති ප්‍රණාමයෙන් වඳින්නා වූ භූපතීන් විසින් රකින්නා වූ ලෝකනාථයන් වහන්සේගේ ශෝභන වූද සුභාෂිත වූද ශ්‍රී සද්ධර්මයෙන් සුගන්ධිත වූ විභූෂිත වූ අති උතුම් දළදා වහන්සේ වන්දනා කෙරෙනවා.
ඉන්පසුව ගලා යන දළදා පෙරහැර වර්‍ණනාවෙහි ආරම්භය ඇතුන් පිළිබඳවයි. රූ සිරින් අබරණ පැළැඳ ගජගා වන්නම සිහිගන්වමින්... සුබ මොහොතින්, හේවිසි නද මධ්‍යයේ සඳගලට පා තබමින් වඩිනා මඟුලැතු... තුසිදෙව්පුර වන් සිරි දෙවන ජයසිරිවද්දන පුරවරය... ඒ උතුම් පුරවරයෙහි වීදි සරමින්... උඩුවියන් මල්වියන් බඳිමින්, පාවාඩ පිරුවට මතින් පෙරහැර කරඬුව වඩමවන ඒ සුපින්බර මොහොත... මේ මහා සම්බුද්ධ පූජාව මෙසේ වදනින් වැනිය නොහැකියි... වස්දඬු තාලම් භේරී වැයෙන... ධජ පතාක සෙමෙර සේසත් ලෙලෙන... සංඛ පංචතූර්‍ය නාදයෙන් මනෝහරවූ... සැදැහැතියන්ගේ සාදු නද මධ්‍යයේ පවත්වන ඒ මනහර වූ අසිරිමත් වූ පෙරහැර මංගල්‍යය...

ඉදින්... මේ ගීතය ලියන්නට මුල්වූ නිමිත්ත ඉතා ගෞරවයෙන් නමස්කාර පූර්වකව සිහිපත් කළ යුතුමයි. නැදුන්ගමුව රාජා... ඒ සද්ධන්ත කුල බෝධිසත්ව ගුණැති සෝභමාන උත්තුංග තේජවන්ත උත්තම මංගල හස්ති රාජයා වෙනුවෙනුයි මා විසින් මේ ගීතය ලිවීම ආරම්භ කෙරුණේ. එවක නැදුන්ගමුව ඇත් රජු දළදාව වැඩමවූ සමය. ගීතයේ එන හස්ති වර්ණනා සියල්ලක්ම ඒ ඇත් රජු සිහිපත් කරමිනුයි ඒ බුදුකුරු ගුණ මෙනෙහි කරමිනුයි ලියැවුණේ. පසුව ගීතයේ අරුත තව තවත් පුළුල් කරමින් මා'තින් ලියා අවසන් වුණේ මෙසේ එළිදැක්වුණු "ජයසිරිවද්දන නුවර පුරා...." ගීතය. ඉදින්... නැදුන්ගමුව රාජා ඇත් රජිඳුනි, ඔබට මාගේ නමස්කාරය වේවා. ඔබ පතනා බෝධියකින් නිවන් අවබෝධ කරගන්නට දළදා වැඩමවූ කුසලයද ඇතුලුව සසර පුරාවට සිදු කරගත් සියලු පුණ්‍ය කුසල ශක්තීන් හේතු වේවා.

මේ ගීතය ශ්‍රවණය කරන ඔබට බුද්ධාලම්භන ප්‍රීතිය ජනිත වන්නේ නම්... බුද්ධානුස්සතිය වැඩේ නම්, ඊට නිමිති සකස් වේ නම්... ආමිස පූජාව අනුමෝදන් වෙමින්ම ප්‍රතිපත්ති පූජාවටද සිත සකස් කොට ගත හැකි නම්... ඒ ඔබ මින් ලබන ඉහලම ඵලයක්. ඉදින්... මේ ගීතය ශ්‍රවණය කරන සියලු දෙනා උතුම් වූ ලොව්තුරු බුදු ගුණ සිහිපත් කරමින් මෙනෙහි කරමින් ඒ ගුණයන් සිත්හි වඩමින්, ඉතා යහපත්ව දරනු ඇතැයි යන්න මගේ ප්‍රාර්ථනයයි.

✍✍ බුද්ධිනී වැලිකල


Percussion: Rakitha Wickramaratne
Violin : Darshana Amarasinghe
Sitar : Mahesh Pathmakumara
Cello : Rochana Ramanayaka
Oboe : Srimal Weerasinghe
Keys : Senanga Dissanayake
Backing Vocals : Sandeera Induwari , Ashini Chamathka , Imesha Madhubani Dharmadasa , Pesan Jayawardhane , Nikila Dharmadasa , Senanga Dissanayake

Recording Engineer: Amala Mihiranga @ BrickHouse , Project 2020 records , Studio J & S
Mixing and Mastering: Vinod Melpitiya @WayoMixHouse