Скачать или смотреть Փաշինյանին չեն վստահում, Ադրբեջանում զորահավաք է, «Ազատի» գործով դատարանում լարված էր․ Ամփոփ լուրեր

Oragir.News-ը ներկայացնում է մարտի 6-ի ամփոփ լուրերը՝ լրագրող Արփինե Նավասարդյանի մեկնաբանությամբ:

Եթե խորհրդարանական ընտրությունները տեղի ունենային հաջորդ կիրակի, ապա կառավարող «Քաղաքացիական պայմանագիր» կուսակցության օգտին կքվեարկեր հայաստանցի ընտրողների 24 տոկոսը։ Այս մասին են վկայում ամերիկյան Միջազգային հանրապետական ինստիտուտի կողմից այսօր հրապարակված հարցման արդյունքները, որն անցկացվել է փետրվարի 3-ից 13-ը՝ Հայաստանի 1500 քաղաքացիների շրջանում։ Նույն ինստիտուտի կողմից 2025 թվականի ամռանն անցկացված համեմատ՝ ՔՊ-ի վարկանիշը աճել է շուրջ 7 տոկոսով։ Նիկոլ Փաշինյանի գլխավորած ուժի ընտրազանգվածի հիմնական կորիզը, ըստ հետազոտության, տարեցներն ու մարզերի բնակիչներն են․ 18-ից 35 տարեկանների շրջանում նրա օգտին պատրաստվում է քվեարկել միայն 12, 36-ից 55 տարեկանների շրջանում՝ 24 տոկոսը, իսկ արդեն 55-ից բարձր տարիքային խմբում՝ 34 տոկոսը։ ՔՊ-ի վարկանիշն ամենացածրը Երևանում է՝ 15%, մյուս քաղաքների բնակչության շրջանում այդ ցուցանիշը հասնում է 25, իսկ գյուղերում՝ 31 տոկոսի։ Երկրորդ տեղում Սամվել Կարապետյանի «Ուժեղ Հայաստան» կուսակցությունն է․ այս նորաստեղծ ուժի օգտին կքվեարկեր հարցվածների 9 տոկոսը։ Ի տարբերություն ՔՊ-ի «Ուժեղ Հայաստանի» քվեները հավասարաչափ են բաշխվում թե՛ տարիքային տարբեր խմբերում և թե՛ Հայաստանի տարբեր շրջաններում։ Հարցման համաձայն՝ երրորդ տեղի համար պայքարում են 2-րդ նախագահ Ռոբերտ Քոչարյանի «Հայաստան» դաշինքը և Գագիկ Ծառուկյանի ԲՀԿ-ն։ Այս ուժերի օգտին փետրվարի սկզբի դրությամբ պատրաստ էր քվեարկել հայաստանցի ընտրողների 3-ական տոկոսը, իսկ մյուս ընդդիմադիր ուժերի վարկանիշը չի գրանցել 1 տոկոսը։ Ինչ վերաբերվում է անհատ քաղաքականգործիչներին, ապա Նիկոլ Փաշինյանին վստահում է հարցվածների 20 տոկոսը, Սամվել Կարապետյանին 10, նախագահ Ռոբերտ Քոչարյանին 5, Գագիկ Ծառուկյանին՝ 4 տոկոսը։ Հետազոտության մասնակիցների զգալի մասը՝ 30 տոկոսը, կամ չի որոշել դեռ, թե ում օգտին է քվեարկելու, կամ էլ դժվարացել է պատասխանել, բայց հարցվածների 68 տոկոսը պնդել է՝ հունիսի 7-ին գնալու է ընտրատեղամաս։

Միջազգային հանրապետական ինստիտուտի մասնագետները այս հետազոտության ընթացքում չեն սահմանափակվել միայն ընտրությունների թեմաներով՝ փորձելով նաև պարզել հայաստանցիների վերաբերմունքը Հայ Առաքելական եկեղեցու հանդեպ։ Նախորդ՝ 2025-ի հունիսին արված հարցման համեմատ եկեղեցու վարկանիշը կրկին աճել է։ Հայ առաքելական եկեղեցու գործունեությունը դրական է գնահատել հարցվածների 61 տոկոսը՝ 2025 թվականի հունիսին արձանագրված 58 տոկոսի համեմատ։ Եկեղեցու վարկանիշը բարձր է հատկապես երիտասարդների շրջանում՝ 69 տոկոս։ Ինչ վերաբերվում է «Թրամփի ուղու» իրագործմանը։ Հարցման, ապա հայաստանցիների մեծամասնությունը կամ դեմ է դրան, կամ էլ առնվազն լուրջ վերապահումներ ունի։Հարցվածների 34 տոկոսը կտրականապես դեմ է նախագծի կյանքի կոչմանը, ևս 13 տոկոսը՝ մասամբ է դեմ։ Նախագծին միանշանակորեն կողմ է հարցվածների 24, մասամբ՝ 20 տոկոսը։ TRIPP -ի հանդեպ ամենից դրական են տրամադրված տարեցները, ամենաբացասաբարը՝ երիտասարդներն ու միջին տարիքի հարցվածները։ Հարցվողներից հետաքրքրվել են նաև, թե ի՞նչ ուղղությամբ է շարժվում երկիրը․ ըստ այդմ՝ 47 տոկոսի համոզմամբ՝ Հայաստանը շարժվում է ճիշտ, 41 տոկոսի պնդմամբ՝ սխալ ուղղությամբ։ Եվ եթե երիտասարդների և միջին տարիքի հայաստանցիների շրջանում այս հարցում երկու տեսակետների կողմնակիցները թիվը գրեթե հավասար է, ապա տարեցների շրջանում տրամադրությունները անհամեմատ ավելի լավատեսական են։ 56-ից բարձր հայաստանցիների կեսից ավելին՝ 55 տոկոսը վստահ է՝ երկիրն ընդհանուր առմամբ ճիշտ ուղղությամբ է շարժվում։

Արարատ Միրզոյանը հեռախոսազրույց է ունեցել Ադրբեջանի արտաքին գործերի նախարար Ջեյհուն Բայրամովի հետ, որի ընթացքում քննարկվել է տարածաշրջանային իրավիճակը։ Այս մասին հայտնում են Արտաքին գործերի նախարարությունից: «Զրույցի ընթացքում նախարարները մտքեր են փոխանակել տարածաշրջանում վերջին զարգացումների շուրջ։ Կողմերը մտահոգություն են հայտնել և նշել են լարվածության հետագա սրմանը միտված գործողություններից զերծ մնալու կարևորությունը՝ ընդգծելով կայունության և անվտանգության ապահովման անհրաժեշտությունը»,- նշվում է հաղորդագրության մեջ։ Ուշագրավ է, որ այս հեռախոսազրույցը տեղի է ունեցել Նախիջևանում տեղի ունեցած միջադեպից և երկու երկրների անվտանգության խորհուրդների նիստերից հետո։ Ադրբեջանի ԱԳՆ-ի տվյալներով՝ մարտի 5-ին Նախիջևանում ընկած անօդաչու թռչող սարքերն արձակվել են Իրանի տարածքից, տուժել է 4 մարդ: Ալիևը դրոնի հետ կապված միջադեպը որակել Է ահաբեկչություն և հայտարարել, որ Իրանը «պետք է ներողություն խնդրի»: Նշենք, որ Իրանը հերքել է Բաքվի մեղադրանքները. Իրանի ԱԳ նախարարը հնարավոր է համարել, որ դա կարող էր Իսրայելի սադրանքը լինել և կոչ է արել հետաքննություն անցկացնել:

Մանրամասները՝ https://oragir.news/hy/material/2026/...

Oragir.News-ին կարող եք հետևել նաև.

Telegram - https://t.me/oragir_news
Facebook -   / oragir1  
Facebook -   / oragir.am  
Instagram -   / oragir.news  
Tiktok -   / oragir.news